2015-11-12
2016 წელს გამოცდები ნაწილობრივ ელექტრონული ფორმატით ჩატარდება
შეფასების და გამოცდების ეროვნული ცენტრის დირექტორმა, მაია მიმინოშვილმა საგანგებო ბრიფინგი გამართა ჟურნალისტებისთვის 2016 წელს გამოცდების ნაწილობრივ ელექტრონული ფორმატით ჩატარებასთან დაკავშირებით.
„დღეს იმ სიახლეებზე მინდა გესაუბროთ, რაც 2016 წლის ზაფხულის გამოცდებისთვის გვაქვს დაგეგმილი. მნიშვნელოვანი სიახლეა და გვინდა, რაც შეიძლება დროულად გამოვაცხადოთ, რომ ჩვენი აპლიკანტები მაქსიმალურად მომზადებულები შეხვდნენ ახალ ფორმატს, რომელსაც 2016 წელს შევთავაზებთ. აპლიკანტებში ვგულისხმობ არა მხოლოდ აბიტურიენტებს. მოგეხსენებათ, რომ ზაფხულის საგამოცდო პროცესში მონაწილეობენ არა მხოლოდ აბიტურიენტები, არამედ მაგისტრობის მსურველები, სტუდენტები, რომლებიც საგრანტო კონკურსში მონაწილეობენ და, რაც ყველაზე მთავარია, პედაგოგები, რომლებიც საგნობრივ გამოცდებს აბარებენ.
ჩვენ ვაპირებთ გამოცდების ელექტრონული ფორმით შემოღებას, თუმცა, ეს პირველი ეტაპია. იმისათვის, რომ აპლიკანტებისთვის ეს მტკივნეული არ იყოს, არ იგულისხმება მთლიანად ელექტრონული ფორმით გამოცდების ჩატარება. საუბარია ნახევრად ელექტრონულ ფორმატზე, მარტივად რომ ვთქვათ, ტესტურ დავალებებს აპლიკანტები ელექტრონული ფორმით მიიღებენ და არა ბეჭდურით. მათ მუშაობა მოუწევთ პასუხების ფურცლებზე. დანარჩენი არაფერი იცვლება, ყველა აპლიკანტს ექნება შესაძლებლობა შავი სამუშაოსთვის განკუთვნილ ფურცლებზეც იმუშაოს. კიდევ ერთხელ ხაზგასმით მინდა აღვნიშნო, მხოლოდ და მხოლოდ ტესტურ დავალებებს მიიღებენ ელექტრონული ფორმით, დავალებას წაიკითხავენ ეკრანზე და პასუხების გაცემა ელექტრონული ფორმით, 2016 წელს, მათ არ მოუწევთ.
მთლიანად ელექტრონული ფორმით გამოცდების ჩატარება დაიგეგმება მაშინ, როდესაც დარწმუნებული ვიქნებით, რომ ჩვენს აპლიკანტებს, იქნებიან ეს პედაგოგები თუ აბიტურიენტები, არანაირი პრობლემა რა ექნებათ, რომ ელექტრონული ფორმით გასცენ პასუხი დავალებებს. ალბათ დამეთანხმებით, რომ თუნდაც თხზულების შემთხვევაში, ფიზიკაზე და მათემატიკაზე რომ არ ვისაუბროთ, სულ სხვაა, როცა წერ და სულ სხვაა, როცა ბეჭდავ. ამისთვის ყველა ერთად უნდა მოვემზადოთ. პირველი ეტაპი, ჩემი აზრით, სრულიად უმტკივნეულო შევთავაზეთ, თუმცა ეს იქნება ძალიან დიდი ნაბიჯი წინ.
მიუხედავად იმისა, რომ გადაწყვეტილება პრინციპულად მიღებულია (2016 წელს ეს სიახლე შევთავაზოთ ჩვენს აპლიკანტებს), ეს წელიწადი, ბუნებრივია, წლის ბოლომდეც და შემდეგ უკვე გამოცდებამდე, დაეთმობა არაერთ აპრობაციას. პირველი აპრობაცია დეკემბერში გვაქვს დაგეგმილი. ავირჩევთ ერთ-ერთ საგამოცდო ქალაქს ან საგამოცდო ცენტრს, სავარაუდოდ, ეს იქნება თელავის საგამოცდო ცენტრი. გვინდა, მოვახერხოთ საგამოცდო პროცესის სრული იმიტაცია. ეს აპრობაცია, ძირითადად, გვაჩვენებს ტექნიკურად რა არის დასახვეწი. ბუნებრივია, ყველა საგამოცდო ცენტრი უნდა იყოს სათანადოდ აღჭურვილი და მაქსიმალურად კომფორტული ჩვენი აპლიკანტებისთვის. ასე რომ, დეკემბერში პირველი აპრობაცია გვაქვს, თებერვალში კი გაცილებით ფართომასშტაბიანი აპრობაცია და პილოტირება გვაქვს დაგეგმილი.
პირველი აპრობაცია არ გულისხმობს შინაარსობრივი მხარის აპრობაციას. ეს არის, ვიმეორებ, ტექნიკური ნაწილის შემოწმება, მუშაობს თუ არა ყველაფერი სათანადოდ. ბუნებრივია, აპრობაციის შემდეგ კიდევ გვექნება საუბარი კონკრეტულ დეტალებზე, გამოიკვეთება, რა უნდა დაიხვეწოს, შეიცვალოს. ბუნებრივია, ეს უკვე დეკემბრის მეორე ნახევრისთვის დაიგეგმება“.
მაია მიმინოშვილმა ჟურნალისტების შეკითხვებსაც უპასუხა.
— ვინ მიიღებს მონაწილეობას დეკემბერში დაგეგმილ აპრობაციაში?
— ამჯერად გვინდა მოვიწვიოთ აბიტურიენტები, ძირითადად, მეთორმეტეკლასელები. შეგნებულად შევარჩიეთ ცენტრი არა თბილისში, არამედ რეგიონში და, როგორც მოგახსენეთ, სავარაუდოდ, იქნება თელავი ან ოზურგეთი. შევარჩიეთ ისეთი საგამოცდო ცენტრი, რომელიც არ არის დიდი. იმიტომ რომ, აპრობაციისთვის სრულიად საკმარისია 20-დან 30 სექტორამდე შევავსოთ, მაგრამ საგამოცდო ცენტრი ნამდვილად ისე იქნება მოწყობილი, როგორც გამოცდის დროს.
რაც ყველაზე მთავარია, ნებისმიერ აპლიკანტს ექნება შესაძლებლობა, ბუკლეტის ელექტრონული ფორმატი იხილოს ნოემბრის ბოლოსთვის, ჩვენს ვებგვერდზე — www.naec.ge განთავსდება ელექტრონული ტესტური ბუკლეტების ნიმუშები. პარალელურ რეჟიმში, ჩვენმა ორგანიზაციამ წამოიწყო ახალი პროექტი, რომლის აპრობაციაც ახლა მიმდინარეობს — „აბიტურიენტების მხარდამჭერი პროექტი“. თუმცა, ვვარაუდობ, რომ შემდეგ ეტაპზე უკვე ნებისმიერ აპლიკანტს — მაგისტრობის მსურველებს, პედაგოგებს — ექნება შესაძლებლობა, შეაფასოს თავისი თავი, ცოდნა და შესაძლებლობები. ვინც ამ პროექტში ჩაერთვება, მეტი შესაძლებლობა ექნება, მთლიანად გაიაროს პროცესი, დაწყებული ტესტირების იმიტაციით ელექტრონული ფორმატით და დასრულებული გასწორების პროცედურით და შედეგების მიღებით.
— რამ განაპირობა ელექტრონულ ფორმატზე გადასვლის აუცილებლობა?
— 21-ე საუკუნეში კითხვა — რატომ არის აუცილებელი ახალი ტექნოლოგიების გამოყენება, თუნდაც სასწავლო პროცესში თუ შეფასების სისტემაში, მარტივად საპასუხოა — ახალი ტექნოლოგიები გაცილებით ეფექტურია, მეტ შესაძლებლობებს გვაძლევს, განსაკუთრებით შეფასების კუთხით, გაცილებით მრავალფეროვანია. თუ არ დავიწყეთ იქითკენ სვლა, რომ საბოლოოდ მთლიანად ელექტრონულ ფორმატზე გადავიდეთ, ბუნებრივია, ამას ერთ ან ორ წელიწადში ვერ მოვახერხებთ. საუბარია იმაზე, რომ თუნდაც ნახევრად ელექტრონული ფორმატი რატომ უნდა იყოს უფრო მისაღები ჩვენთვისაც და, პირველ რიგში, აპლიკანტებისთვის. ეს ფორმატი გვაძლევს შესაძლებლობას, თვითონ ტესტური დავალებები იყოს უფრო მრავალმხრივი. მაგალითად, ბეჭდური სახით ბუკლეტების მიწოდება, ბუნებრივია, გარკვეულ შეზღუდვებს ითვალისწინებს — არ შეიძლება ტესტური ბუკლეტი იყოს, მაგალითად, 100-გვერდიანი. ამ შემთხვევაში, ჩვენ იძულებული ვართ, ერთ გვერდზე მოვათავსოთ არა ერთი დავალება, არამედ რამდენიმე და მაქსიმალურად გამოვიყენოთ ცარიელი ადგილები, რომ ტესტის ბუკლეტი არ იყოს წიგნივით აკინძული. ელექტრონული ფორმატის შემთხვევაში, არ ხარ გვერდებით შეზღუდული და ერთ გვერდზე შეიძლება ეკრანზე განათავსო მხოლოდ ერთი დავალება.
მეორე, ბუნებრივია, ბეჭდური სახის ბუკლეტში ჩვენ გვაქვს ფერადი გვერდები, მაგალითად, ბიოლოგიის ან ხელოვნების ტესტში. იმიტომ რომ, დავალება კარგად აღიქვას აპლიკანტმა, აუცილებელია, მიაწოდო ფერადი ნახატით, მაგრამ არის ისეთი დავალებებიც, სადაც სასურველია ნახატი იყოს ფერადი. ელექტრონულ ფორმატში არც ამით ვართ შეზღუდული. მესამე, ბუნებრივია, ამას 2016 წელს არ შევთავაზებთ, მაგრამ დავალებების მიწოდების დროს შეგვიძლია გამოვიყენოთ ანიმაციები, რაც ასევე ეფექტურია და შემდეგი ნაბიჯი სწორედ ეს იქნება.
მეოთხე, მაგალითად, ზოგადი უნარების ტესტი რომ ავიღოთ, გასწორების პროცესი გაცილებით ხანმოკლე იქნება. თქვენ იცით, რამდენი ხანი ელოდებიან აბიტურიენტები შედეგებს. ბუნებრივია, იქ, სადაც გამსწორებელია საჭირო, მაგალითად, ქართულ ენასა და ლიტერატურაში თემა სწორდება, ეს პროცესი ასეთივე იქნება, მაგრამ ელექტრონული ფორმატის შეთავაზება გვაძლევს შესაძლებლობას, აბიტურიენტებს ძალიან მალე ვაცნობოთ შედეგები, ვთქვათ, ზოგად უნარებში. ამ შემთხვევაში, არ არის საჭირო ბევრი პროცედურის გავლა, პასუხების ფურცლების სკანირება და ა.შ.
2016 წელს ისევ პასუხების ფურცლებში მოუწევთ აბიტურიენტებს პასუხების მონიშვნა, მაგრამ 2017 წლისთვის, რა თქმა უნდა, უკვე შეგვიძლია ვიფიქროთ იმაზე, რომ ელექტრონული ფორმით გასცენ პასუხები. ასეთ შემთხვევაში, მომენტალურად შეიძლება მიიღოს შედეგი აბიტურიენტმა თუ სხვა აპლიკანტმა. საბოლოო ჯამში, ელექტრონული ფორმით გამოცდების ჩატარება ძალიან ბევრ და მრავალმხრივ შესაძლებლობებს გვაძლევს.
თუმცა, ისევ ვიმეორებ, რომ ერთ წელიწადში მთლიანად ელექტრონული ფორმით გამოცდების ჩატარებაზე ვერ გადავალთ, რომ ეს ნელ-ნელა და ეტაპობრივად უნდა განვახორციელოთ, ჩვენი აპლიკანტების მდგომარეობის გათვალისწინებით. 2016 წელი ნამდვილად პირველი ნაბიჯია იმისთვის, რომ შემდეგ უფრო მრავალმხრივი გახდეს პროცესი.
— რა არის საჭირო, რომ საგამოცდო ცენტრები შესაბამისი ტექნიკით აღიჭურვოს? ალბათ გარკვეული დაფინანსებაა საჭირო?
— საუბარი იმაზეა, რომ საგამოცდო ცენტრები რომ შესაბამისი ტექნიკით აღიჭურვოს, აპლიკანტს უნდა ჰქონდეს პლანშეტი, ლეპტოპი, გამოვიყენოთ Wi-ფi თუ სხვა. ბუნებრივია, ეს ყველაფერი შესასყიდია.
ორი გზა არსებობს. პირველი გზა — ორგანიზაციამ ეს ყველაფერი შეისყიდოს, რადგან მისი გამოყენება შეუძლია წლების განმავლობაში, მაგრამ არსებობს მეორე გზა, რომელიც, ჩემი აზრით, გაცილებით ეფექტურია. თქვენ იცით, რომ განათლებისა და მეცნიერების სამინისტრო ყოველ წელს აცხადებს ტენდერს და შეიძენს ტექნიკას (აქ შედის პირველკლასელებისთვის საჩუქრები, მასწავლებლებისთვის საჩუქრები და ა.შ.). ჩემი აზრით, გაცილებით ეფექტურია, გარკვეული დროით, გამოცდების პერიოდში, ვითხოვოთ ეს ტექნიკა (ჩვენთვის საკმარისი რაოდენობა) და ზუსტად ისეთივე მდგომარეობაში, შეფუთული, დავუბრუნოთ განათლების სამინისტროს. ეს, ყველა შემთხვევაში, სამინისტროს გადასაწყვეტია. თუ მეორე გზას ავირჩევთ, პირდაპირ გეტყვით, რომ თანხებთან დაკავშირებით, დაჯდება ნული და სახელმწიფო ძალიან დიდ თანხას დაზოგავს, რადგან ნამდვილად არ ჯდება იაფი საზღვარგარეთ ტესტების დაბეჭდვა. თუ გავითვალისწინებთ, რომ ეს მთელ რიგ პროცედურებთანაა დაკავშირებული — სტამბასთან ვაფორმებთ ხელშეკრულებას და მას მხოლოდ და მხოლოდ ბეჭდვას კი არ ვთხოვთ, ვაძლევთ ზუსტ მითითებებს იმის თაობაზე, როგორ ჩაალაგოს საგამოცდო ცენტრების და ქალაქების მიხედვით ტესტების პაკეტები. შემდეგ ეს ტესტები ჩამოდის საქართველოში და ნაწილდება საგამოცდო ცენტრების მიხედვით. ერთი შეცდომაც კი, ვთქვათ თელავის საგამოცდო ცენტრისთვის განკუთვნილი ტესტების პაკეტი თუ არ იქნება იმ რაოდენობის და იმის ნაცვლად, რომ თელავში გაიგზავნოს, აღმოჩნდება ახალციხეში, ბუნებრივია, ძალიან დიდი საშიშროების ქვეშ დგას თვითონ ეს პროცესი. ამიტომაც, ყოველწლიურად, ისეთი შეგრძნება მაქვს, რომ „ბეწვის ხიდზე გავდივართ“, თუმცა ამ სტამბასთან მართლაც ძალიან კარგი ურთიერთობა გვაქვს აწყობილი და, ჯერჯერობით, შეცდომა არ მოსვლიათ ჩალაგების დროს.
თქვენ ვერ წარმოიდგენთ, რამდენი მაკულატურაა გამოცდების დასრულების შემდეგ, იმიტომ რომ, ის ტესტების ბუკლეტები უკვე მაკულატურაა. რა თქმა უნდა, ბუნებრივია, ამასაც ავიცილებთ თავიდან.
— რამდენად იქნება დაცული ელექტრონული ტესტები?
— სწორედ ამ მიმართულებით ინტენსიურად იმუშავა ჩვენი საინფორმაციო ტექნოლოგიების დეპარტამენტმა და დეკემბერში, პირველ რიგში, სწორედ ამის გამოცდა გვინდა — რამდენად იქნება დაცული ელექტრონული ვერსიები. საუბარია იმაზე, რომ ზუსტად 9 საათზე იწყება გამოცდა, პირობითად, ზუსტად 9 საათზე მოახერხებს აპლიკანტი, გახსნას შესაბამისი ელექტრონული ფორმატი? ამ პერიოდში, როგორ ავიცილოთ თავიდან რაიმე პრობლემა. სწორედ ამის აპრობაცია არის დეკემბერში და არა შინაარსობრივი მხარის.
წინა წლებში, ეს დაცული პაკეტი იხსნებოდა აბიტურიენტების თვალწინ და ბუკლეტები ურიგდებოდათ აბიტურიენტებს. ეს ბუკლეტი, როდესაც პაკეტები ყველა საგამოცდო ცენტრში გაიხსნება, უკვე კონფიდენციალური აღარ არის. როდესაც გამოცდა სრულდება, გამოყენებული ტესტის ბუკლეტებს ვათავსებთ ჩვენს ვებგვერდზე. ასე რომ, საუბარია იმაზე, რომ მაქსიმალურად ვიყოთ კონცენტრირებული, რომ სანამ საგამოცდო ცენტრში ელექტრონული ფორმა გაიხსნება, მანამდე იყოს მაქსიმალურად დაცული.
— მოხდება თუ არა ქულების დაჯამება ავტომატურად?
— ავტომატურად ქულების დაჯამება ვერც ერთ შემთხვევაში ვერ მოხდება, თუნდაც სრულად ელექტრონული ფორმატის შემთხვევაში. ქულების ავტომატურად დაჯამება შესაძლებელია მხოლოდ იმ შემთხვევაში, თუ დავალებები არის დახურულბოლოიანი, ანუ არჩევითპასუხიანი, სადაც უნდა მონიშნო სწორი პასუხი. მოგეხსენებათ, რომ დავალებების უმეტესობა ყველა საგანში, გარდა ზოგადი უნარებისა, არის ღია, სადაც აბიტურიენტმა უნდა ჩაწეროს პასუხი, თხზულება უნდა დაწეროს ან ამოხსნას. გასწორების პროცესი გამარტივდება იმ თვალსაზრისით, რომ მომენტალურად შეიძლება გასწორდეს დახურულბოლოიანი დავალებები, მაგალითად, ზოგადი უნარების ტესტი იმ შემთხვევაში, თუ პასუხებს ელექტრონულად გასცემს აბიტურიენტი.
ვფიქრობ, შემდეგი ეტაპი იქნება 2017 წლისთვის, როცა აპლიკანტებს შევთავაზებთ ასეთ დავალებებზე ელექტრონულად პასუხის გაცემას. ამ შემთხვევაში, ბუნებრივია, ავტომატურად დაითვლება შედეგი და, მაგალითად, აბიტურიენტებს ექნებათ შესაძლებლობა, ძალიან მალე შეიტყონ შედეგი ზოგად უნარებში, რომელიც ერთ-ერთი უმნიშვნელოვანესი გამოცდაა.
— რომელ საგანში ჩატარდება აპრობაცია?
— არ აქვს მნიშვნელობა რომელ საგანს ავირჩევთ, იმიტომ რომ, ისევ ვიმეორებ, ეს აპრობაცია ტექნიკურ მხარეს ეხება. ჩვენ უნდა მოვახერხოთ იმის აპრობაცია, რამდენი სექტორის მოცვა შეუძლია ჩვენ მიერ დამონტაჟებულ Wi-ფi-ს წერტილებს ერთ საგამოცდო ცენტრში, მხოლოდ ამის შემდეგ უნდა დავიწყოთ ფიქრი, რამდენი Wi-ფi წერტილი დაგვჭირდება მთელი საქართველოს მასშტაბით, რამდენად არის ჩვენ მიერ დაგეგმილი პროცედურით დაცული კონფიდენციალურობა, რამდენად კარგად მიდის და იხსნება დავალება და ა.შ. ასე რომ, აქ დიდი მნიშვნელობა არ აქვს რომელ საგანს შევთავაზებთ.
— „აბიტურიენტების მხარდამჭერი პროექტი“
— ახლა ამ პროექტის აპრობაცია მიმდინარეობს. საუბარია იმაზე, რომ აბიტურიენტი (მომავალში ყველა აპლიკანტს შევთავაზებთ) რეგისტრირდება და არის რამდენიმე შესაძლებლობა: უნდა, რომ ელექტრონული ფორმით ტესტური ბუკლეტი მიიღოს, თვითონ გაივარჯიშოს მასწავლებელთან ერთად და ა.შ., ეს ყველასთვის უფასოა. შემდეგი შეთავაზება გახლავთ ის, რომ თუ მათ სჭირდებათ გამოცდების ეროვნული ცენტრის მომსახურება, დამატებით — ვუგზავნით პასუხების ფურცლებს, ისეთივეს, როგორიც ექნებათ გამოცდაზე; მათ შეუძლიათ თვითონვე მოიწყონ სამუშაო პირობები — სამი საათია გამოყოფილი ზოგადი უნარებისთვის, დაინიშნონ დრო და სამ საათში რასაც მოახერხებენ, ის შეასრულონ. შემდეგ ამას კონვერტში დებენ და აგზავნიან. იმუშავებს გამსწორებელთა ის ჯგუფი, ვინც ზაფხულში მუშაობს ჩვენთან ერთად, ასწორებენ აბიტურიენტების ნამუშევრებს და მათ პირად გვერდზე ათავსებენ შედეგებს.
მესამე შეთავაზება გახლავთ ის, რომ, თუ ოთხ საგანს, ანუ გამოცდას აირჩევს აპლიკანტი — სამი სავალდებულო და ერთ-ერთი — არჩევითი, ვთავაზობთ ასეთ რამეს — ავტომატურ რეჟიმში, პროგრამა დაუთვლის მას საკონკურსო ქულას კონკრეტული ფაკულტეტისთვის და ექნება შესაძლებლობა, ნებისმიერი ფაკულტეტი აირჩიოს. მაგალითად, უნდა ჯავახიშვილის უნივერსიტეტის სოციოლოგიის ფაკულტეტზე სწავლა, ავტომატურ რეჟიმში, ამ ფაკულტეტის საკონკურსო ქულას დაუთვლის და ექნება შესაძლებლობა, შეადაროს, 2015 წელს რომ მიეღო მონაწილეობა ერთიან ეროვნულ გამოცდებში, მოახერხებდა თუ არა მისთვის სასურველ ფაკულტეტზე ჩარიცხვას.
ტესტური დავალებების ელექტრონული ფორმა უსასყიდლოა, ნებისმიერს შეუძლია აიღოს და ისარგებლოს — ამობეჭდოს ან ელექტრონული ფორმით შეავსოს. ხოლო დამატებით მომსახურება — გამსწორებლების დაქირავება და მათი მუშაობა, რა თქმა უნდა, ფასიანია.
მოამზადა ლალი თვალაბეიშვილმა
|
