2016-11-17 ზამთარში პედაგოგთა საგნობრივი გამოცდა არ ჩატარდება განათლების სისტემაში მიმდინარე და
დაგეგმილი სიახლეების შესახებ საუბრობს
განათლებისა და მეცნიერების
მინისტრი ალექსანდრე ჯეჯელავა
„მე პირადად მივიღე ეს გადაწყვეტილება და, რა თქმა უნდა, ზოგიერთ ადამიანს, რომელიც სწორედ ზამთარში აპირებდა გამოცდის ჩაბარებას, ამით ცხოვრება გავურთულეთ. თუმცა, ყოველი გამოცდა ბარიერია და ამისი გაშუქება, ჩაჭრილი მასწავლებლების კუთხით, კიდევ ერთი დარტყმა იყო მასწავლებლების პრესტიჟზე. მოკლედ, ვფიქრობ, რომ ეს არის ძალიან ცუდი რამ. მით უმეტეს, იცით, რომ ყოველ შემდეგ გამოცდაზე ჩაჭრილ პედაგოგთა პროცენტი ითვლება არა პედაგოგების საერთო რაოდენობიდან, არამედ გამოცდაზე გასული მასწავლებლების რაოდენობიდან, რაც იმას ნიშნავს, რომ სულ ბოლო გამოცდაზე 100-პროცენტიანი ჩაჭრა გვექნება. ვფიქრობ, ეს ძალიან ნეგატიური მოვლენაა.“ — აცხადებს ალექსანდრე ჯეჯელავა
დაბრუნდება მასწავლებელთა პროფესიული უნარების გამოცდა, მაგრამ, ჯერჯერობით, უცნობია მისი ჩატარების კონკრეტული თარიღი. თუმცა, ცნობილია, რომ პროფესიული უნარების გამოცდას, საგნის გამოცდის მსგავსად, ბარიერი არ ექნება და მას მინისტრი, „გამოცდის“ ნაცვლად, „კვალიფიკაციის ამაღლებას“ არქმევს. „ეს ჩემთვის ძალიან პრინციპულია იმიტომ, რომ 30-წლიანი გამოცდილების მქონე პედაგოგის გამოცდა არაადეკვატური მგონია. პროცესს კვალიფიკაციის დადასტურება ან კვალიფიკაციის ამაღლება ერქმევა, ოღონდ გამოცდა და ბარიერი — არავითარ შემთხვევაში.“
მართალია „ჩაჭრა“, როგორც მოვლენა, მინისტრის თქმით, დასრულდა და ახალ რეალობაში მასწავლებლები უბარიერო გამოცდით შეეცდებიან კრედიტების დაგროვებას, მაგრამ, სამწუხაროდ, ეს ცვლილება ვერ შეეხება იმ ჩაჭრილ პედაგოგებს, რომლებმაც სქემის საპილოტე წლის განმავლობაში უკვე სცადეს გამოცდის ჩაბარება და ბარიერი ვერ გადალახეს: „უკან თარიღით ცვლილება ვერ განხორციელდება, რადგან ამას ტექნიკურად ვერ შევძლებთ. მართალი გითხრათ, ჩემი სურვილია, რომ გავითვალისწინოთ ეს რამენაირად, თუნდაც იმიტომ, რომ ამ ადამიანებმა ძალიან მნიშვნელოვანი დრო დახარჯეს, მაგრამ, როგორც ჩანს, ადრე ჩატარებული გამოცდების შედეგების შეცვლას ტექნიკურად ვერ შევძლებთ“.
უმაღლესში ის უნდა ხვდებოდეს, ვინც დარწმუნებული და
ჩამოყალიბებულია,
რომ აქვს საკმარისი უნარები უმაღლესი
განათლების მისაღებად
„ავტონომია უნივერსიტეტს“ — განაცხადა განათლებისა და მეცნიერების მინისტრმა ალექსანდრე ჯეჯლავამ, 15 ნოემბერს, განათლებისა და მეცნიერების სამინისტროში გამართულ პრესკონფერენციაზე და უნივერსიტეტში მოახლოებული თვითმმართველობის არჩევნების შესახებ საკუთარი პოზიცია ასე გამოხატა: „ჩემი დამოკიდებულება ამის მიმართ, რაც უნდა უცნაურად ჟღერდეს, ასეთია: ავტონომია უნივერსიტეტს! აუდიტორია 115-ის წევრები სწორედ ამას იმეორებენ ხშირად. ამ ბოლო დროს, ეს გამოთქმა, მგონი, ერთგვარი ბრენდიც კი გახდა. ვფიქრობ, უნივერსიტეტი იმიტომ არის უნივერსიტეტი, რომ მას უნდა ჰქონდეს საშუალება, თვითონ ჩამოყალიბდეს როგორც აკადემიურ, ისე თვითმმართველობის საკითხებზე.
ვხედავ თუ არა რისკებს, რომ თვითმმართველობის არჩევნები არ მოეწონებათ სტუდენტებს ან არასტუდენტების ჯგუფს, რა თქმა უნდა, ვხედავ. ვფიქრობ, ნებისმიერი არჩევნების შედეგები — საპარლამენტო, საპრეზიდენტო თუ სხვ. — საზოგადოების ნაწილს მოსწონს და ნაწილს კი — არა. შესაბამისად, საფრთხეს იმისას, რომ ამ არჩევნებით ყველა კმაყოფილი არ იქნება, ნამდვილად ვხედავ, თუმცა, არჩევნების განმარტება სწორედ ამაში მდგომარეობს — რომელიღაც მხარე იგებს, რომელიღაც მხარე აგებს. მეორე საკითხია პრინციპები, თვითონ თვითმმართველობის პრინციპები, აქ ვიზიარებ მოსაზრებას, რომ თვითმმართველობის პრინციპები უფრო ინკლუზიური უნდა გახდეს — ყველა სტუდენტს თუ სტუდენტთა ჯგუფს თანაბრად უნდა მიუწვდებოდეს ხელი თვითმმართველობის რესურსებზე და ა.შ. თსუ-ს შემთხვევაშიც და სხვა უნივერსიტეტების შემთხვევაშიც, ისევ და ისევ, მათი გადასაწყვეტია, როგორ სისტემას აირჩევენ, თუმცა, რაც უფრო დემოკრატიული და ლიბერალური იქნება რესურსების განაწილების სისტემა, მით მეტი შანსი იქნება იმისა, რომ ყველა ჩაერთოს და ნაკლები პროტესტი იყოს, თუმცა, პროტესტს ვერ გამოვრიცხავთ.“
სამ უმაღლეს საგანმანათლებლო დაწესებულებაში — ივანე ჯავახიშვილის სახელობის თბილისის სახელმწიფო, ილიას სახელმწიფო და საქართველოს ტექნიკურ უნივერსიტეტებში — სახელმწიფო აუდიტის სამსახურმა შეისწავლა იმ კურსდამთავრებულთა აკადემიური მოსწრების მაჩვენებლები, რომლებმაც ბაკალავრის ხარისხი მოიპოვეს.
აღმოჩნდა, რომ 64%-მა სწავლა საშუალოზე დაბალი აკადემიური მოსწრების მაჩვენებლით დაასრულა. ასევე, საშუალოზე დაბალი აკადემიური მოსწრების მაჩვენებლით დაასრულა საბაკალავრო პროგრამები იმ კურსდამთავრებულთა, საშუალოდ, 40%-მა, რომლებსაც ერთიან ეროვნულ გამოცდებზე მაღალი შედეგები ჰქონდათ. საშუალოზე დაბალია შერჩეული აქტიური სტატუსის მქონე სტუდენტების შეფასებების 67%. აუდიტის ჯგუფის მიერ განხორციელებულმა კვლევამ ისიც გამოავლინა, რომ დაკვირვების ჩატარების დღეეებში შერჩეულ ლექცია/სემინარებზე დასწრების საერთო მაჩვენებელი 15% იყო.
რა ფაქტორები განაპირობებს ასეთ დაბალ აკადემიურ მაჩვენებლებს და რაზე მეტყველებს ეს ყველაფერი, ამის შესახებ განათლებისა და მეცნიერების მინისტრმა ალექსანდრე ჯეჯელავამ განაცხადა: „ძალიან ფართო თემაა და ერთი მიზეზი ასეთ რამეს არასდროს აქვს. ერთი რამ მინდა მოგახსენოთ (მიუხედვადა იმისა, რომ შესაძლოა ეს საზოგადოების ნაწილს არ მოეწონოს): წელს ერთიან ეროვნულ გამოცდებზე დარეგისტრირებულთა 84% გახდა უმაღლესი სასწავლებლის სტუდენტი. მსგავსი ციფრი ბრიტანეთში არის 20%, ანუ უმაღლესი განათლება ბრიტანეთში, პირობითად, იმ ვიწრო წრის ხვედრია, რომელსაც ტოპ ქულები აქვს და აკადემიური მოსწრებაც ძალიან მაღალი. ბრიტანეთმა რომ გადაწყვიტოს, ყველა ახალგაზრდა შეუშვას უმაღლესში ან 20%-ის ნაცვლად 84%, პრობლემები შეექმნება. უმაღლესი განათლება თავისთავში გულისხმობს მოტივაციის მაღალ დონეს. სკოლის მოსწავლესავით ვერ ვსდევთ სტუდენტს, რადგან ითვლება, რომ სტუდენტობა ადამიანმა იმიტომ გადაწყვიტა და აირჩია პროფესია, რომ საკუთარ თავს თავად უპატრონოს. ბევრი უნივერსიტეტი თავისუფალ დასწრებას ნერგავს, ბევრი — საგნების არჩევას და ა.შ. იქ არის დაშვება ყველგან, რომ სტუდენტი ძალიან მოტივირებულია, რომ ისწავლოს, რაც, სამწუხაროდ, ვფიქრობ, ჩვენთან არარეალურია. იმის ხარჯზე, რომ პროფესიული განათლება, ჯერჯერობით, ძალიან არაპოპულარულია (თუმცა ახლა იკრებს ძალებს, მაგრამ ჯერჯერობით ასე ითვლება), გამოდის, რომ ის ხალხი, ვინც წესით პროფესიულში იქნებოდა ბედნიერი და არაჩვეულებრივ სამსახურს იშოვიდა, იმის გამო, რომ ოჯახმა ურჩია ან პერსტიჟულია, აკადემიური განათლების გზით წავიდა. ადამიანი, რომელსაც შინაგანი მოტივაცია არ აქვს, რომ ისწავლოს, რა თქმა უნდა, ყველანაირად ეცდება, დაუძვრეს ამ ვითარებას. მთავარ მიზეზად მე მაინც ამას ვიტყოდი.
თბილისის სახელმწიფო უნივერისტეტმა, ბოლო წლების განმავლობაში (და სხვა უნივერსიტეტებიც ამას აკეთებენ), თამასა მნიშვნელოვნად ასწია და ასე აგრძელებს. ჩვენ უმაღლეს სასწავლებლებს დაფინანსებით უნდა დავეხმაროთ. დღეს, მოგეხსენებათ, დაფინანსებას ერთადერთი პარამეტრი აქვს — რამდენი სტუდენტი ჰყავს უმაღლეს სასწავლებელს, სხვა მეთოდი არ არის. ეს არ წაახალისებს ხარისხს, ეს წაახალისებს რაოდენობას. უნდა მოვახერხოთ, რომ დაფინანსების სქემა იყოს ისეთი, რომელიც სწორედ ამ პარამეტრებს — როგორი აკადემიური მოსწრება აქვს სტუდენტს ან სწავლის დასრულების შემდეგ საქმდება თუ არა — გაითვალისწინებს“.
პრესკონფერენციაზე ალექსანდრე ჯეჯელავამ განაცხადა, რომ იგეგმება ცვლილება უმაღლესი განათლების დაფინანსების სქემაში, რაც თავისთავად ძალიან მასშტაბური ცვლილებაა და ბევრ ადამიანს ეხება: „ამიტომ, მივიღეთ გადაწყვეტილება, რომ ახალი სქემის შემუშავებაში ჩართული იქნებიან საერთაშორისო მოწინავე საკონსულტაციო კომპანიები და ძალიან მალე, ალბათ, გამოვაცხადებთ ამის შესახებ. ამ საკითხთან დაკავშირებით, რასაკვირველია, ჩემი მოსაზრებები მაქვს, მაგრამ ეს ისეთი მასშტაბის საკითხია, რომ არც ერთი კაცის და არც ხუთი კაცის მოსაზრებებით არ უნდა გადაწყდეს. ვფიქრობ, მომავალ წელს, 2017-ში, ამ მიმართულებით ცვლილებები გვექნება. მიმაჩნია, რომ დაფინანსების რამდენიმე ფონდი უნდა იყოს. ასეა უცხოეთის ბევრ ქვეყანაში — ცალკე ფონდია დაკავებული, მაგალითად, ეკონომიკის მიმართულების პროფესიების დაფინანსებით, ცალკე ფონდი აფინანსებს ქალებს გარკვეული მიმართულებებით, ცალკე ფონდი — მეცნიერებაში მიმავალ ახალგაზრდებს. პირადად მე, უფრო ეფექტურად მიმაჩნია, რომ დაფინანსების ერთი ფონდი და ერთი წესი კი არ იყოს, არამედ რამდენიმე. ამის მაგალითი დღესაც გვაქვს — ერთი არის წარჩინების ფონდი, რომელიც პირდაპირ ქულებზეა მიბმული, მეორეა სოციალური — 12 კატეგორია, რომელსაც გრანტებს ვაძლევთ, მათ შორის სოციალურად დაუცველებს. ორი ფონდი გვაქვს და ვფიქრობ, კიდევ უნდა დაემატოს, თუნდაც იმ მიმართულებებით, რაც ქვეყნისთვის პრიორიტეტულია ან ეკონომიკურად მომგებიანი.“
შეიცვლება თუ არა სტუდენტის სწავლის საფასურის ოდენობად დადგენილი 2250 ლარი, ამაზე განათლებისა და მეცნიერების მინისტრმა განაცხადა: „იმედია, შეიცვლება, მაგრამ არა მგონია, რომ დაფინანსება თანაბარი უნდა იყოს ყველა დარგის სტუდენტისთვის — არსებობს უფრო ძვირადღირებული დარგები და ნაკლებად ძვირადღირებული. თანაბარმა დაფინანსებამ გამოიწვია ის, რომ ვისი აღზრდაც ძვირი ჯდება, მათი რაოდენობა შემცირდა, ვისიც შედარებით იაფი — გაიზარდა. ამიტომ ეს უნდა შევცვალოთ. ცვლილება, სავარაუდოდ, 2017 წლის განმავლობაში გვექნება.
დაფინანსების ცვლილების და უმაღლესი განათლების რეფორმირების მიზანი სწორედ ის არის, რომ ზუსტად იმან ისწავლოს, ვინც უნდა სწავლობდეს უმაღლესში. დღეს თამასა საკმაოდ დაბალია და შესაცვლელია — უნდა ავამაღლოთ, შესაბამისად, უმაღლესში ის უნდა ხვდებოდეს, ვინც დარწმუნებული და ჩამოყალიბებულია, რომ აქვს სამკარისი უნარები უმაღლესი განათლების მისაღებად. ყველა დანარჩენს არანაკლებ მნიშვნელოვან ალტერნატივებს შევთავაზებთ პროფესიული უმაღლესის სახით, რომ დასაქმდნენ და ჰქონდეთ სრულფასოვანი და ღირსეული ცხოვრება.“
ლალი ჯელაძე
|