2013-10-17 აფხაზ მთავართა სათავეებიდან ომის შემდგომ თაობამდე
ფხაზთა უძველესი ისტორიული გვარი ერთი თვალსაჩინო აფხაზური ოჯახის ისტორია მამაჩემის ბაბუა ტარას ანჩაბაძე, თავის მამის მსგავსად, ოფიცერი იყო, რუსეთ-თურქეთისა და რუსეთ-იაპონიის ომების მონაწილე. სამხედრო სამსახურიდან გადადგომის შემდეგ იყო სოხუმის საქალაქო მმართველობის წევრი. ჰქონდა აგრეთვე დიდი გატაცება — ნადირობა; მის სამონადირეო თავგადასავლებს რუსმა მწერალმა ევგენი მარკოვმა მოთხრობა მიუძღვნა — „ერთი წელიწადი მთებში“. პოდპოლკოვნიკ ტარას ანჩაბაძეს, როგორც მამაცსა და სახელმოხვეჭილ მონადირეს, მოიხსენიებს კონსტანტინე მაჭავარიანიც თავის ცნობილ წიგნში: „სოხუმისა და სოხუმის ოლქის გზამკვლევი“ (1913 წ.). ტარასი წერდა აგრეთვე სასიმღერო კუპლეტებსა და სახუმარო ლექსებს რუსულ და მეგრულ ენებზე.
ტარასსა და მაშოს ექვსი ვაჟი და ერთი ქალიშვილი ჰყავდათ. უფროსი შვილი ვალერიანი, ოჯახური ტრადიციისამებრ, სამხედრო სამსახურში შევიდა. მონაწილეობდა პირველ მსოფლიო ომში, შემდეგ საქართველოს დემოკრატიული რესპუბლიკის შეიარაღებული ძალების ოფიცერი იყო. დაიღუპა რუსეთ-საქართველოს ომში 1921 წელს. ბაბუაჩემმა ვიანორმა დაამთავრა ჯერ თბილისის პირველი გიმნაზია, ხოლო შემდეგ — საიმპერატორო სამხედრო-სამედიცინო აკადემია პეტერბურგში. როგორც სამხედრო ექიმი, მონაწილეობდა პირველ მსოფლიო ომში. ომიდან დაბრუნების შემდეგ პოლიტიკურ საქმიანობაში ჩაება, აირჩიეს აფხაზეთის სახალხო საბჭოში. 1919 წელს ვიანორი დაქორწინდა ვერა შენგელაიაზე; ქორწილში ვიანორის მეჯვარე მისი ყრმობის მეგობარი ქაქუცა ჩოლოყაშვილი იყო. საბჭოთა პერიოდში (1937 წლამდე) ვიანორ ანჩაბაძე აფხაზეთის ჯანდაცვის სისტემაში მუშაობდა, დიდი წვლილი მიუძღვის საკურორტო მშენებლობის საქმეში. იყო ავტონომიური რესპუბლიკის ჯანდაცვის მინისტრი, ანუ, როგორც მაშინ ამბობდნენ, სახალხო კომისარი. აღსანიშნავია, რომ იგი ერთადერთი უპარტიო კომისარი იყო საქართველოში.
ტარასის უმცროსი ვაჟები, 1918-21 წლებში, ქართული ჯარის ოფიცრები იყვნენ.
ტარას ანჩაბაძე 1935 წელს გარდაიცვალა და ვერ მოესწრო 1937-38 წლების სასტიკ რეპრესიებს, რომლებმაც იმსხვერპლეს მისი ვაჟები: ვიანორი, ვარლამი და გიორგი. ჩეკისტებს გადაურჩნენ მხოლოდ ლადი და ნიკოლოზი, რომლებიც შეცვლილი დოკუმენტებით ცხოვრობდნენ საბჭოთა კავშირის სხვადასხვა რეგიონებში. 1937 წელს დახვრიტეს, აგრეთვე, ქალიშვილის — ტატიანას მეუღლე ნიკოლოზ აქირთავა, ხოლო ვიანორის მეუღლე ვერა დააპატიმრეს და შვიდი წელი გაატარა ყაზახეთის სტეპებში, აკმოლინსკის ბანაკში, სადაც „ხალხის მტრების“ ცოლები და ქალიშვილები ისხდნენ.
ვიანორსა და ვერას ჰყავდათ ორი შვილი — ზურაბი და ირინა. მამაჩემს, ზურაბს, ბავშვობის მეგობართა ფართო წრე ჰყავდა. ესენი იყვნენ სხვადასხვა ეროვნების წარმომადგენელი მომლხენი სოხუმელი (და არა მარტო სოხუმელი) ბიჭები. ბევრი მათგანი ფეხბურთით იყო გატაცებული, მათ შორის ზურაბიც, რომელიც სკოლის წლებში ბავშვთა საქალაქო გუნდის კაპიტანი იყო. მაშინ ამ გუნდში თამაშობდა არა ერთი შემდგომში სახელგანთქმული სპორტსმენი, მაგალითად, ავთანდილ ღოღობერიძე. ზურაბს ახალგაზრდობაში ბევრი რამ გადახდენია თავს, რამდენიმეჯერ დანითაც იყო დაჭრილი. მეგობრებს უყვარდათ მისი თამადობით ქეიფი, ცეკვა, რომლის დროსაც გაწყობილი მაგიდა კბილებით ეკავა.
ამავე დროს, ზურაბი ბევრს კითხულობდა, გატაცებული იყო ჰუმანიტარული მეცნიერებებით. სოხუმის პედაგოგიური ინსტიტუტის დამთავრების შემდეგ ასპირანტურაში ჩააბარა თბილისში. მისი ხელმძღვანელები იყვნენ აკადემიკოსები სიმონ ჯანაშია და ნიკო ბერძენიშვილი. შემდეგ ზურაბმა მუშაობა დაიწყო საქართველოს მეცნიერებათა აკადემიის ისტორიის ინსტიტუტში. აქვე გაიცნო მომავალი მეუღლე, თბილისელი თინათინ ხახიშვილი.
მეც თბილისში დავიბადე, აქვე დავამთავრე სკოლა და უნივერსიტეტი. 1973 წელს ჩემი მშობლები სოხუმში გადავიდნენ, სადაც ზურაბ ანჩაბაძე იმ პედინსტიტუტის რექტორად დაინიშნა, რომლის სტუდენტი ოდესღაც თვითონ იყო. 1979 წელს ინსტიტუტი გადაკეთდა აფხაზეთის სახელმწიფო უნივერსიტეტად. ზურაბ ანჩაბაძე აფხაზეთის უნივერსიტეტის პირველი რექტორი იყო. გარდაიცვალა 1984 წელს და დაკრძალეს უნივერსიტეტის მთავარი კორპუსის ეზოში. დაკრძალვას უამრავი ადამიანი დაესწრო არა მარტო საქართველოს თითქმის ყველა კუთხიდან, არამედ საბჭოთა კავშირის სხვა რესპუბლიკებიდანაც.
მე და ჩემს მეუღლეს, ნონა ქომეთიანს ორი ქალიშვილი გვყავს, ელისო და ნინო (ორივე დაოჯახებული) და სამი შვილიშვილი — ელენე, საბა და გიორგი.
„ენა თვისი აქუსთ,
არამედ უწყიან
წარჩინებულთა
ქართული“
ადრინდელი მასალები ამის შესახებ არ შემონახულა, მაგრამ შედარებით გვიანდელი ხანის წყაროები მოწმობენ, რომ აფხაზთა მთავრების მშობლიური ენა იყო აფხაზური. მაგალითად, ქართველი მწერალი და მოგზაური გიორგი ავალიშვილი, რომელიც პირადად შეხვედრია აფხაზეთის მთავარ საფარბეგ (გიორგი) შერვაშიძეს (გარდ. 1821 წ.), წერს, რომ მთავარმა აფხაზურის გარდა სხვა ენა არ იცოდა და მხოლოდ ცოტათი ესმოდა ქართულიო. თუმცა ამ მხრივ საფარბეგი, როგორც ჩანს, მაინც გამონაკლისს წარმოადგენდა. აფხაზეთის მთავრებისათვის დამწერლობის ძირითადი ენა ქართული იყო, რომელსაც, სავარაუდოა, საგანგებოდ ასწავლიდნენ ბავშვებს დიდგვაროვანთა ოჯახებში. ამიტომ წერს ბატონიშვილი ვახუშტი აფხაზებზე: „ენა თვისი აქუსთ, არამედ უწყიან წარჩინებულთა ქართული“. საფარბეგის ვაჟიც, აფხაზეთის უკანასკნელი მთავარი მიხეილ შერვაშიძე შესანიშნავად საუბრობდა და წერდა ქართულად. ამასთან ერთად მან იცოდა აფხაზური, ჩერქეზული, უბიხური და თურქული ენები. მიხეილის ვაჟი კი, პოეტი გიორგი შერვაშიძე, როგორც ქართული საზოგადოებისთვის არის ცნობილი, შესანიშნავი მოქართულე იყო, თუმცა შედარებით ცოტამ იცის, რომ იგი ბრწყინვალედ ფლობდა აფხაზურ ენასაც. აკად. სიმონ ჯანაშია აღნიშნავს, რომ გიორგი შერვაშიძის დროს აფხაზეთში ისეთი აფხაზურით უკვე აღარავინ ლაპარაკობდაო (იხ. ს. ჯანაშიას შესავალი წერილი (კულტურულ-ისტორიული ნარკვევი) წიგნში: „გიორგი შარვაშიძე, ლირიკა, დრამა, ეპოსი“. ჳ გამოცემა — სოხუმი, 1946; ჳჳ გამოცემა — თბ., 1986).
„აფსუა“ და „აფხაზი“ — ავტოეთნონიმი
და ალოეთნონიმი
ტერმინ „აფსუასა“ და „აფხაზს“ შორის იგივე განსხვავებაა, რაც ტერმინებს „ქართველსა“ და „გურჯს“ ან „გრუზინს“ შორის. პირველი ავტოეთნონიმია, ანუ თვითსახელწოდება, ხოლო მეორე — ალოეთნონიმი, ანუ სახელი, რომელსაც სხვა ხალხები უწოდებენ.
რაც შეეხება აფხაზთა წარმომავლობას, ისინი აღმოსავლეთ შავიზღვისპირეთის უძველესი მკვიდრები არიან. ფართო საზოგადოებამ, ალბათ, აღარ იცის, რომ 1989 წლამდე (ქართულ-აფხაზური კონფლიქტის ღია ფაზის დასაწყისი) ქართულ ისტორიოგრაფიაში არსებობდა აზრი, რომ შორეულ წარსულში თანამედროვე დასავლეთ საქართველოს ტერიტორიის მნიშვნელოვანი ნაწილი დასახლებული იყო აფხაზურ-ადიღეური მოდგმის ტომებით. ამ აზრს ემხრობოდნენ ივანე ჯავახიშვილი, სიმონ ჯანაშია და არა ერთი სხვა წამყვანი მეცნიერი.
აფხაზური ენის
სათავეები
ზოგი მეცნიერი ვარაუდობს, რომ ადრე არსებობდა აფხაზური დამწერლობა, რომელიც შემდეგ დავიწყებას მიეცა. მსოფლიოში ასეთი ფაქტები ცნობილია, მაგრამ აფხაზურ ენასთან მიმართებაში მე ამ მოსაზრებას ვერ დავეთანხმები, ვინაიდან ის არგუმენტები, რომლებსაც ზემოხსენებული მეცნიერები ეყრდნობიან, დამაკმაყოფილებლად არ მიმაჩნია. ამიტომ გავიმეორებ ტრადიციულ აზრს, რომ აფხაზურ ენას დამწერლობა არ ჰქონია 1862 წლამდე, როდესაც რუსმა ენათმეცნიერმა უსლარმა მას გრამატიკა და ანბანი შეუქმნა რუსული ანბანის საფუძველზე. ამაში გასაკვირი არაფერია. კავკასიაში ათეულობით ენა არსებობს, ძველი დამწერლობა კი მხოლოდ ქართულ და სომხურ ენებს აქვთ. რუსები კავკასიის იმ ენებს, რომლებსაც დამწერლობა არ გააჩნდათ, რუსულის საფუძველზე უქმნიდნენ დამწერლობას, რათა ხელი შეეწყოთ მათი შემდგომი რუსიფიკაციისათვის. მარტო უსლარმა, მაგალითად, გარდა აფხაზურისა, დამწერლობა შეუდგინა ჩერქეზულ, ჩეჩნურ, ლაკურ და ზოგიერთ სხვა ენას. ამავე მოსაზრებით მოხდა შემდეგ მეგრული და სვანური ანბანების შექმნა.
ახლა რაც შეეხება საუკუნეს, თუ როდიდან ფიქსირდება პირველად აფხაზური ენა. ასეთად შეიძლება ხჳჳ საუკუნე ჩავთვალოთ, როდესაც თამარ მეფემ თავის ვაჟსა და მემკვიდრეს სახელი „ლაშა“ უწოდა. მემატიანე განმარტავს: „...ლაშასა, რომელი განმანათლებლად სოფლისა ითარგმნა აფსართა ენითა“. სოფლის, ანუ ქვეყნის, განმანათლებელი — სინათლის სხივია. აფხაზურ ენაზე მას დღესაც ლაშა ეწოდება.
მომდევნო ხანებში რამდენიმე ავტორი აღნიშნავს, რომ აფხაზებს თავისი ცალკე ენა აქვთო. ბოლოს კი, 1641 წელს, თურქი მოგზაური ევლია ჩელები აღწერს აფხაზურ ენას და მოჰყავს რამდენიმე ათეული აფხაზური სიტყვა და წინადადება შესაბამისი თურქული თარგმანით.
ენგურსგაღმა
დარჩენილი აფხაზური ცხოვრება...
აფხაზეთში რეგულარულად დავდივარ, წელიწადში ერთი-ორჯერ. კოლეგებთან კავშირი, ცხადია, მაქვს. სხვა რომ არაფერი, 2001 წლიდან ლექციებს ვკითხულობ აფხაზეთის სახელმწიფო უნივერსიტეტში.
ცხოვრებაზე რა მოგახსენოთ, დაახლოებით ისეთივეა, როგორც ჩვენთან. ზოგი კარგად ცხოვრობს, ზოგს — უჭირს.
პირველი ვიზიტი ომის შემდგომ აფხაზეთში...
ომის შემდეგ პირველად აფხაზეთში 1998 წელს ჩავედი. მაშინ ადლერში ქართულ-აფხაზური შეხვედრა მიმდინარეობდა, რომელსაც ვესწრებოდი. იქიდან ფსოუს საზღვარი გადავკვეთე, ერთი დღით ჩავედი სოხუმში და შემდეგ უკან ისევ ფსოუთი გადმოვედი. შესაძლოა პირველი ადამიანი ვიყავი, ვინც ფსოუს საზღვარი გადაკვეთა ქართული პასპორტით. რუსი მესაზღვრეები არც იქით არ მატარებდნენ, არც უკან არ უნდოდათ ჩემი გამოშვება, ორივეჯერ აფხაზები დამეხმარნენ.
დაბრუნება აფხაზ
სტუდენტებთან
„აფხაზეთის ისტორიული გეოგრაფიით“
აფხაზეთში მეორედ 1999 წელს ჩავედი. ეს იყო ქართული სამოქალაქო სექტორის წარმომადგენელთა პირველი ჩასვლა სოხუმში. ვიყავით მე, გია ნოდია და მარინა ელბაქიძე. ჩვენი ვიზიტის ორგანიზატორი იყო ამერიკელი მეცნიერი, კალიფორნიის ირვაინის უნივერსიტეტის პროფესორი, ქ-ნი პოლა გარბი, რომელსაც დიდი ამაგი მიუძღვის პირველი ქართულ-აფხაზური შეხვედრების მოწყობაში. ჩვენ ღია შეხვედრები ჩავატერეთ აფხაზურ საზოგადოებასთან სოხუმში. დაგვისვეს ბევრი კითხვა, რაზეც პასუხები გავეცით. ეს ტექსტები გამოქვეყნებულია ირვაინის უნივერსიტეტის ეგიდით გამოცემული წიგნების სერიაში „აcпекты грузино-абхазского конфликта“. მსგავსი ფორმატის შეხვედრა სოხუმში აღარ განმეორებულა. სწორედ მაშინ, ერთ-ერთი შეხვედრის დროს აფხაზეთის უნივერსიტეტის წარმომადგენლებმა შემომთავაზეს, თუ სურვილი მქონდა, შემეძლო განმეახლებინა მათთან ლექციების კითხვა (აფხაზეთის სახელმწიფო უნივერსიტეტში ლექციებს ომის წინა წლებში ვკითხულობდი).
1984 წელს, როდესაც პირველად დავიწყე მუშაობა აფხაზეთის სახელმწიფო უნივერსიტეტში, მე იქ შევიტანე ორი ახალი საგანი, რომლებიც მანამდე არსად არ ისწავლებოდა: 1) საქართველოს სამხედრო ისტორია და 2) აფხაზეთის ისტორიული გეოგრაფია. ამ საგნებს ვკითხულობდი ქართულ და რუსულ ენებზე, იმჟამად უნივერსიტეტში არსებულ სამივე — აფხაზურ, ქართულ და რუსულ — სექტორზე.
2001 წელს განვაახლე სოხუმში აფხაზეთის ისტორიული გეოგრაფიის კითხვა, (ისტორიული გეოგრაფია სპეციალური ისტორიული დისციპლინაა ისტორიისა და გეოგრაფიის მიჯნაზე. შეისწავლის ამა თუ იმ ქვეყნის ან რეგიონის გეოგრაფიას წარსულ ისტორიულ ეპოქებში), გარდა ამისა, ზოგჯერ ვკითხულობ სხვა კურსებსაც. წამიკითხავს ოსმალეთის იმპერიის ისტორია, კავკასიის ომი...
ვფიქრობ, სტუდენტებს აინტერესებთ შეთავაზებული თემები, ვინაიდან ბევრ კითხვას მაძლევენ, შემდეგ ზოგ სტუდენტთან ელექტრონული მიმოწერაც მაქვს ხოლმე. ჩემი ლექციების შესახებ რამოდენიმეჯერ დადებითად აღინიშნა აფხაზურ პრესაში.
ომის შემდგომი
თაობის განწყობა
დღევანდელი აფხაზი სტუდენტები ომის შემდგომი თაობაა. მათ არა აქვთ ქართველებთან თანაცხოვრების გამოცდილება და მიაჩნიათ, რომ ცხოვრობენ დამოუკიდებელ სახელმწიფოში. ზოგჯერ მეკითხებიან საქართველოს ისტორიის ამა თუ იმ საკითხზე. ა.წ. მაისში, როდესაც ლექციებით ვიყავი ჩასული სოხუმში, ერთმა სტუდენტმა სურვილი გამოთქვა, რომ სიამოვნებით გაეცნობოდა „ქართლის ცხოვრებას“, თუ არსებობსო მისი რუსული თარგმანი. ასეთი წიგნი მართლაც გამოიცა თბილისში რამდენიმე წლის წინ. მინდა შევიძინო, თუ ვიშოვე, და გადავცე უნივერსიტეტში ისტორიის კაბინეტს, რათა სტუდენტებს მისი გამოყენების შესაძლებლობა ჰქონდეთ.
არაეფექტური
პოლიტიკით
შემცირებული შესაძლო
კომპრომისების სივრცე
„განვლილმა ოცმა წელმა გვიჩვენა, რომ ის მიდგომა, რომელიც ამ ხნის განმავლობაში სახელმწიფოს ჰქონდა, არასწორია და პოზიტიური შედეგის მომტანი არ არის. ამიტომ, პირველ რიგში, საჭიროა სხვაგვარად მივუდგეთ საკითხს“ (გ. ანჩაბაძე).
ალბათ დამეთანხმებით, რომ ქართული პოლიტიკა აფხაზეთის მიმართებაში უკანასკნელი 20-25 წლის მანძილზე, რბილად რომ ვთქვათ, არაეფექტური იყო. გაიხსენეთ გასული ათწლეულების ის ქართველი დიდმოხელეები და პარლამენტარები, რომლებიც მოსახლეობას არწმუნებდნენ, რომ დრო საქართველოს სასარგებლოდ მუშაობსო, უახლოეს მომავალში ამოქმედდება რაღაც მექანიზმები და მყისვე აღდგება ტერიტორიული მთლიანობაო. ეს მოღვაწეები დიდი ხანია გაქრნენ ტელეეკრანებიდან, მაგრამ ვითარება არ შეცვლილა. იგივე დაპირებები გვესმოდა ბოლო დრომდე — ქართული მიზნების მიღწევა ჯერ რუსეთის მეშვეობით, შემდეგ დასავლეთისა და საერთაშორისო თანამეგობრობის დახმარებით ან საკუთარი შეიარაღებული ძალებით. აფხაზებთან დიალოგი შედეგის მომტანად წარმოედგინათ მხოლოდ ძალისმიერი შანტაჟის ფონზე. სერიოზულად არავის უფიქრია აფხაზთა რეალურ ინტერესებზე, რასაც მოლაპარაკებების პოზიტიურ სიბრტყეში გადატანა შეეძლო. ამ ფონზე, ფაქტობრივად, არ იქნა გამოყენებული იმ ცალკეული ქართველი პოლიტიკოსების შესაძლებლობები, რომლებსაც აფხაზებთან მოლაპარაკების უნარი ჰქონდათ და მათი მხრიდან გარკვეული აღიარებით სარგებლობდნენ.
დაკარგულმა წლებმა, ცხადია, შეამცირეს შესაძლო კომპრომისების სივრცე, ამიტომ ახალი ხელისუფლება დღეს ამ საკითხში გაცილებით უფრო რთულ მდგომარეობაშია, ვიდრე მისი წინამორბედები იყვნენ მმართველობის დასაწყიში. მაგრამ დროის მეტი გაჭიანურება ქვეყნისთვის მხოლოდ უარყოფითი შედეგების მომტანია. ამიტომ სიტუაციის გასარღვევად საჭიროა არაორდინარული სვლები, ურთიერთობების ახალი ფორმატისა და მოდელის შეთავაზება. ორი სიტყვით ამის დაკონკრეტება, მით უმეტეს ასეთი ფართო ხასიათის ინტერვიუში, შეუძლებელია და, ვფიქრობ, მიზანშეწონილიც არ არის.
20 წლის გადასახედიდან — მინიმუმამდე დასული ურთიერთობები
რა უნდა შეცვლილიყო, როდესაც ურთიერთობები მინიმუმამდეა დასული. თუ არ ჩავთვლით ენგურისპირა მოსახლეობას, წელიწადში ალბათ რამდენიმე ათეული ქართველი და აფხაზი თუ ხვდება ერთმანეთს, ისიც მნიშვნელოვანწილად ერთი და იგივე ადამიანები. ამიტომ აფხაზური და ქართული საზოგადოებები თანდათან შორდებიან ერთმანეთს. ადრეც მითქვამს, რომ 1992-93 წლების ომის შემდეგ აფხაზეთში იყო მოლოდინი, რომ საქართველოს ხელისუფლება შეაფასებდა შექმნილ ვითარებას და აფხაზებს შესთავაზებდა რაიმე მათთვის მისაღებ პოლიტიკურ მოდელს — საერთო სახელმწიფოს კონფედერაციის ან ფართო ფედერაციის სახით. 1998 წლის გალის „მოვლენებისა“ და 2001 წელს აფხაზეთში გელაევის რაზმის შეყვანის შემდეგ ვითარება მნიშვნელოვნად შეიცვალა. შემთხვევითი არ იყო, რომ აფხაზებმა დამოუკიდებლობა ოფიციალურად გამოაცხადეს მხოლოდ 1999 წელს. გელაევის რეიდის შემდეგ მე ვიყავი სოხუმში და ვიგრძენი, რომ უკვე რაღაცნაირად „გაცივებული“ იყო ქართულ მხარესთან შეთანხმების ინტერესი. ამ პერიოდს ემთხვევა აფხაზეთისათვის რუსული ბლოკადის მოხსნა, პასპორტების გაცემა და სხვ. ანუ რუსეთმა გააკეთა ყველაფერი ის, რაც საქართველოს თავისი მხრიდან რომ შეეთავაზებინა, მომგებიან პოზიციაში აღმოჩნდებოდა. აფხაზებში რჩებოდა კიდევ იმის განცდა, რომ საქართველოს ხელისუფლებას შეეძლო წამოეწყო ახალი ომი მათ წინააღმდეგ, მაგრამ 2008 წელმა გაურკვეველი ვადით ეს ფაქტორიც მოხსნა. ყოველივე ამის გამო აფხაზეთში საქართველოსადმი ინტერესი განელდა, თუმცა, ცხადია, ეს ისე არ უნდა გავიგოთ, რომ დიალოგის თემა აღარ არსებობს და რეალური კომპრომისის მიღწევა შეუძლებელია.
აფხაზეთთან
დაკავშირებული
ყველაზე მძაფრი
მოგონება
მძაფრი მოგონება, ალბათ მძიმე მოგონებას გულისხმობს, არა? პირველი იყო მამაჩემის მოულოდნელი გარდაცვალება სოხუმში. მეორე, რა თქმა უნდა, 1992-93 წლების ქართულ-აფხაზური ომია, თუმც მე იმ დროს ფიზიკურად აფხაზეთში არ ვყოფილვარ. ქართულ საზოგადოებას ჯერ კიდევ არ გაუცნობიერებია, თუ რა მასშტაბის ტრაგედია დაგვატყდა თავს. ვინც ვერ ხვდება რას ვგულისხმობ, კიდევ გადაიკითხოს ყურადღებით აკაკის „გამზრდელი“, ნიკო ლორთქიფანიძის „რაინდები“, კონსტანტინე გამსახურდიას „მთვარის მოტაცება“, ლეო ქიაჩელის „ჰაკი აძბა“... მესამე მძიმე მოგონება, რაც აფხაზეთთან მაკავშირებს, ეს არის ზურაბ აჩბას ვერაგული მკვლელობა 2000 წელს. ზურაბი იყო უაღრესად დადებითი პიროვნება და მოაზროვნე პოლიტიკოსი, რომელსაც სურდა ქართულ-აფხაზური წინააღმდეგობების დაძლევა პოზიტიური და ორივე მხარისათვის მისაღები პოზიციებიდან. მე დავესწარი მის დაკრძალვას. ჩვენ ბევრი რამ გვაკავშირებდა.
ესაუბრა
ლალი ჯელაძე
|