2011-11-03 პედაგოგს, რომელმაც ჩვენს შვილებს უნდა ასწავლოს, საკმაოდ მაღალი მოთხოვნები უნდა წავუყენოთ გვესაუბრება გამოცდების ეროვნული ცენტრის ზოგადი უნარების ჯგუფის ხელმძღვანელი სოფო დოლიძე
წელს სასერტიფიკაციო გამოცდებში დაწყებითი საფეხურის პედაგოგებიც ჩაერთნენ. მომავალი წლისთვის მათ სიახლე ელით — ტესტი საგნობრივი სწავლების პედაგოგებისთვის. რა კრიტერიუმებით მოწმდება დაწყებითი საფეხურის პედაგოგის ცოდნა და სწავლების უნარი?
2011 წელს პირველად ჩავატარეთ სასერტიფიკაციო გამოცდა დაწყებითი საფეხურის იმ პედაგოგებისთვის, რომლებიც I-IV კლასებში სამ ძირითად საგანს ასწავლიან. მართალია, კანონით განსაზღვრულია, რომ დაწყებითი საფეხური I-VI კლასებს მოიცავს, მაგრამ აღმოჩნდა, მასწავლებელთა უდიდესი ნაწილი ისევ I-IV კლასებში ასწავლის არა ერთ საგანს, არამედ სამს — ქართულ ენასა და ლიტერატურას, მათემატიკასა და ბუნებისმეტყველებას. სწორედ ამ მასწავლებლებს შევთავაზეთ, პირველ რიგში, კომპლექსური სასერტიფიკაციო ტესტი. პედაგოგის ცოდნა და სწავლების უნარი სამივე დისციპლინაში მოწმდებოდა. ტესტი პროფესიულ ცოდნასთან ერთად მეთოდიკასაც მოიცავდა.
სასერტიფიკაციო ტესტი ორი ნაწილისგან შედგებოდა: ერთი მნიშვნელოვანი ნაწილი ამოწმებდა აკადემიურ უნარებს — წაკითხული ტექსტის გააზრებასა და ანალიტიკურ წერას. ამ ორი საბაზისო უნარის შემოწმება მნიშვნელოვანია იმდენად, რამდენადაც მასწავლებელმა სწორედ ეს უნარები უნდა განუვითაროს მოსწავლეს, რათა მას სხვადასხვა საგნის შესწავლისას პრობლემები არ შეექმნას. ინფორმაციის აღქმა, გააზრება და გაგება, წერის უნართან ერთად, უმნიშვნელოვანესი კომპონენტებია. სასერტიფიკაციო ტესტი ყველა ამ საკითხს მოიცავდა.
ტესტირება 5-საათიანი იყო, მაქსიმალური ქულა — 100. პედაგოგს, წარმატებით რომ ჩაებარებინა გამოცდა, აუცილებლად უნდა დაეგროვებინა, მინიმუმ 61 ქულა, ანუ — მთლიანი ტესტის 60%-ზე მეტი.
ქულების უდიდესი ნაწილი — 80%, ცხადია, მოდიოდა ტესტის ძირითად ნაწილზე — პროფესიული ცოდნა და მეთოდიკა (ამ ნაწილში 80 ქულა იყო დასაგროვებელი); ტესტის ეს ნაწილი მოიცავდა ქართული ენისა და ლიტერატურის, მათემატიკისა და ბუნებისმეტყველების დავალებებს, რომლებიც ორიენტირებული იყო პროფესიულ ცოდნასა და მეთოდიკაზე. ჩვენი პედაგოგებისთვის სიახლე იყო კითხვისა და წერის სწავლების ნაწილი, რომელიც, ასევე, აღნიშნულ ბლოკში ერთიანდებოდა.
20-ქულიანი იყო მეორე — მცირე, მაგრამ მნიშვნელოვანი ნაწილი — აკადემიური უნარები. პედაგოგთა კომპეტენტურობის დასადასტურებლად მნიშვნელოვანია ამ ორი საბაზისო უნარის — წაკითხული ტექსტის გააზრებისა და წერის შემოწმება.
რომ არ მომხდარიყო ისე, რომ მინიმალური კომპეტენციის ზღვარი — 61 ქულა — მხოლოდ პროფესიული უნარების ტესტით გადაელახათ პედაგოგებს, ორივე ნაწილში ცალ-ცალკე დავაწესეთ ქვედა, მინიმალური ზღვრები. ეს ზღვარი იყო 40%-ზე მეტი, ანუ აპლიკანტს პროფესიული ცოდნისა და მეთოდიკის ნაწილში უნდა დაეგროვებინა 33 ქულა (80 ქულის 40%-ზე მეტი), ხოლო აკადემიური უნარების ნაწილში — 9 ქულა (20 ქულის 40%-ზე მეტი). ცხადია, მხოლოდ 33 ქულა ერთ ნაწილში და 9 ქულა მეორე ნაწილში საკმარისი არ იყო იმისათვის, რომ საბოლოოდ ტესტის მინიმალური კომპეტენციის ზღვარი გადალახული ყოფილიყო (61 ქულა არ იქმნება 33-ითა და 9-ით), პედაგოგს უფრო მეტი ქულები უნდა დაეგროვებინა, მაგრამ თვითონ შეეძლო განესაზღვრა, რომელ ნაწილში მოიპოვებდა ამ ქულებს. მინიმალური ბარიერები უფრო იმ მიზნით დაწესდა, რომ დავრწმუნებულიყავით, აპლიკანტმა ორივე ნაწილზე იმუშავა.
რადგან ბევრ სკოლაში მიმდინარეობს საგნობრივი სწავლება, ამიტომ 2012 წლიდან სიახლეს ვთავაზობთ ჩვენს პედაგოგებს — სწორედ მათ შევთავაზებთ სასერტიფიკაციო ტესტს, ვინც საგნობრივად ასწავლის I-VI კლასებში. მომზადდება 4 სხვადასხვა ტესტი: ერთი იქნება ისევ დაწყებითი საფეხურის I-IV კლასების სამი ძირითადი საგნის მასწავლებლებისთვის, როგორიც იყო 2011 წელს; გარდა ამისა, დაემატება სამი ტესტი — ქართული ენისა და ლიტერატურის, მათემატიკისა და ბუნებისმეტყველების მასწავლებლებისთვის, მათთვის, ვინც ერთი კონკრეტული საგნის პროფესიონალია, სურს I-VI კლასებში ასწავლოს საგნობრივად და სერტიფიკატიც ამ კონკრეტული საგნის სწავლებისთვის მოიპოვოს. ბევრი სკოლა, განსაკუთრებით კერძო სკოლები, გადასულია საგნობრივ სწავლებაზე.
დაწყებითი საფეხურის საგნობრივი სწავლების პროფესიონალი პედაგოგები განსაკუთრებით აქტუალურია V-VI კლასებში, სადაც კლასიკური დაწყებითი განათლების მქონე პედაგოგები აღარ ასწავლიან ხოლმე, ისინი IV კლასში ასრულებენ მოღვაწეობას. V-VI კლასებში, როგორც წესი, ასწავლიდნენ VII-XII კლასების, ანუ საბაზო-საშუალო საფეხურის მასწავლებლები. ასე რომ არ მოხდეს და კონკრეტული საგნის დაწყებითი განათლების სპეციალისტებს ჰქონდეთ შესაძლებლობა, ასწავლონ I-დან VI კლასამდე ერთი კონკრეტული საგანი, 2012-ში მათ საგნობრივ გამოცდებს შევთავაზებთ. შესაბამისად, უფრო მეტ აპლიკანტს ველოდებით.
2010 წელს ჩატარებულ საცდელ ტესტირებაზე საგნობრივი პედაგოგები მცირე რაოდენობით იყვნენ წარმოდგენილნი. ძალიან ცოტა მასწავლებელი მოვიდა ბუნებისმეტყველების გამოცდაზე, სულ ათიოდე, რადგან არ იყვნენ დაინტერესებულები — იცოდნენ, რომ მათთვის პირველ წელს ტესტირება არ ტარდებოდა, ქართული ენისა და ლიტერატურის პედაგოგები — ცოტა მეტი, ასევე — მათემატიკის. შედეგები მათ უკეთესი ჰქონდათ,
ვიდრე დაწყებითი საფეხურის I-IV კლასების სამი ძირითადი საგნის პედაგოგებს, მაგრამ ძალიან ცოტანი იყვნენ, ამიტომ რეალური დასკვნების გაკეთება და პროგნოზირება, რა სურათი იქნება გამოცდაზე, შეუძლებელია.
ჩვენი აზრით, ადამიანი, რომელიც ერთი საგნის სპეციალისტია, გაცილებით კომპეტენტურად შეძლებს ამ საგნის სწავლებას. ძალიან მნიშვნელოვანია, დაწყებითი საფეხურის მასწავლებელმა სწორად ასწავლოს საგანი პირველივე ნაბიჯებიდან, პირველივე საფეხურიდან იმიტომ, რომ შეიქმნას საფუძველი, რომელზეც მომავალში ცოდნა უნდა დაშენდეს. ამას უდიდესი მნიშვნელობა აქვს.
როგორი იყო დაწყებითი საფეხურის მასწავლებელთა სერტიფიცირების შედეგები?
წლევანდელი შედეგებით უკმაყოფილო არ ვართ. ის, რომ ადამიანმა სამი საგნის სწავლება შეძლოს, ძალიან დიდი გამოწვევა, ამავდროულად, სერიოზული ვალდებულებაა. აპლიკანტების, დაახლოებით, 28%-მა შეძლო ბარიერის გადალახვა (ყველა ბარიერის — როგორც ქვედა ბარიერების, ასევე მთლიანის). ვულოცავ მათ და წარმატებას ვუსურვებ პედაგოგიურ მოღვაწეობაში.
რაც შეეხება იმას, რომ დიდმა ნაწილმა, თითქმის 70%-მა, ბარიერი ვერ გადალახა, სამწუხაროდ, იყვნენ ისეთი პედაგოგები (თუმცა ბევრი არა), რომლებმაც არ იცოდნენ ქვედა ბარიერების არსებობის შესახებ და ამიტომ ვერ დააგროვეს საკმარისი ქულები ორივე ნაწილში. იყვნენ ისეთებიც, რომლებიც გამოცდაზე უბრალოდ ძალების მოსასინჯად, თითქოს ერთგვარ რეპეტიციაზე მოვიდნენ. არც ის უნდა დავივიწყოთ, რომ გამოცდა არ იყო ადვილი. გავიმეორებ, რომ ეს კომპლქსური გამოცდა იყო, რომელიც პედაგოგთა ცოდნას და სწავლების უნარს სამივე საგანში აფასებდა. ძალიან მაღალი იყო ბარიერი, რაც იმითაა გამართლებული, რომ პედაგოგებს, რომლებმაც ჩვენს შვილებს უნდა ასწავლონ, საკმაოდ მაღალი მოთხოვნები უნდა წავუყენოთ. ასეთ მოთხოვნებს უყენებს მათ სტანდარტი.
წელს დარეგისტრირებული იყო 3500 პედაგოგი, თუმცა, რეალურად 3014 საგამოცდო ნამუშევარი გავასწორეთ. ცხადია, პედაგოგთა ნაწილი გამოცდაზე არ გამოცხადდა. მათთვის, ვინც გამოცდაზე გავიდა, ეს ძალიან კარგი რეპეტიცია იყო, რადგან ძალიან მნიშვნელოვანია საკუთარი თვალით ნახო საგამოცდო გარემო და ტესტი, დაგეგმო ტესტზე მუშაობის დრო, ბევრი რამ არის ისეთი, რაზეც შემდგომში დროს აღარ დაკარგავ. სწორედ ამ მხრივ 2011 წლის სერტიფიცირება ბევრისთვის კარგი გამოცდილება იყო, რომელიც მომავალი წარმატების საწინდარი შეიძლება გახდეს.
აპლიკანტთა დიდი ნაწილი მინიმალური კომპეტენციის ზღვარს პირველივე გამოცდაზე თუ ვერ გადალახავს, ვფიქრობ, ამაში საგანგაშო არაფერია. მათთვის გამოცდა კარგი გავარჯიშება იქნება, გაეცნობიან ტესტურ დავალებებს, ტესტის ფორმატს, შეეგუებიან საგამოცდო ატმოსფეროს. არ არის იოლი 5 საათი გამოცდაზე ჯდომა, წერა და შრომა, ეს საკმაოდ რთული და სტრესულია. ვეცდებით, მაქსიმალურად კომფორტული ტესტი შევთავაზოთ პედაგოგებს 2012 წელსაც. აუცილებლად მოვამზადებთ დამხმარე მასალათა კრებულებს. ოთხივე გამოცდის შესახებ ინფორმაცია შეიძლება ერთ კრებულში იყოს თავმოყრილი, რადგან ამ გამოცდებს, ცხადია, ბევრი საერთო ექნება. ასევე, ვეცდებით მაქსიმალურად დეტალური ინფორმაცია მივაწოდოთ პედაგოგებს საგამოცდო ტესტის შესახებ, განვიხილავთ ნიმუშებს საგამოცდო ნამუშევრებიდან, რატომ და როგორ შეფასდა ესა თუ ის ნამუშევარი. ვფიქრობ, კრებულები ძალიან ინფორმატიული იქნება ჩვენი პედაგოგებისთვის და იმედი გვაქვს, დაეხმარება გამოცდების წარმატებით ჩაბარებაში.
ყველა პედაგოგს ვუსურვებ წარმატებას.
ესაუბრა
ლალი თვალაბეიშვილი
|