2012-12-19 ჩვენ არ ვაპირებთ რადიკალურ ცვლილებებს ინტერვიუ საქართველოს განათლებისა და მეცნიერების მინისტრის მოადგილესთან დავით ზურაბიშვილთან
ბატონო დავით, კიდევ ერთხელ განვმარტოთ — რას გულისხმობს საქართველოს განათლებისა და მეცნიერების სამინისტროს ინიციატივა სტუდენტთა დაფინანსების ზრდის შესახებ
დაფინანსებასთან დაკავშირებით საქმე ძალიან მარტივადაა — სახელმწიფო დაფინანსება ორმაგდება, Îაც შეეხება სახელმწიფო გრანტის ზღვარს — 2250-ს, ის არ შეიცვლება. თანხა გადანაწილდება 100, 70 და 50-პროცენტიან დაფინანსებებზე და გაცილებით მეტ აბიტურიენტს მიეცემა გრანტის მიღების შესაძლებლობა. კიდევ გავიმეორებ, რომ ამ ზღვრის ზრდა არ იგეგმება, გაიზრდება დაფინანსებულ სტუდენტთა რაოდენობა. ეს ცვლილება 2013 წლიდან შევა ძალაში და ერთიანი ეროვნული გამოცდების შედეგად ჩარიცხულ სტუდენტებზე გავრცელდება.
როგორი იქნება სამინისტროს ურთიერთობა უმაღლეს სასწავლებლებთან?
ახალ კონცეფციაზე განათლებისა და მეცნიერების რეფორმების სახელმწიფო კომისია მუშაობს. მათ მიერ შემუშავებული რეკომენდაციების საფუძველზე, პარლამენტში მომზადდება სათანადო საკანონმდებლო ბაზა, რომელზე დაყრდნობითაც, განათლების სამინისტრო კონცეფციის განხორციელებაზე იზრუნებს.
რაც შეეხება უმაღლეს სასწავლებლებს, პირველ რიგში, ვფიქრობ, რაც შეიძლება მეტი ავტონომიურობა უნდა მიენიჭოთ, დამოუკიდებლობის მეტი ხარისხი უნდა იყოს. მეორე — Ðროფესორებს უნდა ჰქონდეთ მეტი უფლებები და აკადემიური თავისუფლება, მათი ბედი გარკვეული პოლიტიკური ძალის გადასაწყვეტი არ უნდა იყოს და დაცულობა სახელმწიფოსგან უნდა იყოს გარანტირებული. არსებობს ე.წ. „ტენუარის ინსტიტუტი“, რაც პროფესურის როლის ზრდას გულისხმობს.
სერიოზულ გადახედვას მოითხოვს აკრედიტაციის სამსახური. ბევრი რამ საჭიროებს რეფორმირებას და საჭიროა ისეთი სტანდარტის მიღწევა, რაც მსოფლიო სტანდარტებთან მიგვაახლოებს. ამ მხრივ, დღევანდელი ვითარება ნორმალური არ არის. ვფიქრობ, თავის დროზე, როცა უმაღლესი განათლების რეფორმა ტარდებოდა, ძალიან დიდი შეცდომა იქნა დაშვებული — მივიღეთ ისეთი კანონი უმაღლესი განათლების შესახებ, რომელიც თითქმის ყველაფერს კარნახობდა უმაღლეს სასწავლებელს — რა და როგორ ეკეთებინა. იმავდროულად, რატომღაც, სკოლებში სრულიად საპირისპირო რამ მოხდა — სრული დეცენტრალიზაცია, რაც სავსებით გაუგებარი იყო.
საჭიროა, უმაღლეს სასწავლებელს მეტი თავისუფლება და ლავირების საშუალება ჰქონდეს. Ìახელმწიფოს როლი შემდეგია: პოლიტიკის განსაზღვრა და ფინანსების მიმართვა ამა თუ იმ უმაღლესი დაწესებულებისკენ.
განათლების პოლიტიკაზე მუშაობა უკვე დაწყებულია განათლებისა და მეცნიერების რეფორმების სახელმწიფო კომისიაში. მიმდინარეობს დისკუსიები ე.წ. „ტენუარის ინსტიტუტთან“ დაკავშირებით, კომისია დეტალურად იმსჯელებს ყოველ საკითხზე. უმაღლესი სასწავლებლები და ზოგადსაგანმანათლებლო სკოლები აუცილებლად ერთიან სისტემაში უნდა განვიხილოთ. ამ მიმართულებით სერიოზული მუშაობა მოგვიწევს. ისეთ სისტემას უნდა ჩავუყაროთ საფუძველი, რომელიც არ იქნება დამოკიდებული ამა თუ იმ მინისტრის მოსვლაზე და მის პოლიტიკურ შეხედულებებზე. ყოველი ახალი „გადატრიალება“ განათლების სისტემაზე ძალიან მძიმედ აისახება. ეს კონსერვატიული სისტემაა და ვერ იტანს მკვეთრ და მყისიერ ცვლილებებს, რადიკალურ სიახლეებს. აქ ყველა ცვლილება ძალიან თანმიმდევრულად უნდა განხორციელდეს.
რა ბედი ელით სამეცნიერო კვლევით ინსტიტუტებს?
თავის დროზე, ძალიან ცუდი ფორმით განხორციელდა სამეცნიერო კვლევითი ინსტიტუტების მიერთება ამა თუ იმ უმაღლეს სასწავლებელთან. თავისთავად, პირადად მე მიმაჩნია, რომ უმაღლეს სასწავლებლებთან სამეცნიერო კვლევითი ინსტიტუტების არსებობა, რაც მსოფლიოში მიღებულია, სწორია. მაგრამ, ერთია სწორი მიზანი და მეორეა გზა, რომლითაც მიდიხარ ამ სწორი მიზნისკენ. ჩვენ შემთხვევაში, სწორედ სწორი მიზნისკენ მიმავალი გზა არ იყო კარგად გააზრებული.
პირველ რიგში, ჩვენ უნდა გავარკვიოთ, რა ინსტიტუტები გვაქვს და როგორ მუშაობენ ისინი, რა პერსპექტივა აქვთ. უმეტესი მათგანი მხოლოდ სტრუქტურული ერთეულის სახითაა წარმოდგენილი, ბევრის მხოლოდ სახელია შემორჩენილი. გასარკვევია და მოსაგვარებელი ამ ინსტიტუტების შენობების პრობლემა. რა თქმა უნდა, საჭირო იქნება მეტი ფინანსები.
ამ საკითხს ძალიან ფრთხილად უნდა მოვეკიდოთ. ჯერ უნდა მოვიფიქროთ, საით გვინდა სვლა, რა იქნება ჩვენი საბოლოო მიზანი და მერე — იქამდე როგორ ვიაროთ. თუ ჩვენ ვთანხმდებით იმაზე, რომ გვინდა უნივერსიტეტებში სასწავლო და სამეცნიერო მუშაობა ერთად, უნივერსიტეტები და სამეცნიერო კვლევითი ინსტიტუტები ერთად, ამის შემდეგ უნდა განვსაზღვროთ, როგორ გავხადოთ მათი თანაარსებობა უფრო პროდუქტიული. ასე რომ, ჩემი აზრით, მთავარია სტრატეგიის განსაზღვრა. არ მიმაჩნია გამართლებულად უნივერსიტეტის ცალკე, მხოლოდ სასწავლო დაწესებულებად განხილვა. ასე იყო საბჭოთა კავშირის დროს, მაშინ სამეცნიერო მუშაობას მეცნიერებათა აკადემია უწევდა ორგანიზებას. თანამედროვე მსოფლიოში საქმე სხვაგვარადაა. რა თქმა უნდა, სამეცნიერო გაერთიანებებს თავისი მნიშვნელოვანი ადგილი აქვთ, მაგრამ უმეტესობა უნივერსიტეტებთან ფუნქციონირებს. თუ ჩვენ ამ ინტეგრაციისკენ ვაპირებთ სვლას, კარგად უნდა დავფიქრდეთ, რომელი გზა იქნება უფრო ეფექტური.
1 ოქტომბრის არჩევნების შემდეგ უმაღლეს სასწავლებლებში რექტორების გადადგომის მოთხოვნის ტენდენცია შეინიშნება
ეს გასაკვირი არ არის. საქართველოში, წმინდა პოლიტიკურად, იყო რეჟიმი, გარკვეულ წნეხს განიცდიდნენ როგორც სკოლები, ასევე აკადემიური წრეებიც. ახლა, როცა ეს წნეხი მოხსნილია, ბუნებრივად ხდება ადამიანთა გააქტიურება — ვიღაც აპროტესტებს, ვიღაცას თანამდებობაზე აღდგენა სურს, ვიღაცას მოსწონს რექტორი, ვიღაცას — არა და ა.შ. ჩვენ უნდა ვიმოქმედოთ კანონის ფარგლებში, რომ არ შეილახოს უნივერსიტეტების აკადემიური თავისუფლება და ავტონომიურობა. რა თქმა უნდა, იმ შემთხვევაში, თუ უსამართლობა იქნა დაშვებული და ვიღაც პოლიტიკური მოსაზრებით იქნა განთავისუფლებული, სამართლიანობა უნდა აღდგეს. ამიტომ, უნდა ვეცადოთ, არ იყოს დიდი უკმაყოფილება, რადგან უკმაყოფილების ფონზე ძნელია გაარჩიო ვინ დაისაჯა მართლა პოლიტიკური ნიშნით და ვის შემთხვევაში ეს ფაქტორი არაფერ შუაშია. ყველა შემთხვევა კონკრეტულადაა გასარკვევი და თუ სამართლიანობის აღდგენას მოითხოვს, ამის რესურსი უნდა გამოიძებნოს.
ჩვენ არ ვაპირებთ რადიკალურად ყველაფრის შეცვლას. ალბათ უკეთესი იქნება, მოსწონთ თუ არა კონკრეტული რექტორი, დაელოდონ არჩევნებს და იქ მიიღონ გადაწყვეტილება. დღეს ეს ნამდვილად მათი გადასაწყვეტია, ვინ იქნება ამა თუ იმ უმაღლესი სასწავლებლის რექტორი. წინა ხელისუფლების პირობებში, სამწუხაროდ, რექტორები ინიშნებოდნენ. დანიშნული რექტორები, ბუნებრივია, დამოუკიდებელ გადაწყვეტილებებს ვერ იღებდნენ და ზემოდან ელოდნენ განკარგულებებს. ამიტომ ეს მანკიერი პრაქტიკა ერთხელ და სამუდამოდ უნდა დასრულდეს.
ჩვენს გაზეთში დაიბეჭდა არა ერთი რექტორის მოსაზრება იმ ცვლილებებთან დაკავშირებით, რაც სასურველია განხორციელდეს უმაღლესი განათლების სფეროში. ერთ-ერთმა რექტორმა ყურადღება გაამახვილა განათლების მინისტრის 2011 წლის ბრძანებაზე, რომელიც 2015 წლიდან უნდა ამოქმედდეს — უმაღლეს სასწავლებელში ბაკალავრის ხარისხის დამადასტურებელი დიპლომის მისაღებად საჭიროა ინგლისურ ენაში სასერტიფიკაციო გამოცდის ჩაბარება. „ოთხი წლის მანძილზე მიღებული განათლების საპირწონე არის სასერტიფიკაციო გამოცდა ინგლისურ ენაში და რაოდენ მაღალი ხარისხის განათლებაც უნდა ჰქონდეს მიღებული ახალგაზრდას, იგი ვერ მიიღებს დიპლომს, თუ არ ფლობს ინგლისურ ენაში B2 დონის ცოდნის დამადასტურებელ სერტიფიკატს.“ უმაღლესი განათლების შესახებ კანონის მიხედვით კი, 240 კრედიტის დაგროვების შემთხვევაში, სტუდენტს ენიჭება ბაკალავრის აკადემიური ხარისხი. კანონი სხვა დამატებით მოთხოვნებს არ აფიქსირებს.
პირდაპირ გეტყვით, რომ ეს არასერიოზულია. უცხო ენის ცოდნა, რა თქმა უნდა, ძალიან მნიშვნელოვანია, მაგრამ ინგლისური ენის სავალდებულოდ გამოცხადება არ მიმაჩნია სწორი. ინგლისური ენის ცოდნის დამადასტურებელი სერტიფიკატი არ უნდა იყოს გადამწყვეტი ბაკალავრის დიპლომის გაცემის დროს. ინგლისური ენა საერთაშორისო ენაა, მსოფლიოსთან კომუნიკაციის მთავარი ენა და ახალგაზრდების უმრავლესობა, დავალდებულების გარეშეც, ცდილობს დაეუფლოს. ინგლისური ენის შესწავლის ტენდენცია ბუნებრივად ვითარდება და ეს მომავალშიც ასე იქნება.
თუმცა, ეს არ არის უშუალოდ ჩვენს მეზობლებთან საურთიერთო ენა, ჩვენ არ გვესაზღვრება ინგლისურენოვანი ქვეყნები, უფრო რუსულენოვანი ქვეყნებია. მაგალითად, სკანდინავიის ქვეყნები შეთანხმდნენ, რომ ერთმანეთში ინგლისურად ილაპარაკონ. იქ ბრიტანული კულტურის გავლენა ყოველთვის ძალიან დიდი იყო, ისევე როგორც გერმანულის. მაგრამ ერთმანეთთან საკონტაქტოდ ინგლისური აირჩიეს. ჩვენ ვერასოდეს ვიქნებით ისეთი ინგლისურენოვანი ქვეყანა, მაგალითად, როგორიცაა ინდოეთი. ეს ქვეყანა ბრიტანეთის კოლონია იყო. იქ ათასობით სხვადასხვა ენაზე და დიალექტზე მოლაპარაკე ეთნოსური ჯგუფია, მათი დამაკავშირებელი ენა გახდა ინგლისური. საქართველოს შიგნით ეს პრობლემა არ დგას. ჩვენ ინგლისური ენა მსოფლიოსთან საურთიერთოდ გვინდა. თუ ხელს შევუწყობთ, კარგი იქნება, მაგრამ დავალდებულება მიზანშეწონილი არ არის. ბაკალავრიატის დიპლომის მისაღებად ინგლისური ენის ცოდნის სავალდლებულოდ გამოცხადება, ამ ენის შესწავლას ფორმალურ ხასიათს მისცემს.
ესაუბრა
ლალი თვალაბეიშვილი
|