2015-11-05 საგანმანათლებლო ტრადიციები და თანამედროვე გამოწვევები მარტვილი, იგივე ჭყონდიდი, დიდი ისტორიული და კულტურული წარსულის კერაა. ჯერ კიდევ ხ საუკუნეში აქ მოღვაწეობდნენ ჰიმნოგრაფები — იოანე მინჩხი და სტეფანე სანანოიძე; იწერებოდა და ვრცელდებოდა უნიკალური სასულიერო თუ საერო ნაწარმოებები, სწორედ ამ მიწაზე, მწიგნობართუხუცესის, გიორგი ჭყონდიდელის ზედამხედველობითა და მისივე იდეებით, აღიზარდა დავით აღმაშენებელი; ამ კერას უკავშირდება ანტონ ცაგარელ-ჭყონდიდელის მოღვაწეობაც.
კიდევ უფრო ადრე ჭყონდიდი წარმართული რელიგიური ცენტრი იყო. მაღალ ბორცვზე იდგა ბომონი ჭყონის (მუხის) უზარმაზარი ხე, როგორც ნაყოფიერების, გამრავლებისა და ოჯახის კეთილდღეობის მფარველი წარმართული სალოცავი. სწორედ ამ ადგილას აღიმართა ვჳჳ საუკუნეში მარტვილ-ჭყონდიდის ტაძარი ანდრია პირველწოდებულის სახელზე, რომელმაც სამეგრელოში ქრისტიანობა იქადაგა. მონასტერში იყო კრიპტერია — გადამწერ ბერთა სამყოფი. ითარგმნებოდა წიგნები, იქმნებოდა ორიგინალური ნაწარმოებები.
მართალია, ეს მცირე ექსკურსი პირდაპირ კავშირში არ არის მარტვილში ჩვენს სტუმრობასთან, მაგრამ განათლების სფეროში დღეს მიმდინარე რეფორმების, ან არსებული პრობლემების ფონზე, წარსულიც, თუნდაც ასე შორეული, შესაძლოა ყველაზე საიმედო ფუნდამენტიც იყოს სამომავლოდ.
დღეისათვის მარტვილის მუნიციპალიტეტში 37 საჯარო სკოლა ფუნქციონირებს, აქედან 7 — საბაზო საფეხურის, 2 — კერძო სკოლა. 4000-ზე მეტი მოსწავლის აღზრდას 872 პედაგოგი ემსახურება. მარტვილში განათლების მინისტრთან შეხვედრისას ნათლად გამოიკვეთა ორი საკითხი — პედაგოგთა განსაკუთრებული ინტერესი პროფესიული განვითარების სქემაში მათი ჩართვისა და კვალიფიკაციის ამაღლების მიზნით და ინფრასტრუქტურული პროექტების დროულად და ხარისხიანად განხორციელება. რესურსცენტრის უფროსი პაშა (მაკა) გულორდავა განათლებით პედაგოგია (ქართულ-რუსული ფილოლოგია, დამთავრებული აქვს იურიდიული ფაკულტეტიც) 19-წლიანი გამოცდილებით, 2014 წლიდან, კონკურსის წესით, ამ თანამდებობაზე მუშაობს. ჩვენი ინტერვიუც განათლების ხარისხის ამაღლების აუცილებლობაზე საუბრით იწყება. „სახელმწიფოებრივად მოაზროვნე ახალგაზრდა, რომელმაც სკოლაში ხარისხიანი განათლება მიიღო, ანუ მისი ცოდნა შეესაბამება ეროვნული სასწავლო გეგმით გათვალისწინებულ მიზნებს — ეს არის სკოლის მთავარი ამოცანა. ვერ ვიტყვი, რომ ჩვენი პედაგოგების (ქვეყნის მასშტაბით) პროფესიული დონე ამ მხრივ დამაკმაყოფილებელია. წინა წლებში ჩატარებული სასერტიფიკაციო გამოცდებიც ამ მიზნის მიღწევას ემსახურებოდა. დღეისთვის რაიონში მხოლოდ 200-მდე სერტიფიცირებული პედაგოგი გვყავს, თუმცა პროფესიული განვითარების ახალ სქემაში ყველა მასწავლებელია ჩართული. მე, როგორც, რესურსცენტრის უფროსს და რაიონის 4 მასწავლებელს, ჩაგვიტარდა ტრენინგები ამ საკითხის ირგვლივ, რათა კარგად გავრკვეულიყავით ყველა დეტალში, ყველა იმ მოთხოვნაში, რაც პედაგოგმა სტატუსის ასამაღლებლად, საფეხურიდან საფეხურზე გადასასვლელად უნდა დააკმაყოფილოს. ეს ინფორმაცია, შეხვედრებითა და ტრენინგებით, ელექტრონული ვერსიების სკოლებში გადაგზავნით, ყველა პედაგოგისთვის ცნობილი და ხელმისაწვდომია. ახლა ბევრი რამ მათ ძალისხმევაზეა დამოკიდებული“ — გვითხრა ქალბატონმა პაშამ.
მეორე საკითხი, რაც ასევე ძალიან მნიშვნელოვანია, ინფრასტრუქტურული პროექტების განხორციელებაა. განათლების სამინისტრო, წლების განმავლობაში, ცდილობს თანამედროვე სტანდარტებთან შესაბამისობაში მოიყვანოს სასკოლო შენობები, მაგრამ ჯერ კიდევ ბევრი სკოლა საჭიროებს სრულ ან ნაწილობრივ რეაბილიტაციას, ახლის აშენებას, შესაბამისი ტექნიკური საშუალებებით აღჭურვას. გამონაკლისი არც მარტვილია. რესურსცენტრის უფროსი ამბობს, რომ მასთან თავს იყრის ყველა ინფორმაცია, რაც სკოლების საჭიროებას ეხება, მათ შორის, ამ მიმართულებითაც. სახელმწიფოს მხრიდანაც დაუყოვნებლივ ხდება რეაგირება. წელს ოჩეს საჯარო სკოლას ნაწილობრივი რეაბილიტაცია ჩაუტარდა, სერგიეთის, აბედათის და კიწიის სკოლებს კი სრული — სულ 650 000 ლარის სამუშაო შესრულდა; გადაიხურა ლეცავეს სკოლა, მალე დასრულდება ფანჯრების ჩასმის სამუშაოები 5 სკოლაში — დოშაყეს, ნახურცილაოს, ინჩხურის, ბადას და პირველი ნამიკოლაოს. რაც შეეხებათ სოფელ ნაგებერაოს სკოლის მოსწავლეებს, სასწავლო წელი მათ სკოლის ერთ ფლიგელში დაიწყეს, თებერვლიდან გადავლენ ონოღიის სკოლაში და დაიწყება კიდეც სკოლის შენობის დემონტაჟი, რომლის ადგილზეც ახალი, 120 მოსწავლეზე გათვლილი თანამედროვე სტანდარტების, ადაპტირებული სკოლა აშენდება, ზუსტად ისეთი, როგორიც 2013 წელს აშენებული ნახუნაოს საჯარო სკოლაა.
აუცილებლად უნდა აღინიშნოს ისიც, რომ 37-ვე სკოლას სასკოლო ავტობუსები ემსახურება, რაც გაცდენა-დაგვიანებებზეც აისახა და მშობლების განწყობაზეც — სახლიდან სკოლამდე და უკან, მათი შვილების უსაფრთხო და დროული გადაადგილება უზრუნველყოფილია. ერთ-ერთ სოფელში, მაგალითად, 3 კმ-ის დაშორებით, 1 ბავშვს ატარებს ავტობუსი; 6 კმ-იან გზაზე — 2 ბავშვს, 11კმ დაშორების სოფლებიდან და უბნებიდანაც გადაჰყავთ სკოლაში მოსწავლეები. ამ სერვისით 2012-2013 სასწავლო წლიდან სარგებლობენ მარტვილის რაიონის მოსწავლეები და მათი მასწავლებლები.
კიდევ ერთ მნიშვნელოვან საკითხზე ვისაუბრეთ რესურსცენტრის უფროსთან — ეს რაიონში ინკლუზიური განათლების მხრივ შექმნილი ვითარებაა. ამბობს, რომ ძალიან მადლიერია რეგიონული მულტიდისციპლინური გუნდის, რომელიც განსაკუთრებული გულისყურით ეკიდება ამ ძალიან სათუთ თემას. დღეისათვის რაიონის 14 სკოლაში მიმდინარეობს ინკლუზიური განათლება, 3 სკოლაში შერჩევის, ხოლო 6-ში შესაფასებელი პროცედურა მიმდინარეობს. სამწუხაროდ, მათთვის აუცილებელი ფიზიკური გარემო, ჯერჯერობით, ყველა სკოლაში არ არის, ახალაშენებულის გარდა, მაგრამ მინიმალური პირობები მაინც აქვთ — 2 შინსწავლების რეჟიმზეა გადასული.
ჩვენი იქ ყოფნისას გუნდის წევრები — ცირა ნარმანია და ფატიმა ახალაია კომისიის სხდომას მართავდნენ ამ საკითხზე. იქვე გავეცანი ქალბატონ ცირას ავტორობით დაბეჭდილ ქართულისა და მათემატიკის სახელმძღვანელოებს სსსმ ბავშვებისათვის. წიგნი, პირველ რიგში, მაღალი პოლიგრაფიული ხარისხითა და უხვი თვალსაჩინო მასალით გამოირჩევა. შინაარსის შესახებ კი თავად ავტორი, ცირა ნარმანია გვიამბობს: „2003 წლიდან ვმუშაობ სპეციალური საგანმანათლებლო საჭიროების მქონე ბავშვებთან. ამ სახელმძღვანელოებში 12 წლის განმავლობაში დაგროვილი გამოცდილებაა თავმოყრილი, რომელსაც სსსმ ბავშვების მშობლებსა და მასწავლებლებს ვუზიარებ. მათში მოცემულია აქტივობები წერა-კითხვის სწავლების, მეტყველების განვითარების, მათემატიკის საფუძვლების სწავლებისა და სამყაროს შეცნობისათვის.
სახელმძღვანელო — „ქართული ენის განმავითარებელი კრებული “ — ქარული ენის სწავლების სხვადასხვა სტრატეგიებს მოიცავს და ორიენტირებულია ისეთი უნარების განვითარებაზე, როგორიცაა აღქმა, ყურადღება, აზროვნება, მეხსიერება, მოტორული უნარების განვითარება. სახელმძღვანელოში სულ 500 დავალებაა მოცემული და 50 სიტყვის შესწავლას უზრუნველყოფს, მოიცავს 33-ვე ასო-ბგერის წერა-კითხვის სწავლებას, სხვადასხვა სახალისო და საინტერესო აქტივობებით.
რაც შეეხება „მათემატიკის განმავითარებელი სავარჯიშოების კრებულს“, იგი სსსმ მოსწავლის აზროვნების განვითარებას უწყობს ხელს. კერძოდ: მარტივ კანონზომიერებებსა და სიდიდეებს შორის დამოკიდებულების ამოცნობის უნარის განვითარებას, სიტყვიერი აღწერილობის მიხედვით ფიგურის ამოცნობისა და მოდულის შექმნის უნარის განვითარებას; მოსწავლეები გაეცნობიან ნატურალურ რიცხვებს ათის ფარგლებში, შეუსაბამებენ რაოდენობას შესაბამის რიცხვს, ჩამოუყალიბდებათ მანძილის გაზომვისა და განსაზღვრის უნარი და სხვ. ეს ცოდნა და უნარი მათ სხვა საგნების შესასწავლადაც სჭირდებათ.
საკუთარი გამოცდილებიდან გამომდინარე ვამბობ, კრებულებში მოცემული აქტივობები, საკმაოდ ეფექტიანია სსსმ მოსწავლეებთან მუშაობისას. ამას იმ სკოლების სპეცმასწავლებლებიც ადასტურებენ, რომლებიც, უკვე ერთი წელია, იყენებენ მათ“.
სახელმძღანელოები, 2014 წლის სექტემბერში, საქართველოს ბანკის მომავლის ფონდის სოციალური პროექტის — „სიცოცხლის ხე“ — დაფინანსებითა და განათლების სამინისტროს მხარდაჭერით, გამოიცა და იმ საჯარო სკოლებს გადაეცა უსასყიდლოდ, სადაც სსსმ ბავშვები სწავლობენ. პრობლემა ისაა, რომ მცირე ტირაჟის გამო, სკოლებმა მხოლოდ თითო ეგზემპლარი მიიღეს. რადგან სახელმძღვანელოები ერთჯერადი მოხმარებისაა, მასწავლებელს მათში მოცემული სავარჯიშოების შავ-თეთრი ქსეროასლების გამოყენება უწევს, რაც მუშაობას ნაკლებად ეფექტურს ხდის. სკოლების მოთხოვნილების დასაკმაყოფილებლად აუცილებელია სახელმძღვანელოების ხელმეორედ და მეტი ტირაჟით გამოცემა, რაც საკმაოდ დიდ ხარჯებთანაა დაკავშირებული.
იმედი გვაქვს, კერძო სექტორის წარმომადგენლები განსაკუთრებულ გულისხმიერებას გამოიჩენენ ამ ბავშვების მიმართ, თუმცა, ვფიქრობ, პასუხისმგებლობა, პირველ რიგში, სახელმწიფოზეა და ამ კონკრეტულ შემთხვევაში, სწორედ მან უნდა გამოხატოს თანადგომა იმ მოქალაქეებისადმი, რომელთაც სპეციალური საგანმანათლებლო რესურსები ესაჭიროებათ.
მოამზადა ანა ფირცხალაიშვილმა
|