2017-01-19 მოდულური პროგრამების დანერგვა — პროფესიული რეფორმის პირველი შედეგები
კახა ერაძე
განათლების ხარისხის განვითარების ეროვნული ცენტრის პროფესიულ
კვალიფიკაციათა განვითარების მენეჯერი
მოდულური პროფესიული პროგრამების დანერგვით ბევრი თვისებრივი სიახლე შევიდა პროფესიულ საგანმანათლებლო დაწესებულებებში. შესაბამისად, რეფორმის ორიენტირების სწორი გაცნობიერება, სიახლეების დანერგვისთვის მზაობა და ახალი მეთოდოლოგიების ცოდნა, მოდულური პროფესიული პროგრამების წარმატებული დანერგვის მნიშვნელოვანი ეტაპია.
2015 წლიდან პროფესიულ კვალიფიკაციათა განვითარების ხელშეწყობის პროგრამის დანერგვის კომპონენტი აქტიურად ახორციელებს პროფესიული საგანმანათლებლო დაწესებულებების კონსულტირებას დანერგვის ყველა ეტაპზე და დანერგვის პროცესის მხარდაჭერას გამოწვევების სწრაფი იდენტიფიცირებისა და შესაბამისი რეაგირებისთვის.
ამ მიზნით, 2015-2016 წლებში, სულ განხორციელდა კონსულტირების 75 და მხარდაჭერის 154 ვიზიტი.
დღეისათვის მოდულურ პროგრამებს ახორციელებს 43 საგანმანათლებლო დაწესებულება. აქდან 29 კოლეჯი როგორც საჯარო, ასევე კერძო, 12 უმაღლესი და 2 ზოგადსაგანმანათლებლო დაწესებულება.
2015-2016 წლებში ავტორიზებული და სწავლებაში ჩაშვებულია 59 დასახელების 2016 მოდულური პროგრამა, მათ შორისაა 3 დუალური (სამუშაოზე დაფუძნებული სწავლება), რომელიც 2016 წლის მთავარი მიღწევაა. გაეროს განვითარების პროგრამის „საქართველოში სოფლის მეურნეობის მიმართულების პროფესიული განათლებისა და ექსტენციის სერვისების მოდერნიზაციის პროექტთან“ და გერმანიის ტექნიკური თანამშრომლობის საზოგადოებასთან თანამშრომლობით მომზადებული აგრარული მიმართულების სამი ჩარჩო დოკუმენტის საფუძველზე, პროფესიული პროგრამების განმახორციელებელ 4 საგანმანათლებლო დაწესებულებასთან თანამშრომლობით, მომზადდა მეხილეობის, მეცხოველეობის და მევენახეობა-მეღვინეობის პროგრამები დუალური მიდგომებით განსახორციელებლად და დაიწყო ამ პროგრამების დანერგვა 2016 წლის საშემოდგომო მიღებიდან. დუალური მიდგომით განხორციელებულ პროგრამებზე 4 საგანმანათლებლო დაწესებულებაში ჩაირიცხა 60-მდე სტუდენტი.
2015-2016 წლების ასევე მთავარი მიღწევაა საგანმანათლებლო რესურსების შექმნა. ამ დრომდე პროფესიული განათლების სისტემაში სახელმძღვანელოები ერთ-ერთი ყველაზე პრობლემატური საკითხი იყო. არსებული სახელმძღვანელოები ზედმეტად მოძველებული ან არაქართულენოვანი იყო და არასაკმარისად ხელმისაწვდომი. კომპეტენციებზე დაფუძნებული პროგრამები თვისებრივ სიახლეს სთავაზობს პედაგოგებს როგორც შინაარსობრივი, ასევე სწავლებისა და შეფასების მეთოდოლოგიების თვალსაზრისით, შესაბამისად, პროფესიულ მასწავლებელს განსაკუთრებით სჭირდება საგანმანათლებლო რესურსი მოდულური პროფესიული პროგრამებით სწავლების პროცესის ეფექტურად წარმართვისათვის.
2015 წელს მომზადდა პროფესიული სტუდენტის 51 სახელმძღვანელო და მასწავლებლის 7 გზამკვლევი, ხოლო 2016 წელს — პროფესიული სტუდენტის 28 სახელმძღვანელო და მასწავლებლის 10 გზამკვლევი. მომზადებული საგანმანათლებლო რესურსები განთავსებულია ვებგვერდზე — vet.ge.
მიმდინარე წლის ერთ-ერთ უმნიშვნელოვანეს მიღწევად განვიხილავთ პროფესიულ განათლებაში ზოგადი განათლების ინტეგრირებისათვის გადადგმულ ნაბიჯებს, რაც არსებული საგანმანათლებლო ჩიხების აღმოფხვრისაკენ მიმართული ღონისძიებაა. გაეროს განვითარების პროგრამის მიერ გამოყოფილი გრანტის ფარგლებში, განათლების სამინისტროს ეროვნული სასწავლო გეგმების დეპარტამენტთან ერთად, განხორციელდა პროფესიული პროგრამების და ესგ-ის ანალიზი, ჩამოყალიბდა მიდგომა და შემუშავდა ინტეგრირებული მოდულები, რომელიც საბაზო განათლების მქონე პროფესიულ სტუდენტს სრული ზოგადი განათლების შედეგებზე გაიყვანს და ამით გზას გაუხსნის უმაღლესი პროფესიული ან აკადემიური პროგრამებისაკენ. ამჟამად ამ მოდულების პილოტირება ორი პროგრამის ფარგლებში, სამ საგანმანათლებლო დაწესებულებაში მიმდინარეობს.
პროფესიული განათლების სივრცეში სკოლებიც შემოვიდნენ. მაგალითად აგარის ზოგადსაგანმანათლებლო დაწესებულებამ პროფესიული საგანმანათლებლო პროგრამების განხორციელება დაიწყო. ჩვენ მივესალმებით ასეთ ინიციატივებს, რაც განათლების სხვადასხვა საფეხურების წარმატებულ ინტეგრაციას, მოსწავლეებისათვის სწავლისა და დასაქმებისათვის სხვადასხვა ალტერნატივების შექმნას, პროფესიული განათლების ფართო ხელმისაწვდომობას უწყობს ხელს. იმედი გვაქვს, რომ აგარის სკოლის მაგალითს სხვა სკოლებიც მიბაძავენ.
2015-2016 წლებში, პროფესიულ კვალიფიკაციათა განვითარების ხელშეწყობის პროგრამის ფარგლებში, პერმანენტულად ეწყობოდა საინფორმაციო და სამუშაო შეხვედრები საგანმანათლებლო დაწესებულებების ადმინისტრაციასა და პედაგოგებთან. განსაკუთრებით აღსანიშნავია 2016 წლის ოქტომბერ-დეკემბერში ჩატარებული შეხვედრები პედაგოგებთან, რომელიც მიმდინარეობდა საქართველოს მაშტაბით. შეხვედრის მთავარი თემა იყო დანერგვის მხარდაჭერის ანგარიშებიდან წამოსული მთავარი გამოწვევები და პროგრამებისა და სწავლების ხარისხის გაუმჯობესებისათვის განსახორციელებელი ღონისძიებები. დანერგვაში ჩართულ პროფესიულ მასწავლებლებთან გამართულ რეგიონულ შეხვედრებში მონაწილეობა მიიღო 500-მდე მასწავლებელმა.
2016 წელს ასევე განხორციელდა შეხვედრები პროფესიულ სტუდენტებთან, რომლებიც სწავლობდნენ მოდულურ პროგრამებზე, ჯერ თბილისის მაშტაბით არსებული საჯარო და კერძო საგანმანათლებლო დაწესებულების სტუდენტებთან, ხოლო 23 დეკემბერს სასტუმრო „ქორთიარდ მარიოტში“ განათლების ხარისხის განვითარების ეროვნულმა ცენტრმა, პროფესიული რეფორმის მნიშვნელოვანი ეტაპის შედეგების შეჯამების და რეფორმის სამომავლო ნაბიჯების განხილვის, ასევე პროფესიული მოდულური განათლების პოპულარიზაციის მიზნით, შეხვედრა გამართა საქართველოს მაშტაბით არსებული საგანმანათლებლო დაწესებულებების მოდულური პროგრამების სტუდენტებთან. შეხვედრის მიზანი იყო ინფორმაციის მიღება თავად სტუდენტებისგან მოდულური და დუალური პროგრამების დანერგვის მიმდინარეობის შესახებ. ასევე, პროგრამების ფარგლებში, სტუდენტთა მიღწევების, საუკეთესო პრაქტიკის გამოვლენა და ინფორმაციის ურთიერთგაზიარება.
ძალიან გაგვახარა სტუდენტთა პირველმა შედეგებმა და მიღწევებმა. ისინი სწორად აფასებენ იმ შესაძლებლობებს, რასაც რეფორმირებული პროფესიული განათლების სისტემა სთავაზობს მათ. სახეზეა სტუდენტების მიერ შექმნილი რეალური მცირე ზომის ბიზნესები, რომლებიც უკვე შემოსავალს აძლევენ მათ. ეს მხოლოდ დასაწყისია, რეფორმის პირველი წარმატებული შედეგები სტიმულს გვაძლევს, მეტი ძალისხმევა გავწიოთ არსებულ გამოწვევებთან გასამკლავებლად და დაწყებული რეფორმა ბოლომდე მივიყვანოთ.
|