2018-09-13 მასშტაბური საკადრო ცვლილებები განათლების სამინისტროში
ახალი სასწავლო წელი განათლების, მეცნიერების, კულტურისა და სპორტის მინისტრის პირველი ხმაურიანი გადაწყვეტილების ფონზე დაიწყო. თანამდებობაზე დანიშვნიდან ორი თვის შემდეგ მიხეილ ბატიაშვილმა მასშტაბური საკადრო ცვლილებები განახორციელა. 10 სექტემბერს, საგანგებოდ გამართულ ბრიფინგზე მან განაცხადა, რომ შვიდის ნაცვლად, ხუთი მოადგილე ეყოლება და თანამდებობიდან გაათავისუფლა ორი მოადგილე — თეიმურაზ მურღულია და ლია გიგაური, ასევე უწყების კიდევ ოთხი მაღალჩინოსანი — განათლების ხარისხის განვითარების ეროვნული ცენტრის დირექტორი თამარ სანიკიძე, მასწავლებელთა პროფესიული განვითარების ეროვნული ცენტრის დირექტორი გიორგი მაჩაბელი, შოთა რუსთაველის საქართველოს ეროვნული სამეცნიერო ფონდის გენერალური დირექტორი მანანა მიქაბერიძე და შეფასებისა და გამოცდების ეროვნული ცენტრის დირექტორი მაია მიმინოშვილი.
მინისტრმა მადლობა გადაუხადა მათ გაწეული სამუშაოსათვის და აღნიშნა, რომ განათლების ხელმისაწვდომობის და ხარისხის არსებითი ზრდა ერთ-ერთი უმთავრესი პრიორიტეტია. ქვეყნის განვითარებისთვის აუცილებელია კონკურენტუნარიანი განათლების სისტემის შექმნა, თანამედროვე მოთხოვნებზე მორგება, რისთვისაც იგეგმება არაერთი უმნიშვნელოვანესი რეფორმა. შესაბამისად, ამ პროცესს ახალი ენერგია და ხედვები, ახალი საკადრო პოლიტიკა სჭირდება. სწორედ ამის გათვალისწინებით მიიღო საკადრო ცვლილებებთან დაკავშირებული გადაწყვეტილება.
მინისტრმა საკადრო ცვლილებების გაგრძელება დააანონსა და უახლოეს მომავალში საზოგადოებას განათლების სისტემის ახალ, თამამ გადაწყვეტილებებზე ორიენტირებული კადრების გაცნობას დაჰპირდა, რომელთა დანიშვნაც შესაბამისი პროცედურების გავლით მოხდება.
„ჩემი მოსვლის პირველივე დღიდან გავაკეთე განცხადება სისტემაში არსებულ პრობლემებთან დაკავშირებით, ეს შეეხებოდა როგორც გრიფირების პროცესს, ასევე სკოლებში არსებულ სხვადასხვა ტექნიკურ დარღვევებს და ა.შ. ისიც განვაცხადეთ, რეფორმების სწრაფად განხორციელება რომ დავიწყოთ, ძალიან მნიშვნელოვანია სისტემური ცვლილებები. ეს არის მნიშვნელოვანი წინაპირობა იმისთვის, რომ სწრაფი ნაბიჯებით დავიწყოთ რეფორმების განხორციელება. უახლოეს დღეებში იქნება ჩვენი რეფორმის პრეზენტაცია, დაიწყება იმ ნაბიჯების განხორციელება, რომლებიც, ვფიქრობ, უახლოეს პერიოდში ხელს შეუწყობს სისტემის გაჯანსაღებას და, როგორც ვთქვით, ეს ცვლილებები განხორციელდება ახალ გუნდთან ერთად.“
საქართველოს პარლამენტის განათლებისა და მეცნიერების კომიტეტის თავმჯდომარემ, მარიამ ჯაშმა, განაცხადა, რომ საკადრო ცვლილების განხორციელება უშუალოდ მინისტრის პრეროგატივაა, იმავდროულად მიიჩნევს, რომ ნებისმიერი ცვლილება, რომელიც უახლოეს დღეებში გამოცხადდება, იქნება მხოლოდ დადებითი როგორც ჩვენი მოსწავლეებისთვის, ასევე პედაგოგიური კორპუსისთვის.
ეროვნული სასწავლო გეგმების დეპარტამენტის ჰუმანიტარული მიმართულების ხელმძღვანელი თამარ ჯაყელი ამბობს, რომ მინისტრმა გაბედული ნაბიჯი გადადგა, რადგან ცვლილებები განათლების სისტემას ნამდვილად სჭირდებოდა.
„ჩემი აზრით, ეს იყო ძალიან დროული გადაწყვეტილება, შეიძლება ითქვას, დაგვიანებულიც, იმის გამო, რომ უკვე კარგა ხანია ჩვენი სისტემა სტაგნაციაშია. იმ სტრუქტურით და მოცემულობით, რა მდგომარეობაშიც სისტემა იყო, რეალურად, ვერ ხერხდებოდა ზოგადი განათლების ხარისხის მკვეთრი გაუმჯობესება.
აუცილებლად მინდა აღვნიშნო, რომ თითოეულ ამ ადამიანს, ვინც გათავისუფლდა, რასაკვირველია, თავისი წვლილი აქვს შეტანილი განათლების სისტემის განვითარებაში და ყველას პატივისცემით მოვიხსენიებ, უბრალოდ, საჭიროა სისტემის მთლიანი განახლება, პირველ რიგში — კონცეპტუალური თვალსაზრისით.
ყველა ის სტრატეგია, ის ბერკეტი, რომელიც აქამდე ჩვენს სისტემაში მოქმედებდა, ვერ აუმჯობესებდა განათლების ხარისხს. ვერ ხდებოდა სერიოზული, არსებითი ცვლილებების შეტანა საკლასო ოთახში. ამ თვალსაზრისით, იმედი მაქვს ამ გადაწყვეტილებას ძალიან მნიშვნელოვანი, სასიკეთო ცვლილებები მოჰყვება ჩვენი მომავლისთვის, ჩვენი მოსწავლეებისთვის და მასწავლებლებისთვის.
სრულად ვეთანხმები მინისტრის გადაწყვეტილებას. დიდი პრობლემა იყო იმ მხრივ, რომ სისტემაში არ იყო კონცეპტუალური ერთიანობა, რაც აუცილებელია იმისთვის, რომ ძალისხმევა საერთო მიზნისკენ მიდიოდეს, სკოლა აბსოლუტურად „იხლიჩებოდა“. ამ მხრივ, იმედი მაქვს მდგომარეობა გამოსწორდება. უკვე იმდენად „გამკვრივებული“ იყო ვითარება, რომ ამის „გალღობას“ და „გადადნობას“ ეს ცვლილებები ნამდვილად სჭირდებოდა. ვფიქრობ, გაბედული ნაბიჯია, რადგან ამას, უკვე დიდი ხანია, ყველა გრძნობდა, მაგრამ ნაბიჯის გადადგმას ვერავინ ბედავდა.”
სკოლა „ჰამილტონის“ დირექტორის, განათლების საკითხებში ექსპერტის, გია მურღულიას აზრით, უკიდურესად მნიშვნელოვანია ვინ შეცვლის ამ ადამიანებს, როგორი იქნება მათი შერჩევის კრიტერიუმები, ზოგადი კონცეფციის ფარგლებში რა სამუშაო გეგმას, რა ვადებით და რა პასუხისმგებლობებით წარმოადგენენ ახალი ადამიანები. „სხვათა შორის, ეს ზოგადი სათქმელია, რომ ჩვენში არის ძალიან დაბალი კულტურა გაწეული მუშაობის შეფასების. პასუხისმგებლობის ზომა კარგად უნდა იგრძნოს როგორც საზოგადოებამ, ისე მმართველმა გუნდმა. მინისტრმა განაცხადა, რომ განათლების სისტემის ახალ კონცეფციას მალე წარმოადგენს. ახლა საინტერესოა, როგორი იქნება ახალი ხედვა, როგორი გუნდი წარდგება ამ ხედვის და ამ კონცეფციის სარეალიზაციოდ საზოგადოების წინაშე, რა ვადები იქნება დასახელებული.“
განათლების ექსპერტი იმაზეც საუბრობს, რომ თუკი წარმატების მიღწევა გვინდა, განათლების სისტემის გააზრების მიზნების ერთიანი ველი უნდა შეიქმნას, მისი მიღწევის მექანიზმები და ა.შ. თუ არ არის ასეთი ერთიანი ველი, ცალ-ცალკე თუნდაც გონივრული აქტივობები სხვადასხვა უბანზე სრულფასოვანი შედეგის მომტანი ვერ იქნება. „ამიტომ, პირველი, რასაც ვისურვებდი ეს არის, შეიქმნას ერთიანი სივრცე განათლების სისტემის, სადაც ყველა კომპონენტი სინქრონულად იმოქმედებს ერთი მიზნის მისაღწევად. რიგ შემთხვევაში, საზოგადოებას შეუმჩნევია, რომ განათლების სისტემის სხვადასხვა კომპონენტი მთლად შეხმატკბილებულად არ მუშაობს.“
განათლების სისტემის რეფორმას და საკადრო ცვლილებებს ზოგადად დადებითად აფასებენ განათლების სხვა ექსპერტებიც და თანხმდებიან, რომ ახლა მთავარია საერთო კონცეფციის შემუშავება, რომელიც სისტემას არსებული ჩიხიდან გამოიყვანს.
რეზო აფხაზავა, განათლების ექსპერტი: „მნიშვნელოვანია, რომ ის რამდენიმე მიმართულება და პროგრამა, რომელიც წარმატებით მუშაობდა, ის კურსი დეცენტრალიზაციის შენარჩუნებულ იქნეს და ის სიახლეებიც, რომლებსაც უახლოეს მომავალში გვპირდებიან, იყოს მართლაც რეალურად სკოლისა და ზოგადად განათლების სისტემის განვითარებაზე ორიენტირებული.“
განათლების ექსპერტ თამარ მოსიაშვილს მიაჩნია, რომ ჩიხია ყველა მიმართულებით — გამოცდების, მასწავლებელთა პროფესიული განვითარების, ხარისხის მართვის და სხვ. ძალიან ბევრი პრობლემაა, რასაც, მისი აზრით, კომპეტენტური ადამიანებისგან შემდგარი გუნდი ნამდვილად წაადგებოდა.
მინისტრის ბრიფინგზე განათლების სისტემის მაღალი თანამდებობის პირების განთავისუფლება მოულოდნელი აღმოჩნდა საზოგადოებისთვისაც და, როგორც ჩანს, თავად განთავისუფლებულთათვის.
თეიმურაზ მურღულია განათლების მინისტრის მოადგილის თანამდებობას 2016, ლია გიგაური — 2013 წლიდან იკავებენ. მათი შესაძლო გათავისუფლების შესახებ საუბარი მას შემდეგ გააქტიურდა, რაც ახალი მინისტრის პირობებში სახელმძღვანელოების გრიფირების პროცესში გამოვლენილი ხარვეზების შესწავლა დაიწყო. უკავშირდება თუ არა ეს საკითხი მათ გათავისუფლებას, ამაზე მიხეილ ბატიაშვილს არ უსაუბრია. თავად მურღულია ამ კავშირს კატეგორიულად გამორიცხავს და მინისტრის გადაწყვეტილებას პრინციპულ საკითხებზე შეუთანხმებლობით ხსნის. „თუ ვინმე შეეცდება ჩირქი მოსცხოს გრიფირების პროცესს, მზად ვარ პასუხი გავცე. თუ ამ მიმართულებით ვინმეს რაიმე პრეტენზია აქვს, ჯერ ამის შესწავლა და განხილვა უნდა მოხდეს. როდესაც განხილვა არ არის დასრულებული, შეფასებების გაკეთება შეუძლებელია.
იცით, რომ ამ თანამდებობისგან დამოუკიდებლად ვარ რექტორის მოვალეობის შემსრულებელი ქუთაისის საუნივერსიტეტო კომპლექსის და ჯერჯერობით იქ კიდევ არის საქმეები, რომელიც მისახედია. ამიტომ მომიწევს ამ ვალდებულებების შესრულება. მერე ვნახოთ!“
შეფასებისა და გამოცდების ეროვნული ცენტრის ხელმძღვანელის, მაია მიმინოშვილის სახელი, ბოლო პერიოდში, სამაგისტრო გამოცდების ირგვლივ განვითარებულ მოვლენებს უკავშირდება. ცენტრმა საკუთარ საიტზე, სავარაუდოდ, საგამოცდო ტესტების სწორი პასუხები წინასწარ გამოაქვეყნა. თუმცა ცენტრმა ეს ინფორმაცია მალევე უარყო. ეროვნული გამოცდებისას კონდიცირების მოუწესრიგებელ სისტემასთან დაკავშირებით შეფასებისა და გამოცდების ეროვნული ცენტრის ხელმძღვანელმა პრემიერისგან საჯარო კრიტიკა დაიმსახურა.
მასწავლებელთა პროფესიული განვითარების ეროვნული ცენტრის უკვე ყოფილი დირექტორი გიორგი მაჩაბელი მიიჩნევს, მინისტრის გადაწყვეტილებაში არაბუნებრივი არაფერია და ამბობს, რომ ეს მინისტრისა და მისი ერთობლივი გადაწყვეტილება იყო, რადგან იგეგმება განათლების რეფორმის ახალი ტალღა. საკადრო ცვლილებები, რომელიც განხორციელდა, სულაც არ ნიშნავს, რომ ვიღაცამ რაღაც მიზანს ვერ მიაღწია ან ვიღაცამ ცუდად იმუშავა. ამა თუ იმ ეტაპზე არის გარკვეული გარემოებები, ამ ეტაპზე ასე ჩაითვალა საჭიროდ.
ცვლილება განათლების ხარისხის განვითარების ეროვნულ ცენტრსაც შეეხო, რომლის სახელს, ბოლო პერიოდში, სამი ხმაურიანი საქმე უკავშირდება: გასული წლის იანვარში, ავტორიზაციის საბჭომ ავტორიზაცია გაუუქმა ბათუმში მდებარე შაჰინის სკოლას, იმავე საბჭოს გადაწყვეტილებით, აგვისტოში ფუნქციონირება შეწყვიტა დემირელის კოლეჯმა. შავი ზღვის საერთაშორისო უნივერსიტეტს კი, 2018-19 სასწავლო წელს, პირველკურსელთა მიღების უფლება ჩამოერთვა. ამ გადაწყვეტილების გამო უნივერსიტეტის სტუდენტებმა აქცია განათლების სამინისტროსთან 10 სექტემბერსაც გამართეს. უკავშირდება თუ არა თამარ სანიკიძის გათავისუფლება ამ ხმაურიან საქმეებს? ალბათ, ამ კითხვაზე პასუხს მალე შევიტყობთ ისევე, როგორც სხვა საკადრო ცვლილებების მიზეზების შესახებაც.
თამარ სანიკიძე კოლეგებს ფეისბუქგვერდზე გამოქვეყნებული სტატუსით დაემშვიდობა: „მინდა მივმართო ჩემს კოლეგებს და თანამშრომლებს, რადგან ყველასთან პერსონალურად დამშვიდობება ვერ მოვახერხე. 2016 წლიდან მოყოლებული, რომ არა თქვენი საქმისადმი დამოკიდებულება და სურვილი, რომ რეალური გარდატეხა მომხდარიყო იმ სისტემაში, რომელსაც ჩვენ ყველანი ვემსახურებით, შეუძლებელი იქნებოდა იმ პროცესების განხორციელება და იმ შედეგების მიღწევა, რასაც ბოლო ორი წლის მანძილზე მივაღწიეთ.“
მიმდინარე კვირას მიხეილ ბატიაშვილი განათლების სისტემის ახალ რეფორმას წარადგენს, სავარაუდოდ, თვის ბოლოს კი, გრიფირების პროცესში არსებული ხარვეზების შესახებ სამინისტროს შიდა აუდიტის დასკვნა გასაჯაროვდება. მინისტრის განმარტებით, კონკრეტული პირების პასუხისმგებლობის საკითხი სწორედ ამის შემდგომ დადგება.
ცვლილებები კი გაგრძელდება და როგორც მიხეილ ბატიაშვილმა განაცხადა, უახლოეს მომავალში, საზოგადოება განათლების სისტემის ახალ, თამამ გადაწყვეტილებებზე ორიენტირებულ კადრებს გაიცნობს, რომელთა დანიშვნაც შესაბამისი პროცედურების გავლით მოხდება. „დღევანდელი საკადრო ცვლილებები არის მხოლოდ ნაწილი და ვფიქრობთ, რომ რეფორმისთვის უნდა მოვემზადოთ საფუძვლიანად და განათლების ყველა მიმართულებით მოგვიწევს მნიშვნელოვანი ნაბიჯების გადადგმა. მიგვაჩნია, რომ ახალმა გუნდმა ახალი ხედვით და მეტი ენერგიით უნდა შეძლოს ამ რეფორმების განხორციელება.“ — აცხადებს მინისტრი.
მოამზადა ლალი თვალაბეიშვილმა
|