2018-06-21 მასწავლებლობა დიდ პასუხისმგებლობას მაკისრებს
ჩემ შესახებ
მე ვარ ვლადიმერ უშიკიშვილი, თიანეთის მუნიციპალიტეტის სსიპ სოფელ ჟებოტის საჯარო სკოლის სპორტის მასწავლებელი. 2004-2009 წლებში ვმუშაობდი ფიზიკური აღზრდის მასწავლებლად. 2009-2017 წლებში ვიყავი თიანეთის მუნიციპალიტეტის გამგეობის განათლების, კულტურის, ძეგლთა დაცვის, ტურიზმის, სპორტისა და ახალგაზრდულ საქმეთა სამსახურის მთავარი სპეციალისტი, სპორტისა და ახალგაზრდობის მიმართულებით. 2017 წლიდან დავუბრუნდი მშობლიურ სკოლას.
პროფესია მასწავლებელი
არ ვიცი, რა არის ამის მიზეზი, მაგრამ კაცი მასწავლებლები სკოლაში უფრო ნაკლებია, თუმცა მწვრთნელებსაც თუ ჩავთვლით, აქ უპირატესობა მამაკაცებს აქვთ. 2004 წელს დავამთავრე საქართველოს ფიზიკური აღზრდისა და სპორტის აკადემია, ამავე წელს დავიწყე მუშაობა ფიზიკური აღზრდის მასწავლებლად მშობლიურ სკოლაში. ჩემი პროფესია, მასწავლებლობა, დიდ პასუხისმგებლობას მაკისრებს ბავშვების, მშობლების, სკოლისა და სამშობლოს წინაშე.
ვფიქრობ, პირველ რიგში, უნდა გიყვარდეს შენი პროფესია და ბავშვები, ფიქრობდე პროფესიულ განვითარებაზე, გიყვარდეს შრომა, იყო სამართლიანი და კომუნიკაბელური.
სპორტის გაკვეთილები — თანმდევი პრობლემები
სპორტული ინვენტარით ჩვენი სკოლა კარგადაა აღჭურვილი, რაზეც სკოლის დირექციამ დროულად იზრუნა. გარდა ინვენტარისა, სკოლის დირექტორი, ქალბატონი ინეზა ციხიშვილი ყველანაირ პირობას ქმნის სკოლაში ჯანსაღი ცხოვრების წესის დამკვიდრებისთვის და სპორტის განვითარებისთვის, რისთვისაც დიდი მადლობა მინდა გადავუხადო.
მთავარი პრობლემა, რაც ვარჯიშში ხელს ძალიან გვიშლის, სპორტული დარბაზის დაუმთავრებელი რემონტია, ეს გამოწვეულია ტენდერში გამარჯვებული სარემონტო კომპანიის არაკეთილსინდისიერებით. დარბაზი არ თბება და იატაკი მოუწესრიგებელია. ამიტომ გაკვეთილის ჩატარება ძალიან რთულ პირობებში გვიწევს.
თანამედროვე მოსწავლეები
ბავშვებს მოსწონთ, როცა მასწავლებელთან თავს ისე გრძნობენ, როგორც თანატოლთან და მეგობართან, უსმენ, აფასებ მათ შეხედულებებს. სპორტის მასწავლებლებს დისციპლინარული დასჯის მეთოდების გამოყენება, ძირითადად, არ გვიწევს. თუმცა, მქონია შემთხვევები, როდესაც ბავშვი „დამისჯია“ ვარჯიშის არასწორად შესრულებისთვის. მაგალითად, ბურთის არასწორად დარტყმისთვის ვაკეთებინებდი 5 ჩაჯდომს, მაგრამ ეს უფრო ყურადღების გასამახვილებლად იყო. ბავშვებიც გრძნობდნენ ამას, გაგებით ეკიდებოდნენ და ასეთი „ხალისიანი დასჯით“ ცდილობდნენ შეცდომის გამოსწორებას.
ბულინგი. პრობლემები და მათი დაძლევის გზები
ამ მხრივ, სოფლის სკოლაში, შედარებით ნაკლები პრობლემებია და მით უმეტეს, როცა სკოლა მცირე კონტინგენტიანია. თუმცა ყოფილა შემთხვევა, როდესაც შედარებით ძლიერ ბავშვს არ სურს, სუსტი თანაგუნდელი ჰყავდეს. სპორტში გვაქვს უამრავი თამაში, რომელიც ხელს უწყობს ბავშვების გუნდურ მუშაობაში ჩართვას, თვალნათლივ აჩვენებს, რამდენად მნიშვნელოვანია სუსტ გუნდელთან ვარჯიში და განვითარება, ფსიქოლოგიური მომზადება და გვერდში დგომა, ამ ყველაფერს თუ აუხსნი მოსწავლეებს, პრობლემებიც ნაკლები იქნება.
თანამედროვე ტექნოლოგიების როლი
სპორტის გაკვეთილებზე
ბევრი სასარგებლო და საჭირო ინფორმაციის მოსაპოვებლად, სხვადასხვა თვალსაჩინო მასალის სანახავად, რა თქმა უნდა, ვიყენებთ თანამედროვე ტექნოლოგიებს, კომპიუტერს, ვიძიებთ მასალებს, ვამზადებთ პრეზენტაციებს. ვიდეომასალებს ხშირად ვნახულობ სხვადასხვა უცხოურ საიტებზე, რაც ძალიან მეხმარება მრავალფეროვანი და საინტერესო გაკვეთილის ჩატარებაში.
პროფესიული განვითარება
ტრენინგებზე დასწრება ნამდვილად მიყვარს, რადგან ყოველი ტრენინგი ახალს გმატებს, გავლილი მაქვს: სპორტისა და ახალგაზრდობის სამინისტროს კვალიფიკაციის ასამაღლებელი (ახალგაზრდული საქმიანობის მიმართულებებით) ტრენინგ-კურსი; ინტელის ინფორმაციულ-საკომუნიკაციო ტექნოლოგიების გამოყენების ტრენინგი (2-3 დონე); არამატერიალური კულტურული მემკვიდრეობის ინვენტარიზაცია და მათი ბარათის შევსების წესები; თვითმმართველობის საკანონმდებლო ჩარჩო — უფლებები და მოვალეობები, ევროინტეგრაციის საკითხები, ტრენინგპროგრამა; საქართველოს ფიზიკური აღზრდისა და სპორტის მასწავლებელთა გადამზადება; ინფორმაციული ტექნოლოგიების ტექნიკოს-ოპერატორის სასწავლო კურსი; საქართველოს ფიზიკური აღზრდის და სპორტის სახელმწიფო კოლეჯთან არსებული ფიზიკური კულტურისა და სპორტის ინსტრუქტორთა მოსამზადებელი მასაჟისტის კურსი.
დღეს ძალიან ბევრი სოციალური პრობლემაა, რაც, რა თქმა უნდა, აფერხებს მასწავლებლების აქტიურად ჩაბმას სასწავლო პროცესში, მაგრამ არ უნდა დავივიწყოთ ჩვენი მოვალეობები და თუ ბავშვების განვითარება გვინდა, მხოლოდ საგაკვეთილო პროცესი არ არის საკმარისი, უნდა ჩავუტაროთ დამატებითი გაკვეთილები, ჩემ შემთხვევაში, აუცილებელია შეჯიბრებებში მონაწილეობა. კარგია, რომ გაიმარჯვებ, მაგრამ ძალიან მნიშვნელოვანია მონაწილეობა და რაც მეტ სახეობაში ჩართავ ბავშვებს, მით მეტი სტიმული ექნებათ შემდგომი წარმატებებისთვის.
სიახლეების დანერგვა, ახალი ინიციატივები
სიახლეები ბავშვებს მოსწონთ, აუცილებლად სჭირდებათ განვითარება. სიფრთხილით უნდა მოვეკიდოთ ყველა სიახლეს, ხანდახან შეიძლება ცოტა ჩვენებურად გადავაკეთოთ, რომ ბავშვებს მოვარგოთ, ადვილად აგვყვნენ და ჩაერთონ ახალ გამოწვევებში. რა თქმა უნდა, ყოველთვის განვიხილავთ განვლილ სასწავლო წელს, ვსაუბრობთ წარმატებებსა და წარუმატებლობის გამომწვევ მიზეზებზე და გამოსავალს ვეძებთ, როგორ მივაღწიოთ უკეთეს შედეგებს, შესაბამისად ვგეგმავთ მომავალ სამუშაოებს.
თავისუფალი დრო, მომავლის გეგმები
თავისუფალი დრო თითქმის არ მაქვს. მიყვარს ბუნებაში გასეირნება, ლაშქრობებზე სიარული, სიახლეების გაცნობა. სამომავლო გეგმებზე რა გითხრათ, დაგეგმილი არაფერი მაქვს. მინდა, ჩემი ბავშვები იყვნენ წარმატებულები, ჯანმრთელები და კარგ მოქალაქეებად აღიზარდონ.
მოამზადა მაკა ყიფიანმა
|