2014-11-27 ჩემთვის ცხოვრება აწმყოა, ცოდნა — დღესასწაულია... თანამედროვე განათლება ძნელად ჯდება ამ მოდელში... ცირა ბარბაქაძე ილიას სახელმწიფო უნივერსიტეტში სემიოტიკის კვლევით ცენტრს ხელმძღვანელობს, რომლის მიზანია უნივერსიტეტში და, ზოგადად, ქართულ ჰუმანიტარულ სივრცეში, ახალი სამეცნიერო მიმართულების შემოტანა და ამ მიმართულებით კვლევის გააქტიურება. მისი სალექციო კურსები ძალიან საინტერესო თემებს მოიცავს — რა არის პოეზია, პოეტები და მუზები; მეტაფორების სამყარო და სამყარო მეტაფორებში; რიტორიკა, სემიოტიკა. სტუდენტების საყვარელი ლექტორი ინტერვიუში თავად ისაუბრებს ამ და სხვა მიმართულებებზე.
— მრავალმხრივ საინტერესო ადამიანი ხართ, ამიტომ მიჭირს თემის არჩევა, რომლითაც საუბარს დავიწყებთ. მოდი, სემიოტიკით დავიწყოთ — პირველ რიგში, რა არის სემიოტიკა? „შეხედეთ სამყაროს სემიოტიკის თვალით და აღმოაჩინეთ საკუთარი თავი მრავალ განზომილებაში“ — ეს თქვენი სიტყვებია და გვირჩიეთ, ეს როგორ გავაკეთოთ?
— იმ მეცნიერების შესწავლა, რომელშიც მუშაობ, არ სრულდება... ჩვენ რომ ზუსტად ვიცოდეთ პასუხი კითხვაზე: რა არის სემიოტიკა? — მაშინ აღარც გამოვიკვლევდით. მე შემიძლია გითხრათ, რატომ გახდა სემიოტიკა აქტუალური. ამის მრავალი მიზეზი არსებობს: ჯერ კიდევ სოსიური წერდა, რომ მომავალში იარსებებს მეცნიერება — სემიოლოგია — რომელშიც ლინგვისტიკა იქნება ერთი კერძო დარგი. სემიოტიკა ერთგვარად გლობალური მეცნიერებაა, ყველა მეცნიერების საერთო ენა... ეს ახსნა უკვე მეტაფორულია, მაგრამ ამას ვერ გავექცევით, საერთოდაც, ენა და მეტყველება უკვე აზრის მეტაფორაა...
ჩვენ ვცხოვრობთ ფორმათა (საგანთა) სამყაროში, სადაც ყველაფერი განიხილება, როგორც ნიშანი (როგორც ენა): დაწყებული შუქნიშნებიდან ფუტკართა ნიშნურ ქცევებამდე, მათემატიკურ-ლოგიკური ენიდან ფერწერულ ხატებამდე... ანუ: სამყარო ერთი დიდი ტექსტია, განსხვავებული ენებით სავსე. იმისათვის, რომ ავხსნათ სამყარო და საკუთარი თავი, განსხვავებულ ნიშანთა სისტემები უნდა შევისწავლოთ. შესწავლის პრობლემა იმაში მდგომარეობს, რომ ბევრი „ენა“ ჯერაც არ არის აღმოჩენილი და აღმოჩენის შემთხვევაშიც, აუცილებელი იქნება სისტემაში მოყვანა, სხვაგვარად ვერ წაიკითავ ან არასწორად წაიკითხავ... განსაკუთრებით ინტენსიურად მიმდინარეობს სემიოტიკური კვლევები ხელოვნებისა და სოციოკულტურულ სფეროებში: დღეს სემიოტიკა შეისწავლის არქიტექტურის, მოდის, რეკლამის, რიტუალის ენას...
ენა ნიშნურ სისტემებს შორის ყველაზე სრულყოფილი სისტემაა, ამიტომ ამ მოდელის გადატანა და შესწავლა ხდება სხვა „ენებზე“. ასეთ შემთხვევაში, ლინგვისტური ენა გამოდის საფუძველი, სწორედ ამას გულისხმობდა ემილ ბენვენისტი, როდესაც წერდა, რომ „ენა არის ყველა სხვა სისტემის ინტერპრეტატორი“. საინტერესოა აგრეთვე პოლ რიკიორის განმარტებაც: სემიოტიკა სხვა არაფერია, თუ არა ყოფიერების შემეცნების განუწყვეტელი პროცესი, „განუწყვეტელი სვლა აშკარა აზრიდან ფარული აზრისკენ“.
ამ განმარტების მიხედვით, სემიოტიკის მიზანი ყოფილა ნიშნების აღმოჩენა, შესწავლა, ინტერპრეტაცია და მათი საშუალებით მთავარი აზრის მიგნება... უნიშნობამდე, უფორმობამდე მისვლა... სადაც სიტყვა წყვეტს სიტყვად არსებობას, ნიშანი წყვეტს ნიშნად არსებობას, ფორმა წყვეტს ფორმად არსებობას.... სადაც ყველაფერი განუმარტავია.... ფორმათა იქით სემიოტიკა წყვეტს სემიოტიკად არსებობას...
რაც შეეხება საკუთარი თავის მრავალ განზომილებაში აღმოჩენას... ვფიქრობ, ადამიანიც, საბოლოო ჯამში, ნიშანია... თითოეულ ადამიანს აქვს თავისი სალექსიკონო მნიშვნელობაც და კონოტაციური მნიშვნელობებიც... ისიც შეიძლება განვიხილოთ: სინტაქტიკურ, სემანტიკურ და პრაგმატიკულ დონეებზე... აი, მაგალითად, როდესაც კონტექსტის მიხედვით, ადამიანი განსხვავებულად გამოიყურება (როგორც სიტყვა) და ხშირად ისეთ თვისებას ან ქცევას აღმოაჩენს საკუთარ თავში, რომელიც მანამდე არ ჰქონდა ან არ ეგონა, რომ ჰქონდა... ამას სემიოტიკაში სემიოზისის პროცესი ეწოდება. იმის მიუხედავად, რომ ნიშანს აქვს მნიშვნელობა, ის არასდროს არ ქმნის ჩაკეტილ სისტემას. ასევე ადამიანი არ არის (არ შეიძლება იყოს) ერთფეროვანი და ერთგანზომილებიანი... კონტექსტები განაპირობებენ ჩვენს ახალ მნიშვნელობებს, კონტექსტებს ჩვენი ფუნქციები განაპირობებს... ასე რომ, ცვალებადები ვართ ერთი ფორმის ფარგლებშიც და მუდმივი ტრანსფორმაცია ჩვენი ახალი განზომილებების წყაროა... ამით ვხდებით საინტერესოები... მეტაფორულად შეიძლება ვთქვათ, რომ ადამიანი მრავალფოკუსიანი არსებაა, ის შეიძლება განსხვავებული იყოს იმის მიხედვით, რა მანძილიდან ვუყურებთ, რას ვაკვირდებით, ვის გვერდითაა და რას აკეთებს... ასევე შეგვიძლია შევხედოთ საკუთარ თავსაც და როგორც დაინახავთ, გამიზიარეთ...
— ილიას უნივერსიტეტში შეიქმნა სემიოტიკის ცენტრი და დამოუკიდებელ დისციპლინად ისწავლება, თქვენივე რედაქტორობით გამოიცემა ჟურნალი „სემიოტიკა“, სადაც იბეჭდება მკვლევართა ნაშრომები. რა თემები მოხვდა კვლევების არეალში და როგორია სტუდენტთა ინტერესი ამ მეცნიერებისადმი?
— საერთოდ, სიახლე ინტერესს ყოველთვის იწვევს, თუნდაც ის ფაქტი, რომ გაჩნდა კითხვა: რა არის სემიოტიკა..? რომელზეც პასუხი არც ცალსახაა და არც საბოლოო, — უფრო მეტი ინტერესის წყაროა... სემიოტიკა ისეთი სივრცეა, რომელშიც თავისუფლად შეგიძლია შენი სივრცე შემოსაზღვრო და იკვლიო... ამით ის საინტერესოა. წელს სემიოტიკის ჯგუფის მსმენელები თეატრის სემიოტიკას იკვლევენ, სწავლობენ, სპექტაკლებს აკვირდებიან ამ მიმართულებით, განიხილავენ და პატარა კვლევით პროექტებს წერენ... მომავალ სეზონზე სხვა თემა იქნება შეთავაზებული და ასე... არასდროს მოიწყენენ, რადგან მრავალფეროვანი მეცნიერებაა...
დღემდე გამოცემულია სამეცნიერო ჟურნალ „სემიოტიკის“ 14 ნომერი. თემატიკა განსხვავებულია: ენისა და ლიტერატურის სემიოტიკა, სემიოტიკის თეორია და ისტორია, კულტურის სემიოტიკა — ეს ის მიმართულებებია, რომლებიც ჟურნალშია წარმოდგენილი. უფრო მეტადაც ვკონკრეტდებით და სემიოტიკის კონფერენციები უფრო თემატურია. ერთ კონცეპტს იკვლევს: ენათმეცნიერი, ლიტერატორი, რელიგიათმცოდნე, კულტუროლოგი და სხვა... ასე წარმოდგენილი კვლევა აერთიანებს განსხვავებული დარგის მეცნიერებს ერთ ხედვაში და ძალიან საინტერესოა... მაგალითად, სემიოტიკის კონფერენციებზე განხილული კონცეპტებია: ზღვა, გზა, სივრცე, დრო, მეტაფორა... მომავალ კონფერენციაზე ქალაქის სემიოტიკა იქნება წარმოდგენილი.
სემიოტიკის კვლევითი ცენტრი აგრეთვე ამზადებს და გამოსცემს სერიას — სემიოტიკური თარგმანები. სერიის მიზანია ამ დარგში საინტერესო და პოპულარული ნაშრომების თარგმნა-გამოცემა სტუდენტებისთვის და ყველა დაინტერესებული პირისთვის. ილიას სახელმწიფო უნივერსიტეტმა უკვე გამოსცა ამ სერიის პირველი ნაშრომები: როლან ბარტის „წერის ნულოვანი დონე“, იური ლოტმანის „მოაზროვნე სამყარო შიგნით“, ხოსე ორტეგა-ი-გასეტის „ადამიანი და ხალხი“.
— ილიაუნიში თქვენ სტუდენტების საყვარელი ლექტორი ხართ, როგორ ახერხებთ ასეთ ურთიერთობებს და როგორ დაახასიათებთ სტუდენტებს, თაობას, რომელთანაც ყოველდღიური ურთიერთობა გაკავშირებთ?
— სიყვარული სადღაც ცალკე არ არსებობს... ის ყველაფრის ფონია... ცოდნის გადაცემისას სიყვარული ცოდნას არ გამოეყოფა და არ ორთქლდება... ასე რომ, ამას ყველა გრძნობს: როცა გიყვარს და ისე ელაპარაკები... სიყვარული სულის მდგომარეობაა და მას მიზეზი ან თვისება არ სჭირდება, რომ გამოვლინდეს... ჩემი და სტუდენტების სიყვარული ორმხრივია...
ვფიქრობ, რომ საუკეთესო თაობა მოდის... ადვილად შეუძლიათ სტერეოტიპებისგან გათავისუფლება, შემოქმედებითები არიან და მე მიადვილდება მათთან დიალოგი...
— საბაკალავრო კურსი პოეზიაში — გვიამბეთ ამის შესახებაც.
— საბაკალავრო კურსი „რა არის პოეზია, პოეტები და მუზები“ — არჩევითი კურსია ბაკალავრებისთვის. კურსი მალევე გახდა ძალიან პოპულარული თავისი ფორმატის გამოც. ავტორებთან ცოცხალი შეხვედრები და დიალოგი — კურსის ნაწილია. ამ გზით სტუდენტები უკეთ ეცნობიან თანამედროვე პოეზიას. კურსის მიზანია, სტუდენტებმა პოეზიის „კითხვა“ და გაგება ისწავლონ. ამ კურსს შემოქმედი სტუდენტები ირჩევენ, ამიტომ ყოველთვის საინტერესოა ასეთ ჯგუფებთან მუშაობა.
— თქვენი ინიციატივით, ილიაუნიში დაარსდა პოეზიის კლუბი. რა ხდება თქვენი შეხედვით, თანამდეროვე პოეზიაში, რა სიახლე მოაქვს ამ თაობას პოეზიაში?
— პოეზიის კურსის ფარგლებში დაარსდა პოეზიის კლუბიც. კლუბს არ ჰყავს მუდმივი წევრები, კურსის ცვლასთან ერთად ისინიც იცვლებიან, მაგრამ უცვლელია იდეა — პოეზიის სიყვარული და პოეზიით სამყაროს შემეცნება. ბევრი ორიგინალური და კრეატიული აქცია ჩატარდა კლუბის ინიციატივით.
თანამედროვე პოეზია პოსტმოდერნისტული ეპოქის პროდუქტია და ის არის ისეთივე მოზაიკური, როგორც თავად პოსტმოდერნი... ყველა ტენდენცია თითქოს ერთად იყრის თავს, ვგულისხმობ თანამედროვეობას... გამოვლენილ ინდივიდუალიზმში ბევრი საინტერესო ფორმა და ფორმატია, რომელიც პოეტურ აზრს კიდევ უფრო მრვალფეროვნად წარმოადგენს...
— საინტერესოა თქვენი აზრი დღევანდელი განათლების სისტემის შესახებ — ალბათ, ნაფიქრი გაქვთ. პირველ რიგში, რა არის ის ხარვეზი, რაც ჩვენს განათლების სისტემას აქვს ზოგად ან უმაღლეს საფეხურებზე?
— არ ვიცი, რამდენად არის ხარვეზი, მაგრამ თანამედროვე განათლების სისტემა არ მომწონს ერთი ტენდენციის გამო, რომელიც უნივერსალურია, — ეს არის ერთგვარი „ძალადობის“ ელემენტები, რაც განათლების პროცესს რუტინად აქცევს, ამის გამო ცოდნის მიღება არ არის დღესასწაული, ისეთი „იძულებაა“, რომელიც „კენწეროში უნდა გატკბილდეს“. ეს დამოკიდებულება განათლებას უკარგავს პროცესით ტკბობის სიამოვნებას... ჩემთვის ცხოვრება აწმყოა, ცოდნა — დღესასწაულია... თანამედროვე განათლება ძნელად ჯდება ამ მოდელში...
გახსოვთ ის ფილმი „დead ჵoets Society“ („მკვდარი პოეტების საზოგადოება”) და რობინ უილიამსის გმირი მისტერ კიტინგი, ლიტერატურის მასწავლებელი, კონსერვატულ სასწავლებელში... კიტინგი ბავშვებს დაფიქრებისკენ, საკუთარი სტილის აღმოჩენისკენ უბიძგებს ლიტერატურის გაკვეთილებზე, პოეზიის მშრალი ანალიზის ნაცვლად ასწავლის, როგორ შეიგრძნონ პოეზია. მოულოდნელად მაგიდაზე ამხტარი მასწავლებელი მოსწავლეებს ეკითხება:
— აბა, ვინ მეტყვის, მაგიდაზე რატომ ვდგავარ?
— უფრო მაღალი რომ გამოჩნდეთ, — პასუხობს ერთი...
— მაგიდაზე იმიტომ ვდგავარ, რომ საკუთარ თავს შევახსენო, მოვლენებს ყოველთვის განსხვავებულად უნდა შევხედოთ... იცით? სამყარო აქედან ძალიან სხვანაირად ჩანს...
ადმინისტრაციის წარმომადგენელს, რომელმაც აითვალწუნა მისტერ კიტინგი ამგვარი მეთოდების გამო, ის პასუხობს: „ყოველთვის ვფიქრობდი, განათლების იდეა საკუთარ თავზე დაფიქრება იყო...“
— როგორ უნდა გახდეს განათლების სისტემა ისეთი, როგორზეც თქვენ გვიყვებით?
— კლიმატის შეცვლით და კონტროლით, — როგორც ამას ამბობს თანამედროვე განათლების მკვლევარი კენ რობინსონი.
ერთ-ერთი ლექციის დროს (როგორ დავაღწიოთ თავი განათლების სიკვდილის ხეობას) ასეთ არაჩვეულებრივ ამბავს ჰყვება და საინტერესო მეტაფორას ქმნის:
ჩემი საცხოვრებლიდან არც ისე შორს, არის ადგილი, სახელად „სიკვდილის ხეობა“, ეს ყველაზე ცხელი და მშრალი ადგილია ამერიკაში. იქ არაფერი იზრდება, არაფერი იზრდება, რადგან არასდროს წვიმს. 2004 წლის ზამთარში მოულოდნელად იწვიმა ხეობაში, მსხვილი წვეთები ცვიოდა მცირე ხნით. 2005 წლის გაზაფხულზე სასწაული მოხდა: სიკვდილის ხეობის მთელი მიდამო დაიფარა ყვავილებით. რას ამტკიცებს ეს? ეს ამტკიცებს, რომ „სიკვდილის ხეობა“ არ არის მკვდარი, უბრალოდ, თვლემს. ზუსტად ზედაპირის ქვეშ არის შესაძლებლობების მარცვლები, რომლებიც ელოდებიან შესაბამის პირობებს, რომ გამოჩნდნენ და ორგანული სისტემით თუ პირობები ზუსტია, სიცოცხლე გარდაუვალია, ის ყოველთვის მიმდინარეობს... იღებ ერთ ადგილს: სკოლას, უბანს... ცვლი პირობებს, აძლევ განსხვავებულ საშუალებებს და განსხვავებულ მოლოდინს, სთავაზობ მოქმედების თავისუფლებას, ეხმარები, იყვნენ ინოვაციურები იმაში, რასაც აკეთებენ და სკოლები, რომლებსაც აკლდა ეს, ივსებიან სიცოცხლის წყურვილით.
კენ რობინსონის მიხედვით, ჭეშმარიტი როლი განათლების ლიდერობაში არ არის და არც უნდა იყოს ბრძანება და კონტროლი. ლიდერობის მთავარი როლი არის კლიმატის კონტროლი, შესაძლებლობების კლიმატის შექმნა.
— სურვილი მაქვს, ჩვენი ინტერვიუ მხოლოდ ამით არ შემოიფარგლოს. დასაწყისში აღვნიშნე კიდევაც, რომ იმდენად მრავალმხრივად საინტერესო ადამიანი ხართ, ერთ ინტერვიუში, ალბათ, შეუძლებელია ყველაფერზე ვისაუბროთ. თუმცა პოეზიას გვერდს ვერ ავუვლით. ოთხი პოეტური კრებული — „ლექსები“, „გამოაღეთ სარკმელი“, „დუმილის ა(მ)ბები და „უცხო ქალაქი“ — ეს თქვენი შემოქმედებითი ნამოღვაწარია. „სისადავე, გულწრფელობა და ლირიზმი“ — ეს თქვენი პოეზიის მახასიათებლებია. რა არის ეს სამყარო თქვენთვის?
— პოეზიის სამყარო ერთ-ერთი განზომილებაა, რომელშიც პერიოდულად ვიხიზნები და იმ სამყაროდან აღვიქვამ ყველაფერს პოეზიის რაკურსით... პოეზია ჩემთვის სულის ამინდია, განსაკუთრებული მეტეოროლოგიური პირობებია...
— როცა თქვენთან ინტერვიუსთვის ვემზადებოდი, ფეისბუქის გვერდზე თქვენი ახალი ლექსი დაიდო — „ამხილეთ ერთმანეთი“, რომელიც მთავრდება სიტყვებით: „ამხილეთ ერთმანეთი სიყვარულში“. ეს სიტყვები ერთგვარ მოწოდებად აღვიქვი საზოგადოებისადმი, რომელიც დღეს, სამწუხაროდ, აგრესიის და სიძულვილის ენით უფრო საუბრობს. არის თუ არა ჩვენი მთავარი პრობლემა დღეს სიყვარულის დეფიციტი?
— დიახ, სწორად მიხვდით... ზოგჯერ ფეისბუკის მთავარ გვერდს რომ თვალს გადავავლებ ხოლმე, ყვირილი მინდება და მერე ამ ემოციას პერიოდულად სტატუსად გარდავქმნი... ეგ ლექსი სტატუსად იყო გათვალისწინებული და მერე პოეზიის ფორმა მიიღო...
ადამიანებს მხოლოდ სიტყვებით და ცნებებით უყვართ ერთმანეთი და მერე ამ სიყვარულის სახელით ისეთებს სჩადიან, სიყვარულისგან რომ ძალიან შორსაა... სიყვარულის დეფიციტი იმიტომ არის, რომ ადამიანის ეგო უსაშველოდ გაიზარდა და სულის სიხშირეები ჩაახშო... მხოლოდ სულს უყვარს უპირობოდ... ეგოს სიყვარული პირობითია...
— თუ არ გადაგღალეთ, მინდა კიდევ ერთ თემასაც შევეხოთ. თქვენი დამოკიდებულება ფოტოგრაფიისადმი, რომელიც, ვფიქრობ, გატაცებას უკვე გასცდა. როდის დაინტერესდით ფოტოგრაფიით? როგორც ვიცი, უფრო ხშირად იღებთ პეიზაჟებს (ცნობილი პროექტი „ანარეკლი“), გქონდათ გამოფენაც. თუ გაქვთ საოცნებო ადგილი, რომელსაც გადაიღებდით ან საოცნებო ფოტოპროექტი, რომლის განხორციელებასაც გეგმავთ. რა არის თქვენთვის ფოტოგრაფია — აზრის გამოხატვის ერთ-ერთი საშუალება?
— ფოტოგრაფიის უნიკალური თვისება, სიტყვების გარეშე გამოხატოს აზრი და ემოცია — ჩემთვის ძალიან მომხიბვლელია... გამოხატვის ვიზუალური ფორმატია... ჩვენი საუკუნე განსაკუთრებულად არის ორიენტირებული ვიზუალურ ფორმებზე... რადგან დრო ძალიან აჩქარდა, აჩქარებულია ცხოვრების რიტმი, ადამიანი გადარბენაზეა... ფოტო იმდენად ბევრი ინფორმაციის შემცველია, რომ მან ჩაანაცვლა ვერბალური ტექსტი... ოცნებას ქმედება მირჩევნია, ამიტომ თუ რაიმე ჩავიფიქრე, მალევე ვახორციელებ... გრძელვადიანი ნაფტალინიანი ოცნებები არ მაქვს... ხელოვნებაშიც სპონტანურობა მიზიდავს... დიდი ხნის ნაფიქრი უკვე მეცნიერებაა და არა ფოტოხელოვნება... თუმცა, შემოქმედებითი პროექტებიც იგეგმება წინასწარ... მე მაინც მოულოდნელი აღმოჩენებისკენ ვარ... ანარეკლების სერიაც სპონტანურად შეიქმნა.
— ბოლოს, მინდა ჩვენი საუბარი დავასრულო ამონარიდით თქვენი „უცხო ქალაქიდან“:
უცხოა ქალაქი, რომელშიც დაგეძებ,
როგორც დაეძებენ ქარები ფოთლებს...
უცხოა ქალაქი, რომელშიც ვცხოვრობთ,
მისი საზღვრები კილომეტრებით
არ იზომება.
დაგეძებ ქალაქში, რომელშიც დავდივართ,
რომელიც სავსეა მზითა და ავ-კარგით...
რა ძნელად შეგხვდი და დაგკარგე ადვილად
ქალაქში,
რომელმაც საზღვრები დაკარგა...
ქალაქში ქალაქი... შენი და ჩემია!
და ისევ გიმღერებ, დღეს თუკი გადავრჩი,
შენ, ჩემო, ქალაქში დაკარგვა გჩვევია...
მე კი ვიკარგები შენში... ვით ქალაქში...
P.S. ჩვენი გაზეთის მკითხველი ძალიან სპეციფიკურია, ძირითადად, პედაგოგები. რას ეტყვით მათ, თქვენი აზრით, როგორი უნდა იყოს კარგი პედაგოგი?
— არ მაქვს მზა რეცეპტი, როგორი უნდა იყოს კარგი პედაგოგი, მაგრამ ვიცი, რა უნდა შესძლოს კარგმა მასწავლებელმა — მოსწავლეებს ასწავლოს ფიქრი და გაუღვიძოს შემოქმედებითი უნარები...
ესაუბრა
ლალი ჯელაძე
|