2016-06-02
სამოქალაქო განათლების პედაგოგთა ფორუმი
მაკა ყიფიანი
28 მაისს, ექსპო ჯორჯიაში, სამოქალაქო განათლების პედაგოგთა წლიური ფორუმის გამოფენა-კონფერენცია გაიხსნა. ფორუმის მონაწილეები, საქართველოს ყველა რეგიონის 400 პედაგოგი, სამოქალაქო განათლების სფეროს სიახლეებს გაეცნო და პედაგოგთა ხელშეწყობით განხორციელებული პროექტების ამსახველი ფოტოგამოფენა დაათვალიერა.
კონფერენციის მონაწილეებს მიესალმნენ საქართველოს განათლებისა და მეცნიერების მინისტრის მოადგილე ლია გიგაური, სამოქალაქო განათლების პროგრამის დირექტორი მარინა უშვერიძე, აშშ საერთაშორისო განვითარების სააგენტოს წარმომადგენელი ნინო ბუაჩიძე და მასწავლებელთა პროფესიული განვითარების ეროვნული ცენტრის დირექტორი გიორგი მაჩაბელი.
სამოქალაქო განათლების პედაგოგთა ფორუმის მონაწილეებს საშუალება ჰქონდათ მიეღოთ ინფორმაცია მასწავლებელთა საქმიანობის დაწყების, პროფესიული განვითარებისა და კარიერული წინსვლის სქემის და მათთვის საინტერესო სხვა რესურსების შესახებ.
კონფერენციის დასასრულს გაიმართა სამოქალაქო განათლების წლის საუკეთესო პედაგოგთა დაჯილდოების საზეიმო ცერემონიალი, მათ გადაეცათ ფორუმის მიერ დაწესებული საპატიო ჯილდო — მადლობის სიგელი და „სამოქალაქო განათლების წლის საუკეთესო პედაგოგის“ პრიზი.
კონფერენცია-გამოფენა ორგანიზებული იყო სამოქალაქო განათლების პროგრამის „მომავლის თაობა“ ფარგლებში. პროგრამას ახორციელებს ორგანიზაცია PH International კონსულტაციისა და ტრენინგის ცენტრთან, სამოქალაქო განათლების პედაგოგთა ფორუმთან და რეგიონულ არასამთავრობო ორგანიზაციებთან პარტნიორობით. პროგრამის ფინანსურ მხარდაჭერას უზრუნველყოფს აშშ საერთაშორისო განვითარების სააგენტო (USAID), მხარდამჭერი — საქართველოს განათლებისა და მეცნიერების სამინისტრო.
მარინა უშვერიძე, სამოქალაქო განათლების პროგრამის „მომავლის თაობა“ დირექტორი: „სამოქალაქო განათლების პირველი კონფერენცია-გამოფენა 2012 წელს ჩატარდა, დღეს რიგით მეხუთე წლიური კონფერენციაა. მონაწილეთა რიცხვი წლიდან წლამდე საგრძნობლად გაზრდილია. წელს, ღონისძიებაში 400-მდე პედაგოგი მონაწილეობს. კონფერენცია მნიშვნელოვანი, საინტერესო და მამოტივირებელია პედაგოგებისთვის. გამოფენაზე წარმოდგენილია მრავალფეროვანი პროექტები, რომლებიც მოსწავლეებმა სამოქალაქო განათლების პედაგოგების ხელშეწყობით განახორციელეს სკოლის და საზოგადოების საკეთილდღეოდ. ყველა პროექტს კონკრეტული შედეგი აქვს. აღსანიშნავია, რომ პროგრამა საქართველოს ყველა რეგიონში 480 სკოლასთან მუშაობს, რათა გაუმჯობესდეს სკოლებში სამოქალაქო განათლების სასწავლო პროგრამა და მოხდეს მოსწავლეების მიერ, სამოქალაქო განათლების გაკვეთილზე მიღებული ცოდნის პრაქტიკაში გამოყენება; ახალგაზრდებში სამოქალაქო განათლების გაძლიერების გზით ხელი შეეწყოს სამოქალაქო საზოგადოების როლის ზრდას გამჭვირვალე და ანგარიშვალდებული მმართველობისათვის. მთელი წლის განმავლობაში, პროექტის ფარგლებში, ჩატარდა ტრენინგები, სადისკუსიო შეხვედრები, მოეწყო მრგვალი მაგიდები სამოქალაქო განათლების პედაგოგებისთვის აქტიური საკითხების შესახებ, გაიმართა მოსწავლეთა შეხვედრები კომპეტენტურ ადამიანებთან, 80-მდე მოსწავლე მონაწილეობდა საზაფხულო ბანაკებში და სხვ. წინ კიდევ ბევრი საინტერესო და მნიშვნელოვანი ეტაპი გვაქვს გასავლელი. დღევანდელ დღეს, სხვადასხვა ნომინაციაში, 34 პედაგოგი დაჯილდოვდება. ვულოცავ მათ ღირსეულ წარმატებას“.
ლია გიგაური, საქართველოს განათლებისა და მეცნიერების მინისტრის მოადგილე: „სასიხარულოა, რომ ტრადიციად დამკვიდრდა და უკვე მეხუთე წელია, ვხვდებით სამოქალაქო განათლების პედაგოგებს, რომლებიც ემსახურებიან ჩვენი მომავალი თაობების, მომავალი საზოგადოების ღირებულებების, დემოკრატიის ხარისხის, ფასეულობების ფორმირებას. ეს ძალზე მნიშვნელოვანი მისიაა — მომავალ თაობას ვასწავლით დემოკრატიას, ვასწავლით საკუთარ უფლებებსა და პასუხისმგებლობას. აღსანიშნავია, რომ სწავლება გადავიდა უფრო მაღალ სტადიაში, რადგან გახდა პრაქტიკაზე, პროექტებსა და აქტივობებზე ორიენტირებული. პროექტები, რომლებიც პროგრამის ფარგლებში ხორციელდება, სოციალურ აქტივობაზეა ორიენტირებული, რაც საზოგადოების სოციუმის განვითარებას ემსახურება. ჩვენ ვხედავთ, წლიდან წლამდე, როგორ ვითარდება მეთოდების გამოყენება საკლასო ოთახებში და იხვეწება სასწავლო სტრატეგიები, რამდენად აქტიური ხდებიან მოსწავლეები და თავად მასწავლებლები. სამოქალაქო განათლება მხოლოდ საგანი არ არის, ეს ცნობიერების ფორმირებაა, მოქალაქეების გააქტიურება, მომავალი საზოგადოების ღირებულებების ფორმირება სწორედ იმ მიმართულებით, რომელიც ყველა ჩვენგანს ხვალ კიდევ უფრო მეტად დაგვაფიქრებს. ჩვენ ვზრდით ახალ საზოგადოებას. სამოქალაქო განათლებით იწყება მომავალი დემოკრატების სამყარო საქართველოში. ვულოცავ დღევანდელ დღეს ყველა პედაგოგს და წარმატებებს ვუსურვებ მათ“.
გიორგი მაჩაბელი, მასწავლებელთა პროფესიული განვითარების ეროვნული ცენტრის დირექტორი: „ჩემთვის დიდი პატივია სამოქალაქო განათლების პედაგოგთა ფორუმში მონაწილეობა. წლევანდელი სასწავლო წელი, საკმაოდ საინტერესოდ მიმდინარეობდა. მოგეხსენებათ, დავიწყეთ ახალი სქემა — მასწავლებელთა პროფესიული განვითარების და კარიერული წინსვლის. ეს პერიოდი ყველამ საკმაოდ წარმატებით გავიარეთ. პირველი აპრობაციის წელი მთავრდება, ყურადღებით ვაკვირდებოდით თითოეულ პროცესს, რომელიც წლის განმავლობაში მიმდინარეობდა. სიამაყით მინდა ვთქვა, რომ სამოქალაქო განათლების პედაგოგები ერთ-ერთი მოწინავენი იყვნენ ამ პროცესებში. ვულოცავ მათ მიღწეულ წარმატებებს. სამოქალაქო განათლების განვითარება რამდენად მნიშვნელოვანია, ეს ყველამ კარგად დავინახეთ. მით უმეტეს მაშინ, როცა საქართველო გადამწყვეტ ფაზაში შედის ევროინტეგრაციის კუთხით და ჩვენი მისწრაფება ევროპულ საგანმანათლებო სივრცეში ამ კუთხითაც იქნება დაფასებული, რაც ძალზე მნიშვნელოვანია“.
ნინო ნიპარიშვილი, კასპის სკოლა-გიმნაზიის სამოქალაქო განათლების მასწავლებელი: „სამოქალაქო განათლებას სკოლაში ორი წელია ვასწავლი, მას შემდეგ, რაც ჩვენი სკოლა ჩაერთო პროგრამაში „მომავლის თაობა“. დღევანდელ გამოფენაზე წარმოდგენილ ბანერზე ასახულია ჩვენი სკოლის აქტივობები. პროგრამის ფარგლებში მოვიპოვეთ მცირე გრანტი პროექტის „წარსულის კვალდაკვალ“ განსახორციელებლად. პროექტი ეხებოდა საბჭოთა კასპელ რეპრესირებულებს და მისი მიზანი იყო ახალგაზრდების ინფორმირება საბჭოთა კავშირის დროს მომხდარი რეპრესიების შესახებ. აღსანიშნავია, რომ ჩვენი სკოლა ყოფილი საბჭოთა მილიციის შენობაშია განთავსებული და იმ ადგილას, ნულ სართულზე, სადაც საკნები იყო, კასპელ რეპრესირებულთა მუზეუმი გავხსენით. პროექტს ძალიან დიდი გამოხმაურება მოჰყვა“.
ინგა აბდუშელიშვილი, თბილისის 150-ე საჯარო სკოლის ისტორიისა და სამოქალაქო განათლების მასწავლებელი, სამოქალაქო კლუბის „მომავლის ელჩები“ ხელმძღვანელი: „პროგრამის ფარგლებში გავიმარჯვეთ მცირეგრანტიან პროექტში, მოვიპოვეთ დაფინანსება, რომლითაც გადავწყვიტეთ, სკოლის ტერიტორიაზე არსებული აუთვისებელი სივრცე რეკრეაციულ ზონად გადაგვექცია — დავასუფთავეთ, გავამწვანეთ და სათანადოდ მოვაწყვეთ. სკვერის კეთილმოწყობაში დახმარება გაგვიწია სკოლის დირექციამ, მშობლებმა. მოსწავლეებს და მასწავლებლებს საშუალება აქვთ, ეს ადგილი გამოიყენონ სხვადასხვა ღონისძიებებისა და ღია გაკვეთილების ჩასატარებლად“.
|
