2016-12-01 მაღალი მიღწევები სასკოლო და სტუდენტური სპორტიდან იწყება
სპორტის უნივერსიტეტის ადმინისტრაციის ხელმძღვანელი ვლადიმერ ბოჟაძე საუბრობს სპორტის უნივერსიტეტის სიახლეებსა და ახალ ინიციატივაზე — ყველა უმაღლეს სასწავლებელში აღდგეს დისციპლინა „სპორტი“. საინტერესოა, ასევე, მისი მოსაზრება ზოგადსაგანმანათლებლო სკოლებში ფიზიკური აღზრდისა და სპორტის სწავლების ხარისხზე და სპორტის პედაგოგთა კვალიფიკაციაზე.
სპორტის უნივერსიტეტის სიახლეები
2007 წელს ყოფილი სპორტის აკადემიის გაუქმებამ უდიდესი გავლენა იქონია არა მხოლოდ საჯარო სკოლებზე და უნივერსიტეტებზე, სპორტის სწავლების მიმართულებით, არამედ მასობრივი სპორტის განვითარებაზე, ცხოვრების ჯანსაღი წესის პროპაგანდაზე და ზოგადად დიდი ზიანი მიაყენა ქართული სპორტის განვითარებას. ხელისუფლების ცვლილების შემდეგ, პირველი ნაბიჯი, რომელიც გადაიდგა, სპორტის უნივერსიტეტის აღდგენა იყო. 7-წლიანი პაუზის შემდგომ, მოვახერხეთ სტუდენტების მიღება. წელს აბიტურიენტთა მესამე ნაკადი იყო და უკვე სამასზე მეტი სტუდენტი გვყავს. სხვადასხვა ფაკულტეტებიდან, სპორტის შესაბამისი სახეობების მიხედვით, ძალიან პოპულარული და საკმაოდ კონკურენტულია ფიზიკური მედიცინისა და რეაბილიტაციის ფაკულტეტი. ძალიან ბევრი სტუდენტი, სხვადასხვა უმაღლესი სასწავლებლებიდან, მობილობით, გამოთქვამს სურვილს ჩვენთან გააგრძელოს სწავლა. ამ თვალსაზრისით (პროცენტული თვალსაზრისით), ჩვენი უნივერსიტეტი ერთ-ერთი ყველაზე აქტიური უმაღლესი სასწავლებელია, სადაც მობილობით სწავლის გაგრძელება სურთ ახალგაზრდებს.
წელს პირველად, დავამატეთ სპორტის პედაგოგების საგანმანათლებლო პროგრამა, რომლის სახელწოდებაა — „ფიზიკური აღზრდისა და სპორტის მასწავლებელი სკოლებისთვის“.
სპორტის აკადემია იყო ერთადერთი უმაღლესი სასწავლებელი, რომელიც სკოლებისთვის ამზადებდა პროფესიონალ სპორტის პედაგოგებს და, ბუნებრივია, მისმა გაუქმებამ საშუალო სკოლებში სპორტის გაკვეთილებს და ჯანსაღი ცხოვრების წესის პროპაგანდას გარკვეული პრობლემები შეუქმნა, რაც 2010 წელს ჩატარებულმა იუნისეფის კვლევამაც დაადასტურა. შემიძლია ციფრებით მოგახსენოთ, ძალიან მძიმე სტატისტიკაა: მაშინ სკოლებში, სულ, 4200-მდე პედაგოგი იყო დასაქმებული და აქედან შესაბამისი განათლება ჰქონდა მხოლოდ 39%-ს, 61% არაპროფესიონალი იყო. შეგვიძლია ვივარაუდოთ, რომ ის 61% ახლა გაცილებით მაღალი იქნება. პროფესიონალი პედაგოგების 39% პროცენტი სწორედ სპორტის აკადემიის კურსდამთავრებულებზე მოდიოდა. ბუნებრივია, ასაკის ან სხვა მიზეზებიდან გამომდინარე, მათი რაოდენობა კიდევ უფრო შემცირდა. ეს ბუნებრივიცაა, როდესაც უქმდება უნივერსიტეტი, რომელიც პროფესიონალ კადრებს ამზადებდა.
ახლა სკოლების უმეტეს ნაწილში, სპორტის პედაგოგი, პირველ რიგში, მამაკაცია. გენდერი და სპორტი — ესეც ძალიან სერიოზული მიმართულებაა და, ამ მხრივ, სასიხარულოა, რომ ჩვენ ძალიან ბევრი სპორტსმენი გოგონა გვყავს სტუდენტი. ამაზე საგანგებოდ ვმუშაობთ, რომ სპორტში გენდერი მაქსიმალურად იყოს გათვალისწინებული — მწვრთნელებში, სპორტსმენებში, პედაგოგებში. თითქმის ყველა სკოლაში სპორტის მასწავლებელი, იმავდროულად, არის ფიზიკის ან მათემატიკის პედაგოგი და ეს საათები მას შეთავსებული აქვს ძირითადი საათებისა და დატვირთვის შესავსებად. ბუნებრივია, ამ შემთხვევაში, პროფესიონალიზმზე საუბარი ზედმეტია.
პრაქტიკულად, პარადოქსული სიტუაცია გვაქვს იმ თვალსაზრისით, რომ საქართველოს კანონი სპორტის შესახებ სკოლებს ავალდებულებს, რომ სპორტის გაკვეთილი კვირაში, მინიმუმ, 4 საათი იყოს. საზღვარგარეთ, ყველა ევროპულ ქვეყანაში, ეს ციფრი გაცილებით მაღალია. სკოლებში მოსწავლეები, რაც შეიძლება, აქტიურად უნდა იყვნენ ჩართული სპორტში, იმიტომ რომ, არააქტიური ცხოვრების წესი, ზოგადად და მათ შორის მოსწავლეებში, უამრავ დაავადებას იწვევს და ჩვენ ძალიან მძიმე სურათი გვაქვს ამ მიმართულებით — ტანადობის დარღვევა, სკოლიოზი და ბევრი სხვ. ფაქტობრივი მდგომარეობით, სპორტის გაკვეთილები სულ რაღაც 2 საათი ტარდება. ეს საჯარო ინფორმაციაა და სკოლები ამას არც მალავენ, რადგან არც ინფრასტრუქტურა აქვთ სათანადო და არც შესაბამისი რესურსი.
ამ მიმართულებით ძალიან ბევრს ვმუშაობთ, მაგალითად, მოვახერხეთ ის, რომ 2017-18 სასწავლო წლიდან, ჳ-ვჳ კლასებში, უკვე სავალდებულო წესით, საათების რაოდენობა იქნება 3 საათი. საკითხი სასწავლო გეგმებში უკვე შესულია და ეს ჩვენი უნივერსიტეტის აქტივობითაც მოხდა — პრაქტიკულად, ერთი საათი გარანტირებულად დაემატება ამ სასკოლო დატვირთვას.
პროგრამა — „ფიზიკური აღზრდისა და სპორტის მასწავლებელი სკოლებისთვის“
ზოგადი განათლების კვალიფიკაციათა ჩარჩოს ჩამონათვალში, ფიზიკური აღზრდისა და სპორტის მასწავლებელი საერთოდ არ არსებობდა იმიტომ, რომ არ არსებობდა უნივერსიტეტი, რომელსაც სურვილი ექნებოდა, ემუშავა ამ თემებზე და ამ სპეციალობის ადამიანები მოემზადებინა. ამიტომ ჩვენ ორი წელი დაგვჭირდა, განათლების ხარისხის განვითარების შესაბამის სამსახურთან ერთად, ეს საკითხები დაგვერეგულირებინა, შეგვემუშავებინა შესაბამისი სტანდარტი და, ფაქტობრივად, ერთადერთი უნივერსიტეტი ვართ, რომელშიც ექსკლუზიურად (2015 წელს მივიღეთ ამ პროგრამის შესაბამისი ავტორიზაცია), პირველად მოხდა, რომ პედაგოგის გადამზადების პროგრამა — 60-კრედიტიანი მოდული „ჩავაშენეთ“ 240-კრედიტიან მოდულში. ეს 240 კრედიტი ინტეგრირებულია, აქედან 60 — არჩევითი საგნებია, 120 — ძირითადი საგნები და 60 — სწორედ მასწავლებლის გადამზადების პროგრამა. აბიტურიენტებს, რომლებიც ჩვენს უმაღლესში ჩააბარებენ ამ სპეციალობაზე — „ფიზიკური აღზრდისა და სპორტის მასწავლებელი სკოლებისთვის“, ფაქტობრივად, კარიერას დაიწყებენ უფროსი მასწავლებლობით (ყველა პედაგოგი პრაქტიკოსი მასწავლებლით იწყებს პედაგოგიურ კარიერას) და გარანტირებულად ექნებათ სამსახური, რადგან მოთხოვნა, საჯარო და კერძო სკოლებიდან, კვალიფიციურ და პროფესიონალ პედაგოგებზე ძალიან მაღალია. დიპლომთან ერთად, ჩვენ მათ შესაბამის სერტიფიკატსაც გადავცემთ და ერთი საფეხური — პრაქტიკოსი მასწავლებლიდან უფროს მასწავლებლამდე — მათ უკვე გავლილი ექნებათ.
გარდა ამისა, სწორედ ჩვენი უნივერსიტეტი ახორციელებს მასწავლებლის გადამზადების პროგრამასაც. ესეც განათლების ხარისხის განვითარების შესაბამის სამსახურთან ერთად შევიმუშავეთ და საკმაოდ დიდი შრომა გავწიეთ ყველამ ერთად, რომ ეს საგანმანათლებლო პროგრამა მოგვემზადებინა. იცით, რომ ეს 60-კრედიტიანი ერთწლიანი პროგრამაა და ამასაც სახელმწიფო აფინანსებს და ყველა პედაგოგს, ვინც ჩვენთან ამ პროგრამაზე ჩაირიცხება, სახელმწიფო 1850 ლარით აფინანსებს. ჩვენ ამ სასწავლო პროგრამის განხორციელებისთვის, პრაქტიკულად, მზად ვართ.
დაინტერესება ახალგაზრდების მხრიდან
დაინტერესება საკმაოდ მაღალი იყო, ბევრმა გამოთქვა ამ პროგრამაში მონაწილეობის სურვილი. სამწუხაროდ, ეროვნულ გამოცდებზე, მიუხედავად იმისა, რომ აბიტურიენტები, პირველ რიგში, ჩვენთან გადიან ე.წ. სპორტულ ტურს (რომელიც გულისხმობს: 1000 მეტრზე სირბილს, 100 მეტრზე სირბილს, აზიდვებს, სიგრძეზე ხტომას და ა.შ.), რაც ბუნებრივია, ისინი ხომ სპორტის მასწავლებლები უნდა იყვნენ და, შესაბამისად, კარგ სპორტულ ფორმაში უნდა იყვნენ. ამის მერე მიდიან ეროვნულ გამოცდებზე და, განსხვავებით სხვა აბიტურიენტებისგან, მხოლოდ სამ საგანს აბარებენ, მათ მინიმალური ცოდნა მოეთხოვებათ. სამწუხაროდ, ბევრი ამ მინიმალური მოთხოვნების დაკმაყოფილებასაც ვერ ახერხებს ან, პირიქით, უფრო მეტს ახერხებს და სხვა უმაღლეს სასწავლებელში ხვდება, აღარ ბრუნდება ჩვენს უნივერსიტეტში.
მობილობის წესი
ჩვენს უნივერსიტეტში, ბუნებრივია, მობილობის წესი ისეთივეა, როგორც სხვა უნივერსიტეტებში — ვნახავთ რა საგნები გაიარეს, რა კრედიტები აქვთ, რას ჩავუთვლით და, შესაბამისად, რომელ კურსზე მოუწევთ სწავლის გაგრძელება და ა.შ. რაც შეეხება ფიზიკურ ნორმატივებს, აქ საუბარია მარტივ მოთხოვნებზე, რაც არ არის რთული იმ ადამიანისთვის, ვისაც სურვილი აქვს, საკუთარი კარიერა სპორტს და ფიზიკურ აღზრდას დაუკავშიროს, იმიტომ რომ, წარმოუდგენელია, პედაგოგი თავად არ იყოს სპორტულ ფორმაში.
ფიზაღზრდის კათედრები
უმაღლეს სასწავლებლებში, 2008 წლიდან, ფაქტობრივად, ყველგან გაუქმდა ე.წ. ფიზკულტურის კათედრები. ჩვენი თაობის სტუდენტობას ახსოვს ასეთი კათედრების არსებობა, შესაბამისი ინფრასტრუქტურაც არცერთ უნივერსიტეტში, სამწუხაროდ, აღარ არსებობს. მანამდე არსებობდა პრეცედენტი, როცა სტუდენტებს არჩევით საგნად შეეძლოთ აეღოთ სპორტის რომელიმე სახეობა და ამით კრედიტებიც დაეგროვებინათ, დღეს ესეც აღარ არსებობს, სამწუხაროდ. ჩვენ, როგორც ერთადერთი სპორტული უნივერსიტეტი, განათლების ხარისხის განვითარების სამსახურთან ერთად, გამოვდივართ ინიციატივით — დავრთოთ ნება უმაღლეს სასწავლებლებს, მისცენ სტუდენტებს სავალდებულო ან არჩევით საგნად სპორტის რომელიმე სახეობის არჩევის შესაძლებლობა, რომელშიც ივარჯიშებენ, უნივერსიტეტის სახელით მონაწილეობას მიიღებენ სხვადასხვა შეჯიბრებებში, ტურნირებში. ამით უნივერსიტეტსაც ასახელებენ და პლუს, კრედიტებსაც შეივსებენ. მთავარია, სტუდენტებს სპორტისა და სპორტული მოღვაწეობის მიმართ გავუღვიძოთ ინტერესი.
ავტორიზაციის მოთხოვნებში, სამწუხაროდ, რაიმე სპორტული სივრცის არსებობა აუცილებელი მოთხოვნა არ არის, ამიტომ გვინდა, იმ უნივერსიტეტებს, რომლებიც ან ახალ ავტორიზაციას გაივლიან, ან ხელახლა დაფუძნდებიან, დაეკისროთ ვალდებულება, რომ უნივერსიტეტის ტერიტორიაზე არსებობდეს გარკვეული სპორტული სივრცე, საზოგადოებრივი სივრცე იმისათვის, რომ სტუდენტებმა, არჩევითი საგნის სახით, შეძლონ კრედიტების მიღება, ან მათთვის თავისუფალ დროს — სპორტული აქტივობების განხორციელება. ამით წავახალისებთ სტუდენტურ სპორტს და მაღალი მიღწევების სპორტი სწორედ მასობრივი სპორტიდან — სასკოლო და სტუდენტური სპორტიდან იწყება.
ახალი ინიციატივა — იდეის დონეზე თუ კონკრეტული ნაბიჯები
ეს ინიციატივები იდეის დონეზე არსებობს. ჩვენ ძალიან აქტიურად ვმუშაობთ განათლებისა და მეცნიერების სამინისტროსთან, ასევე, სპორტისა და ახალგაზრდულ საქმეთა სამინისტროსთან. ისინი ახორციელებენ ჩვენს ზედამხედველობას. ჩვენი უნივერსიტეტის ბიუჯეტი სწორედ სპორტის სამინისტროს ბიუჯეტშია გათვალისწინებული. წელს სპორტის სამინისტროს დაფინანსება გაეზარდა და მნიშვნელოვანია, რომ ითქვა — სპორტი და განათლება ყველაზე მნიშვნელოვანი პრიორიტეტია ჩვენი ქვეყნისთვის. იმედი გვაქვს, სპორტის უნივერსიტეტსაც გაეზრდება დაფინანსება. უნიკალურ შემთხვევასთან გვაქვს საქმე — სახელმწიფოს, ამ ბოლო პერიოდში, არ დაუფუძნებია არც ერთი უნივერსიტეტი, მხოლოდ ჩვენი უნივერსიტეტის ხელახლა დაფუძნება მოხდა. ახლა, ასე ვთქვათ, გარდამავალ პერიოდში ვართ, მუდმივად გვემატება როგორც სტუდენტების რაოდენობა, ასევე პროფესორ-მასწავლებლების.
თანამშრომლობა სკოლებთან
უნივერსიტეტში ე.წ. გადამზადების, კვალიფიკაციის ამაღლების კურსები გავაკეთეთ. ძალიან ინტენსიურად ვთანამშრომლობთ სკოლებთან და ვახსენებთ მათ, რომ პედაგოგების გადამზადების პროგრამას ვახორციელებთ. პირველად მოხდა წელს, როცა სპორტის პედაგოგების სერტიფიცირება განხორციელდა და ძალიან ბევრმა პედაგოგმა, სასერტიფიკატო გამოცდებზე გასასვლელად, ჩვენს უნივერსიტეტში გაიარა მოსამზადებელი კურსი.
თქვენ იცით, რომ 2017 წლიდან დაგეგმილია პედაგოგების ხელფასების მატება, მაგალითად, 1 იანვრიდან მენტორ პედაგოგს ექნება 1250 ლარი, წამყვანს — 1000 ლარი, უფროს მასწავლებელს — 800 ლარი და პრაქტიკოს მასწავლებელს — 455. ბუნებრივია, ბევრი მოქმედი პედაგოგი აპირებს, ამ მიმართულებით, კარიერულ ზრდას და ჩვენი უნივერსიტეტი მზად არის, კვალიფიციურად შეძლოს ამ ადამიანების გადამზადება. არაერთი შეხვედრა მქონდა განათლებისა და მეცნიერების მინისტრთან, ალექსანდრე ჯეჯელავასთან და დარწმუნებული ვარ, რომ სკოლებშიც და უმაღლესშიც სპორტი აუცილებლად დაბრუნდება. ჩვენი უნივერსიტეტი, ერთი მხრივ, წელიწადში ერთხელ, შეძლებს, განათლების სისტემას ახალი კვალიფიციური პედაგოგები მიაწოდოს და მეორე მხრივ, ერთწლიანი 60-კრედიტიანი პროგრამით, უკვე მოქმედი პედაგოგები გახადოს პროფესიონალები, აუმაღლოს კვალიფიკაცია, რომ მშვიდად ვიყოთ და ვიცოდეთ, სკოლაში ჩვენს შვილებს პროფესიონალი პედაგოგები ასწავლიან ფიზიკურ აღზრდასა და სპორტს.
ცხოვრების ჯანსაღი წესის პოპულარიზება
უნდა ითქვას, რომ ჩვენს ქვეყანაში პრობლემები გვაქვს სპორტის პოპულარიზაციასთან, მასობრიობასთან დაკავშირებით. რადგან ჩვენ ამ პროფილის ერთადერთი უნივერსიტეტი ვართ, აქტიურად უნდა ვიყოთ ჩართულები სპორტის სახელმწიფო პოლიტიკის განხორციელებაში. ამიტომ ჩამოვაყალიბეთ შესაბამისი სტრუქტურა, რომელიც დაეხმარა პედაგოგებს, მომზადებულიყვნენ სასერტიფიკატო გამოცდისთვის, ვახორციელებთ მომავალი პედაგოგების მომზადების პროგრამას და ასევე აქტიურად ვთანამშრომლობთ სხვადასხვა სპორტულ ფედერაციებთან. არაერთი სპორტული ფედერაციის მოქმედი მწვრთნელები გადავამზადეთ, ავამაღლეთ როგორც გამოცდილი მწვრთნელების კვალიფიკაცია, ასევე ახალბედა მწვრთნელების. ფაქტობრივად, ჩვენი სასწავლო პროგრამა სრულად არის ინტეგრირებული ყველა შესაბამის ფედერაციასთან და ისინი დიდი სიამოვნებით თანამშრომლობენ ჩვენთან. უკვე წარმატებული თანამშრომლობის გამოცდილებაც გვაქვს ბევრ ფედერაციასთან.
ახლა მოვამზადეთ შესაბამისი მოდული და დავიწყებთ თანამშრომლობას როგორც დედაქალაქთან, ასევე სხვა მუნიციპალიტეტებთან. პროგრამა ითვალისწინებს სპორტის მენეჯერების მომზადებას, იგულისხმება სასპორტო აიპ-ების, სხვადასხვა სპორტული კლუბისა თუ ფედერაციის ხელმძღვანელი პირები, რომლებიც შეისწავლიან, პირველ რიგში, სპორტის კანონმდებლობას, ბიუჯეტირებას, შესყიდვების შესახებ კანონს და ა.შ., ყველაფერს, რაც მათ პროფესიულ მართვაში დაეხმარება.
გვინდა, სპორტში დავაბრუნოთ მეცნიერება და განათლება იმიტომ, რომ ამის გარეშე წარმოუდგენელია. გვაქვს სამაგისტრო პროგრამები, მათ შორის სპორტის მენეჯერის და გვყავს მაგისტრები, რომლებმაც წელს საერთო სამაგისტრო გამოცდები ჩააბარეს, გახდნენ მაგისტრანტები და აგრძელებენ სწავლას ჩვენთან. მათ სპორტის მენეჯერის მაგისტრის ხარისხი მიენიჭებათ.
რაც შეეხება სპორტის პოპულარიზაციას, ამ მიმართულებით სამწუხარო სტატისტიკა გვაქვს, ფაქტობრივად, მოსახლეობის საერთო რაოდენობის 1,1%-ია სპორტში ჩაბმული და ეს საგანგაშოა. ოფიციალური მონაცემები ასეთია — უამრავი სპორტის სახეობა და ფედერაცია არსებობს, რომელსაც, პოპულარიზაციის თვალსაზრისით, სერიოზული პრობლემები აქვს, არ არიან სპორტსმენების სათანადო რაოდენობა ჩართული, და ძალიან ბევრი სახეობა, სამწუხაროდ, რეალურად ძალიან რთულ მდგომარეობაშია.
ბუნებრივია, ჩვენი ტიპის ქვეყანა, ასეთი მცირე მოსახლეობით, სპორტის ყველა დარგს ვერ განავითარებს და ყველგან ვერ გვექნება უმაღლესი მიღწევები, მაგრამ არ უნდა არსებობდეს სპორტის სახეობა, რომელსაც არ ექნება შესაბამისი ხელშეწყობა და მხარდაჭერა. ამ თვალსაზრისით, ასევე, გვაქვს ინიციატივა — სპორტის სამინისტროსთან ერთად (ბუნებრივია, პირველ რიგში, ეს სახსრებთანაა დაკავშირებული), თუმცა არა მხოლოდ სამინისტროს, მუნიციპალიტეტებშიც შეიძლება შესაბამისი რესურსის გამოძებნა, იგულისხმება სპორტის ერთგვარი ვაუჩერიზაცია. პირველ რიგში, ეს შეეხება ბავშვებს მრავალშვილიანები ან სოციალურად დაუცველი ოჯახებიდან და სხვა შესაბამის კატეგორიას. მათ გადაეცემათ ვაუჩერი და ბავშვები, მშობლებთან ერთად, თავად გადაწყვეტენ, სპორტის რომელ სახეობას აირჩევენ, წარადგენენ ვაუჩერს და სახელმწიფო, მათ ნაცვლად, გადაიხდის თანხას. ამით კიდევ მეტ ბავშვს ჩავრთავთ სპორტში. მართალია, წელს ამისთვის რესურსები არ არის გამოძებნილი, მაგრამ იმედი გვაქვს, რომ 2017 წელს ნაყოფიერად გამოვიყენებთ იმისთვის, რომ ეს ინიციატივა კიდევ უფრო დაკონკრეტდეს და საკანონმდებლო ფორმა მიიღოს. შეიძლება ბიზნესიც ჩაერთოს, ამიტომ ერთგვარი შეღავათები უნდა არსებობდეს ბიზნესისთვის, სპორტის პოპულარიზაციისა და მხარდაჭერის თვალსაზრისით. ვფიქრობთ, ეს აუცილებელი ნაბიჯია, რადგან ყველანი ამ ქვეყანაში ვცხოვრობთ და ძალიან კარგად ვიცით, რა ღირს ან საცურაო აუზის აბონემენტი, რაგბის ან ფეხბურთის სექციაში ბავშვის მიყვანა და სხვ. სამწუხაროდ, ათასობით და ათიათასობით ბავშვი ამ პროცესის მიღმა რჩება და ჩვენ უნდა შევძლოთ, რომ ეს შვცვალოთ. ასეთია ევროპული მიდგომა — ყველამ კარგად იცის, რომ 1 ევრო, რომელიც სპორტში იდება, დაახლოებით, 10-12 ევროს უდრის, არჩადებულს ჯანდაცვაში და დაზოგილს სხვა რესურსებისთვის. ამიტომ სახელმწიფომ ბევრი უნდა ჩადოს სპორტში, რადგან ეს პირდაპირ ეფექტს იძლევა, მათ შორის — ფინანსურს, იმიტომ რომ ნაკლები ადამიანია ჯანმრთელობის პრობლემით, ნაკლები დაავადებაა, რაც მნიშვნელოვანია — თუნდაც საყოველთაო ჯანდაცვის მიმართულებით სახსრები გაცილებით ეკონომიურად დაიხარჯება. ვფიქრობთ, უახლოესი წლების განმავლობაში, სახელმწიფოს მიდგომა სპორტის მიმართ რადიკალურად შეიცვლება.
დარწმუნებული ვართ, ჩვენ ყველანი შევძლებთ ერთად გავაძლიეროთ ჩვენს ქვეყანაში სპორტი და, შესაბამისად, კიდევ უფრო მეტი წარმატებები ჰქონდეთ ჩვენს სპორტსმენებს საერთაშორისო ასპარეზზე.
2017 წლის განმავლობაში არაერთ საერთაშორისო სპორტულ ღონისძიებას უნდა ვუმასპინძლოთ და არაერთი ინფრასტრუქტურული პროექტი ხორციელდება. ბუნებრივია, როცა ეს სპორტული ღონისძიებები დასრულდება, ინფრასტრუქტურა რჩება ჩვენს ქვეყანას, მაგრამ ამ დარბაზებში კვალიფიციური მწვრთნელები და სპეციალისტები უნდა იყვნენ, იქ უნდა ივარჯიშონ ბავშვებმა და მათთვის, ბუნებრივია, ეს ყველაფერი ხელმისაწვდომი და, პირველ რიგში, პოპულარული უნდა იყოს.
სიახლეები/ სამომავლო გეგმები
ზოგადად, აბიტურიენტებისთვის, ალბათ, მნიშვნელოვანი იქნება ის სიახლე, რომელიც ეხება უცხო ენის გამოცდას, რადგან ჩვენი აბიტურიენტებიც აბარებენ, ბუნებრივია, ამ გამოცდას. რაც შეეხება ჩვენს უნივერსიტეტს, 2017-18 სასწავლო წლისთვის, ვაცხადებთ მიღებას სამ სასწავლო პროგრამაზე:
— სპორტის მწვრთნელის, სპორტის ყველა სახეობების მიხედვით;
— ფიზიკური მედიცინისა და რეაბილიტაციის, რომელიც, რა თქმა უნდა, არ არის ექიმის სასწავლო პროგრამა, მაგრამ სტუდენტები საკმაო ცოდნას იღებენ, რომ იყვნენ კვალიფიციური სპორტის ექიმები, მასაჟისტები, რეაბილიტოლოგები და დაეხმარონ სპორტულ კლუბებს. ძალიან ბევრი სპორტული კლუბია ჩვენს ქვეყანაში და მათ კვალიფიციური ექიმები სჭირდებათ, ჩვენი კურსდამთავრებულები, პრაქტიკულად, უზრუნველყოფილი იქნებიან სამსახურით;
— პედაგოგების სასწავლო პროგრამა, რომელზეც ახლა დიდი მოთხოვნაა.
ჩვენ, ასევე, გვაქვს ინიციატივა — 21 სასწავლო პროგრამას სახელმწიფო სრულად აფინანსებს და ძალიან მნიშვნელოვანია, რომ ათიათასობით სტუდენტი 100%-იან დაფინანსებას იღებს. ჩვენი სურვილია, რომ 22-ე სპეციალობად სპორტის პედაგოგი დაემატოს და ამით კიდევ უფრო წავახალისოთ ეს პროცესი, კიდევ უფრო მოვიგოთ დროის თვალსაზრისით, რაც შეიძლება სწრაფად მივაწოდოთ განათლების სისტემას კვალიფიციური პედაგოგები.
მინდა ყველა აბიტურიენტს წარმატებები ვუსურვო. მნიშვნელოვანია, რომ კვალიფიციური, განათლებული თაობა გვყავდეს ყველა მიმართულებით — როგორც სპორტში, ასევე მეცნიერებაში, რადგან განათლების გარეშე წარმოუდგენელია ქვეყნის განვითარება.
რადიო იმედის გადაცემის გამოცდებიდან გამოცდებამდე თეიკოანჯაფარიძესთან ერთად მიხედვით მოამზადა ლალი თვალაბეიშვილმა
|