2016-11-17 კლასიკურ გიმნაზიაში განათლების საკითხებზე იმსჯელეს
საქართველოს პარლამენტის განათლების, მეცნიერებისა და კულტურის კომიტეტის თავმჯდომარის პოსტზე წარდგენილი მარიამ ჯაში მშობლიურ სკოლას, პირველ კლასიკურ გიმნაზიას ესტუმრა საქართველოს განათლებისა და მეცნიერების მინისტრის მოადგილესთან, ლია გიგაურთან ერთად.
გაიმართა საინფორმაციო-ანალიტიკური შეხვედრა სკოლის პედაგოგებთან, რომელიც, რამდენიმე საათის განმავლობაში, კითხვა-პასუხის რეჟიმში მიმდინარეობდა, განიხილეს ზოგადი განათლების მიმართულებით არსებული სიახლეები, ისაუბრეს გამოწვევებზე.
მასწავლებლებს, ასევე, შესაძლებლობა ჰქონდათ სასკოლო პროექტებთან დაკავშირებით გამოეთქვათ მოსაზრებები და სურვილები.
პარლამენტის წევრი დაინტერესდა მასწავლებლების სხვადასხვა საკანონმდებლო საკითხებთან დაკავშირებული მოსაზრებებითაც. სტუმრებმა განათლების სისტემის განვითარებასთან დაკავშირებით მომავლის ხედვები გაუზიარეს მასწავლებლებს.
ლია გიგაური: „განათლების სისტემის განვითარებისთვის დაგეგმილი ამბიციური პროექტების განხორციელებას, რა თქმა უნდა, სჭირდება საკანონმდებლო ბაზის ცვლილება და განვითარება. სწორედ ამიტომ, ჩვენ უკვე დავიწყეთ საკონსულტაციო შეხვედრები ქალბატონ მარიამთან და შევისწავლით, თითოეული კანონის ფარგლებში, რა ცვლილებები შეიძლება განხორციელდეს იმისათვის, რომ სისტემა გახდეს უფრო მოქნილი და, რაც მთავარია, წარმატებასა და მოსწავლეთა განვითარებაზე ორიენტირებული.
ერთ-ერთი მნიშვნელოვანი იქნება სქემასთან დაკავშირებული ცვლილებები. მოგეხსენებათ, რომ პილოტირების პროცესში წარმოიქმნა გარკვეული ბარიერები და პრობლემები, რომლებსაც საკანონმდებლო მოწესრიგება სჭირდება. დავიწყებთ, ასევე, პროფესიული და უმაღლესი განათლების ფარგლებში განსახორციელებელი ცვლილებების დაგეგმვას.“
მარიამ ჯაში: „ქართული ოცნების გუნდმა ჩემი კანდიდატურა წარადგინა განათლების, მეცნიერებისა და კულტურის კომიტეტის თავმჯდომარის პოზიციაზე და უფლებამოსილების დამტკიცებამდე, მაქსიმალურად მინდა გამოვიყენო აღნიშნული პერიოდი, რომ გავეცნო უშუალოდ როგორც ბაღების, ასევე ზოგადსაგანმანათლებლო სკოლების, უმაღლესი სასწავლებლების, სამეცნიერო წრეების მოსაზრებებს სისტემაში არსებულ მდგომარეობასა და გამოწვევებთან დაკავშირებით.
ბუნებრივია, სასიამოვნო იყო ჩემთვის, ზოგადსაგანმანათლებლო სკოლების სიტუაციის შესწავლა ჩემი მშობლიური პირველი საშუალო სკოლიდან (დღეს პირველი კლასიკური გიმნაზიიდან) რომ დაიწყო. ვხვდები ჩემს ყოფილ პედაგოგებს, ახალგაზრდა კადრებს და ვეცნობი სკოლებში არსებულ გამოწვევებს, რომელთა გარშემო სერიოზული მუშაობა მოგვიწევს, განათლების სამინისტროსთან მჭიდრო კოორდინაციით.
უკანასკნელ დღეებში არაერთი საკონსულტაციო შეხვედრა მქონდა განათლების სამინისტროს ხელმძღვანელობასთან. ჩემთვის ცნობილია სამომავლო ხედვები და სტრატეგიული მიმართულებები. ახლა მიმდინარეობს ანალიზისა და მოსაზრებების შეჯერების პერიოდი.“
მარიამ ჯაშმა მასწავლებლის პრესტიჟის ამაღლების პრიორიტეტულობაზე ისაუბრა. მისი თქმით, ამ მხრივ, ბევრი სამუშაოა ჩასატარებელი, რაც არა მხოლოდ მატერიალური მოტივაციის უზრუნველყოფას გულისხმობს, არამედ დამოკიდებულებების ცვლილებასაც.
„ვიდრე ჩემს ჩამოყალიბებულ ხედვას გავუზიარებ კოლეგებს როგორც საკანონმდებლო ორგანოში, ისე აღმასრულებელ ხელისუფლებაში, ვფიქრობ, უმთავრესია არსებული ვითარებისა და გამოწვევების შესწავლა. ყველა დონეზე მაქვს დაგეგმილი მჭიდრო კონსულტაციები და ინტენსიური დიალოგის რეჟიმი. განათლების მინისტრსა და მოადგილესთან ერთად, უკვე სამი დღეა, განვიხილავთ სამინისტროს ხედვას არსებულ გამოწვევებთან დაკავშირებით. უშუალოდ პედაგოგების მოსმენა ჩემთვის მნიშვნელოვანია.“
შეხვედრაზე მასწავლებლებმა ეროვნულ სასწავლო გეგმასა და სახელმძღვანელოებზეც ისაუბრეს და პრობლემურ საკითხად საბუნებისმეტყველო საგნების სახელმძღვანელოებით სწავლება დაასახელეს. მაგალითად, ფიზიკის სახელმძღვანელო მოიტანეს — აღნიშნული სახელმძღვანელოთი სწავლება შეუძლებელია, წიგნი ძირითადად ინტერაქტიულია, რაც საგნის სწავლას ართულებს და მოსწავლეებსაც აბნევს.
მასწავლებლების აზრს, საბუნებისმეტყველო საგნებში სახელმძღვანელოების სირთულესთან დაკავშირებით, მარიამ ჯაში, როგორც მშობელი, სავსებით დაეთანხმა და ახალი სახელმძღვანელოების შემუშავებასთან დაკავშირებით თავისი ხედვა გააცნო: „რადგან მცირერიცხოვანი ერი ვართ და ჩვენი ენა განსხვავდება სხვა საერთაშორისო ენებისგან, ვფიქრობ, გვაქვს ექსკლუზიური უფლება, ქართული ენისა და ლიტერატურის, საქართველოს ისტორიის არსებული სახელმძღვანელოების შეცვლისას, მთლიანად ჩვენს გამოცდილებას დავეყრდნოთ, უშუალოდ ჩვენი ისტორიისთვის დამახასიათებელი განსაკუთრებული მემკვიდრეობიდან გამომდინარე. მაგრამ, რაც შეეხება ზუსტ მეცნიერებებს, რომელთა სწავლების მეტად კარგი და დახვეწილი გამოცდილება არსებობს სხვა ქვეყნებში, შეიძლება გადმოვიღოთ ჩვენი ეროვნული გეგმებისთვის და არ შევქმნათ რაღაც ჰიბრიდული სახელმძღვანელოები, რომლებიც არც თანამედროვეობას შეესაბამება და პოსტსაბჭოთა მოდელის გაუგებარი ნაერთიცაა. მე ზუსტ მეცნიერებებში უკვე კარგად გამოცდილი სახელმძღვანელოების ადაპტირებას დავუჭერდი მხარს.“
იმ საგნების სახელმძღვანელოებზე მუშაობა, რომელთა მომზადებაც მთლიანად „ქართულ გამოცდილებაზე შეიძლება დამყარდეს“ (მაგალითად, ქართული ენა და ლიტერატურა, საქართველოს ისტორია), მარიამ ჯაშის აზრით, საზოგადოებასთან, არასამთავრობო სექტორსა და ეკლესიასთან კონსულტაციების შედეგად უნდა ხდებოდეს.
„უშუალოდ საქართველოსთვის ექსკლუზიური პროგრამები, რომელთა შემუშავებაც ჩვენი პრეროგატივაა, საზოგადოების, არასამთავრობო სექტორის ასევე, ხაზს გავუსვამ (შეიძლება ეს არადადებითად შემიფასონ საერთაშორისო ექსპერტებმა), მაგრამ აუცილებლად საქართველოს ეკლესიასთან კონსულტაციით უნდა შეჯერდეს. საქართველოს ისტორიაში იმდენად დიდი როლი ჰქონდა სარწმუნოებას და ეკლესიას, რომ არ გვაქვს უფლება, კონსულტაციისა და რჩევის დონეზე მაინც არ მივმართოთ მათ სასწავლო პროგრამების შემუშავებისას. რასაკვირველია, იმ პროგრამებისთვის, რომლებმაც შესაძლოა საზოგადოებისთვის კითხვის ნიშნები გააჩინოს.“
მის გამოსვლას, რომელიც მართლმადიდებლურ ეკლესიასთან კონსულტაციების საჭიროებაზე მიუთითებდა არასამთავრობო სექტორიდან ნეგატიური რეაქცია მოჰყვა. უფლებადამცველებმა განათლების კომიტეტის მომავალ თავმჯდომარეს სახელმწიფოს და რელიგიის გამიჯვნისკენ მოუწოდებენ.
საგანმანათლებლო პროცესის სეკულარიზაციის აუცილებლობაზე საუბრობენ ადამიანის უფლებების სწავლებისა და მონიტორინგის ცენტრში. თამთა მიქელაძის აზრით, დღეს საზოგადოებაში არსებული არატოლერანტული გარემო არასწორი განათლების პოლიტიკის შედეგია. პრობლემიდან მთავარ გამოსავალს სახელმწიფო სტრუქტურების მუშაობიდან რელიგიის მკაფიოდ გამიჯვნაში ხედავს: „ეს არის სახელმწიფოს მხრიდან, პოლიტიკური ელიტის მხრიდან ეკლესიის მიმართ ლოიალური დამოკიდებულების დადასტურების კიდევ ერთი მცდელობა. სინამდვილეში, ეს ნიშნავს იმას, რომ ხელისუფლება ვერ იაზრებს იმ რეალურ გამოწვევებს, რომლებიც განათლების სისტემაში აქვს. სწორედ ეთნორელიგიურ ნაციონალიზმზე დაფუძნებული განათლების სისტემა არის ის სისტემა, რომელიც ძალადობას, ქსენოფობიას, შეუწყნარებლობას ამკვიდრებს ჩვენს საზოგადოებაში.“
განათლების პოლიტიკის დაგეგმვისა და მართვის საერთაშორისო ინსტიტუტის აღმასრულებელი დირექტორი რევაზ აფხაზავა განმარტავს, რომ რელიგიისა და სახელმწიფო სტრუქტურების საქმიანობა საჯარო განხილვის ფარგლებს არ უნდა გასცდეს. „ეს რეალურად უნდა იყოს საჯარო განხილვები, მაშინ არანაირ პრობლემას არ წარმოადგენს, ეს არ უნდა იყოს უხეში ჩარევა სამინისტროს საქმიანობაში. გვახსოვს, რა დონით და რა ინტენსიობით ერთვებოდნენ სასულიერო პირები სამოქალაქო განათლების საკითხების განხილვაში და რამხელა პრობლემა შეექმნა ჩვენი მოსწავლეებისთვის უმნიშვნელოვანესი საგნის დანერგვას სკოლებში.“
მარიამ ჯაში საკუთარი განცხადების არასწორ ინტერპრეტირებაზე მიანიშნებს: „ჩემი კომენტარი, როგორც ქართულ ეკლესიასთან, ასევე სხვა აღმსარებლობის კონფესიების წარმომადგენლებთან დაკავშირებით, გაზვიადებული იყო, ჩვენ საუბარი გვქონდა საკონსულტაციო პროცესზე და არავითარ შემთხვევაში — გადაწყვეტილების მიღების პროცესში მონაწილეობაზე.“
საინფორმაციო-ანალიტიკური შეხვედრები მასწავლებლებთან მომავალშიც გაგრძელდება.
|