2015-12-10 მთავარი გზავნილი — ხარისხის მუდმივი გაუმჯობესება რუბრიკის სტუმარია შოთა მესხიას
ზუგდიდის სახელმწიფო სასწავლო
უნივერსიტეტის რექტორი თეონა ხუფენია
— ქალბატონო თეონა, რადგან უნივერსიტეტის ბიუჯეტს, ძირითადად, განსაზღვრავს სტუდენტების რაოდენობა, უმაღლესი სასწავლებელი დაინტერესებულია რაც შეიძლება მეტი სტუდენტი მიიღოს. ხომ არ ხდება ეს ხარისხის ხარჯზე? მოგწონთ თუ არა დაფინანსების არსებული სისტემა და რამდენად აკმაყოფილებს უნივერსიტეტის მოთხოვნებს განსაზღვრული ფინანსები. არსებობს თუ არა დაფინანსების სხვა გზა ან სხვა პრინციპი? თქვენთვის რომელი იქნებოდა სასურველი?
— უნდა ვაღიაროთ, რომ უნივერსიტეტის ბიუჯეტი, ძირითადად, სტუდენტების რაოდენობაზეა მიბმული და, ლოგიკურია, ადმინისტრაციის ინტერესშია სტუდენტთა კონტინგენტის ზრდა. თუმცა, ერთმნიშვნელოვნად უნდა აღინიშნოს, რომ კონტინგენტის ზრდა ხელოვნურად შეუძლებელია. ჩვენს მაგალითზე ეს განსაკუთრებით ცხადია. უნივერსიტეტის დაფუძნებიდან, 2007 წლიდან დღემდე, აბიტურიენტთა განაცხადის სტატისტიკა მნიშვნელოვნად მზარდია, რაც განპირობებულია უნივერსიტეტში სწავლების ხარისხით. მაგრამ კონტინგენტი მცირდება სახელმწიფოს მიერ პრიორიტეტულად გამოცხადებულ, დაფინანსებულ ფაკულტეტებზე, რადგან, შოთა მესხიას ზუგდიდის სახელმწიფო სასწავლო უნივერსიტეტი, მოგეხსენებათ, „სასწავლო უნივერსიტეტის“ სტატუსის მქონეა, შესაბამისად, ვერ ახორციელებს სამინისტროს მიერ დაფინანსებულ სპეციალობებზე სწავლებას. ხოლო იმ უნივერსიტეტების მაგალითზე, სადაც უფასო პროგრამები ხორციელდება, სტატისტიკა ადასტურებს, რომ აბიტურიენტთა ინტერესი მეტწილად მიემართა სწორედ დაფინანსებისკენ (რაც აიხსნება ქვეყნის მოსახლეობის საერთო სოციალური ფონით) და არა სწორი არჩევანისკენ, რაც, თავის მხრივ, რეგიონიდან კონტინგენტის გადინების საფუძველია.
უმაღლესი განათლების დაფინანსება — სუფსიდირება, რომელსაც იღებდა უნივერსიტეტი საქართველოს განათლებისა და მეცნიერების სამინისტროს მხრიდან, დაფუძნებიდან სამი წლის განმავლობაში, ადმინისტრაციამ მიმართა, ძირითადად, მატერიალურ-ტექნიკური ბაზის თანამედროვე ტექნოლოგიებით აღჭურვისთვის. შეიქმნა სტუდენტსა და აკადემიურ პერსონალზე ორიენტირებული გარემო, რამაც კარგად წარმოაჩინა ახალდაფუძნებული რეგიონული უნივერსიტეტის სტრატეგია და ხედვა. აღნიშნული ტიპის დაფინანსება იმ ეტაპზე უნივერსიტეტის წარმატების საწინდარი იყო. შემდეგ იყო სამინისტროს მიერ დაფინანსებული აკადემიური პერსონალის ხელშეწყობის პროგრამები, რაც კვალიფიციური ადამიანური რესურსის მოზიდვის კარგი საფუძველი გახდა.
დღესაც უნივერსიტეტის მთავარი გზავნილი სწორედ ხარისხის მუდმივი გაუმჯობესებაა. რაც შეეხება დაფინანსების დღევანდელ სისტემას, უკვე აღვნიშნე, როგორც სასწავლო უნივერსიტეტი, ვერ ვახორციელებთ უფასო პროგრამებს და, შესაბამისად, ვერ ვიღებთ დაფინანსების ამ წყაროს, რაც უნივერსიტეტისთვის სტაბილური შემოსავლის გარანტი იქნებოდა. მიგვაჩნია, რომ ხარისხის მუდმივი სრულყოფისთვის უმაღლეს სამთავრობო დონეზე უნდა შემუშავდეს, განსაკუთრებით რეგიონული უნივერსიტეტების, გაძლიერების სტრატეგია. უმაღლესი განათლების ხარისხის განმსაზღვრელი არ უნდა იყოს მხოლოდ უნივერსიტეტის სტუდენტთა კონტინგენტი, ე.ი. უნივერსიტეტის ბიუჯეტი უნდა შედგებოდეს არა მარტო სტუდენტთა შემონატანისგან, არამედ მოიცავდეს ცენტრალურ და რეგიონულ დაფინანსებას, რათა უნივერსიტეტმა უპასუხოს ქვეყნისა და რეგიონის გამოწვევას. გასათვალისწინებელია საქართველოს განათლებისა და მეცნიერების სამინისტროს მთავარი გამოწვევა — უმაღლესი საგანმანათლებლო დაწესებულებების ევროპული სტანდარტებით ავტორიზაცია და პროგრამული აკრედიტაციები, რაც, თავის მხრივ, მოითხოვს უმაღლესი საგანმანათლებლო დაწესებულებებისთვის დაფინანსების მოკლე და საშუალო ვადიანი მოდელების შექმნას.
— აბიტურიენტების გარკვეულ ნაწილს, რომლებმაც მინიმალური ზღვარი გადალახეს, წელს უარი ეთქვათ უმაღლეს სასწავლებლებში დარჩენილ ვაკანტურ ადგილებზე. მისაღებია თუ არა თქვენთვის ეს გადაწყვეტილება და, ზოგადად, რა აზრის ხართ მეორად ჩარიცხვებზე? გასულ წლებში გყავდათ თუ არა მეორადი ჩარიცხვის სტუდენტები და რამდენად კომფორტული იყო მათი ჩართვა სასწავლო პროცესში?
— სრულად ვეთანხმებით საქართველოს განათლებისა და მეცნიერების სამინისტროს გადაწყვეტილებას მეორად ჩარიცხვებთან დაკავშირებით. მოქმედი კანონმდებლობით აბიტურიენტი თავისუფალია არჩევანში და შესაძლებლობა აქვს გამოცდების მიმდინარეობის პერიოდშიც ცვალოს და დააზუსტოს განაცხადი.
— გაქვთ თუ არა ურთიერთობა საზღვარგარეთის სასწავლო-სამეცნიერო კვლევით დაწესებულებებთან, რომელ უნივერსიტეტებთან გაქვთ გაცვლითი და ერთობლივი, სტუდენტური, სამაგისტრო თუ სადოქტორო პროგრამები?
— შოთა მესხიას ზუგდიდის სახელმწიფო სასწავლო უნივერსიტეტი 2012 წლიდან ჩართულია Tempus-ისა და ჶrasmus მundus-ის საერთაშორისო საგანმანათლებლო პროგრამებში. ამჟამად სასწავლო უნივერსიტეტი ხუთი კონსორციუმის 22 პარტნიორი ქვეყნის წამყვანი უნივერსიტეტების რეალური და სანდო პარტნიორია, მათ შორის: შვედეთის, ბულგარეთის, პოლონეთის, პორტუგალიის, გერმანიის, საფრანგეთის, იტალიის, ესპანეთის, საბერძნეთის, ჩეხეთის, ესტონეთის, რუმინეთის. უნივერსიტეტს ჰყავს 15 ერასმუსელი გაცვლითი სტუდენტი და ევროპიდან — 3 გაცვლითი პროფესორი.
უნივერსიტეტმა მოიპოვა ახალი „ჶrasmus+“-ის მობილობისა და შესაძლებლობების გაძლიერების პროექტები, გააფორმა ინდივიდუალური ხელშეკრულება პორტოსა და ლოძის უნივერსიტეტებთან. ევროპის საერთაშორისო პროგრამებში ჩართულობის თვალსაზრისით, შოთა მესხიას ზუგდიდის სახელმწიფო სასწავლო უნივერსიტეტი ერთ-ერთი წარმატებული უნივერსიტეტია საქართველოს საგანმანათლებლო სივრცეში.
— დღეისათვის ახალგაზრდების დასაქმება ერთ-ერთი ყველაზე დიდი პრობლემაა. ხომ არ აქვს უნივერსიტეტს რაიმე პროგრამა ამ მიმართულებით საკუთარი კურსდამთავრებულებისათვის?
— Tempus-ის საერთაშორისო პროგრამის „სტუდენტური კარიერული მომსახურების განვითარება საქართველოში“ ფარგლებში, უნივერსიტეტში შეიქმნა კარიერის განვითარების ცენტრი, რომელსაც ხელმძღვანელობს და საქმიანობას წარმართავს იმავე პროგრამით გადამზადებული აკადემიური პერსონალი. ცენტრს აქვს საკუთარი გვერდი, სამუშაო სტრატეგიული გეგმა, მისია. ერთ-ერთი მთავარი მიზანია, უნივერსიტეტის ყველა სტუდენტს შესთავაზოს მრავალფეროვანი სერვისი მათი დასაქმების შესაძლებლობის გაზრდისა და პროფესიული წარმატების მისაღწევად, ცენტრი ადგენს რეგიონის დამსაქმებელთა კარიერულ მოთხოვნებს, რის შესაბამისად უზრუნველყოფს სტუდენტთა და კურსდამთავრებულთა კარიერულ განათლებას. შექმნილია კურსდამთავრებულების მონაცემთა ბაზა, რომელიც განახლებული სახით მიეწოდება დამსაქმებელს. უნივერსიტეტი ყოველწლიურად მონაწილეობს სტუდენტური დასაქმების ფორუმში, რეგულარულად ეწყობა როგორც გასვლითი, ისე საუნივერსიტეტო შეხვედრები სამთავრობო და არასამთავრობო ორგანიზაციებთან, მაღალია რეგიონში დამსაქმებელთა ინტერესი საგანმანათლებლო პროგრამებისა (რომლებიც მათი აქტიური ჩართულობით იქმნება) და კურსდამთავრებულთა მიმართ.
— ხშირად სტუდენტები გამოთქვამენ პრეტენზიას საჭირო სახელმძღვანელოების ქართულ ენაზე არარსებობის გამო, არის თუ არა თქვენთან ეს პრობლემა და თუ ასეა, როგორ აგვარებთ?
— უნივერსიტეტის ბიბლიოთეკა აღჭურვილია თანამედროვე ტექნოლოგიებით და საქართველოს განათლებისა და მეცნიერების სამინისტროს მხარდაჭერით ჩართულია ელსევიერის საერთაშორისო სამეცნიერო ელექტრონულ ბაზაში.
საგანმანათლებლო პროგრამების შესაბამისად, უნივერსიტეტის სამეცნიერო ბიბლიოთეკა უზრუნველყოფს სტუდენტებს როგორც ქართული, ისე უცხოენოვანი ლიტერატურით. გარკვეულ მიმართულებებში შეინიშნება ქართულენოვანი სახელმძღვანელოების სიმწირე. აკადემიური პერსონალი, უცხო ენათა შემსწავლელ ცენტრთან ერთად, უზრუნველყოფს სპეციალური ლიტერატურის თარგმანს.
— რას გვეტყვით სტუდენტური თვითმმართველობის შესახებ, აფინანსებს თუ არა უნივერსიტეტი მის საქმიანობას?
— ეს ის თემაა, რომელსაც ვერ გამოვყოფ უნივერსიტეტის საქმიანობის სფეროებიდან, რადგან ყველა პროექტი, პროგრამა თუ აქტივობა თითოეული სტუდენტის და საერთოდ თვითმმართველობის ინიციატივით იგეგმება, ვითარდება და ხორციელდება, ჩვენ ერთი მთლიანი დიდი გუნდი ვართ. ეს ის მიდგომაა, რითაც ვფიქრობ, გამოირჩევა უნივერსიტეტი.
— გვიამბეთ საუნივერსიტეტო ფონდის საქმიანობის შესახებ, ასეთის არსებობის შემთხვევაში (წარმატებული სტუდენტების წახალისება, სოციალურად დაუცველთა დაფინანსება და ა.შ.).
— უნივერსიტეტში გაიცემა სახელმწიფო, მერის, მუნიციპალიტეტის, სახელობითი და საფაკულტეტო სტიპენდიები, მოქმედებს როგორც სახელმწიფოს მიერ დაფინანსებული, ისე საუნივერსიტეტო სოციალური პროგრამები. როგორც მოგეხსენებათ, შოთა მესხიას ზუგდიდის სახელმწიფო სასწავლო უნივერსიტეტის კონტინგენტის თითქმის ნახევარი აფხაზეთიდან დევნილი და სოციალურად დაუცველი სტატუსის მქონე სტუდენტია. დე ფაქტო საზღვრისპირა რეგიონის უნივერსიტეტის მთავარი მისია, უპირველესად, ამ სტუდენტებზე მორგებული გარემოს შექმნა და მათზე ორიენტირებული პროექტების განხორციელებაა.
მოამზადა მაკა ყიფიანმა
|