2011-12-08 თანადგომით გადალახული სიძნელეები დღევანდელ საქართველოში ბავშვების დიდი რაოდენობა უდედ-მამოდ ან ერთ მშობელთან ერთად იზრდება. ვანის რაიონის სოფელ ამაღლების საჯარო სკოლის 215 მოსწავლიდან, დაახლოებით 60% სწორედ ამ კატეგორიას განეკუთვნება. არიან ბავშვები, რომელთაც 7-8 წელია მშობელი არ უნახავთ, ერთი ისეთიცაა საერთოდ რომ არ იცნობს დედას. მშობლები ასეთ მძიმე გადაწყვეტილებას შვილებზე ზრუნვით ხსნიან, აი, შვილებს კი განსხვავებული აზრი აქვთ — მათ ყველაზე მეტად დედ-მამა სჭირდებათ. პედაგოგები ამბობენ, რომ უმშობლოდ დარჩენილები აშკარად ატარებენ განშორებით გამოწვეულ სევდას და მათ განსაკუთრებული მიდგომა და თანადგომა სჭირდებათ, რომ სამუდამო დაღად არ ექცეთ ბავშვობისდროინდელი განცდები.
ამ მძიმე ფონზე უკვე ნაკლებად შემაშფოთებელი ჩანს ამავე სკოლის 63 სოციალურად დაუცველი ბავშვის არსებობა, რომლებიც სახელმწიფოსა თუ კეთილი ადამიანების ქველმოქმედების იმედად, მაგრამ საკუთარი ოჯახის წევრებთან ერთად, უმკლავდებიან ყოველდღიურ სიძნელეებს, უფრო ბედნიერებიც კი მგონია, ვიდრე ისინი, ვისაც ხშირად მოსდით სხვადასხვა ევროპული ქვეყნიდან ტანისამოსითა თუ ათასგვარი საჩუქრებით სავსე ამანათები...
რაც შეეხება სკოლას, პარადოქსია, მაგრამ იგი სულაც არ ჰგავს ასეთი გაჭირვებული სოფლის სკოლას. არ ჰგავს არც შენობითა და ეზოთი, რომელიც სანიმუშოდაა მოვლილი, არც მოსწავლეებისა და მასწავლებლების გარეგნობით და, რაც ყველაზე მთავარია, არც ხალისიანი და ღიმილიანი შეხვედრით, რომელიც ასე დამახასიათებელია, ზოგადად, იმერეთში და ასე აუცილებელია ადამიანთა ურთიერთობისთვის.
***
სოფლის სახელი „ამაღლება“ მაცხოვრის ამაღლების სახელობის ეკლესიის არსებობას უკავშირდება და საისტორიო წყაროებში VI- VIII საუკუნეებიდან მოიხსენიება. პირველ საგანმანათლებლო კერას კი ამ ადგილას XIX საუკუნის 70-იან წლებში ჩაეყარა საფუძველი, ჯერ სამრევლო ეკლესიასთან არსებული 1-კლასიანი, შემდეგ კი 2 და 4-კლასიანი სასწავლებლებით, სადაც სხვადასხვა კუთხეებიდან ჩამოსული მოზარდებიც სწავლობდნენ. სწორედ ამ სკოლიდან გაცემული მოწმობით გაუგრძელებია ქუთაისში სწავლა დამოუკიდებელი საქართველოს განათლებისა და სამხედრო მინისტრს გრიგოლ ლორთქიფანიძეს. სასწავლებლის პირველი ხელმძღვანელი მღვდელი გიორგი ტყეშელაშვილი ყოფილა.
1000 კვ. მ. მოცულობის შენობა, რომელშიც ახლაა განთავსებული ამაღლების საჯარო სკოლა, 1966 წელს აშენდა და რუსთაველის სახელი მიენიჭა. მისი დირექტორი, ბატონი ალექსანდრე ოქროპირაშვილი სკოლაში 1998 წლიდან მუშაობს, ჯერ — ისტორიის მასწავლებლად, ხოლო 2007 წლიდან — დირექტორად. საკმაოდ ხანგრძლივი დროის შემდეგ, 1999-2000 წწ., სკოლას რემონტი ჩაუტარა საერთაშორისო მაშველთა კორპუსმა, რომელმაც სოფლის მაცხოვრის ეკლესიაც აღადგინა. მას შემდეგ სკოლა ფეხდაფეხ მიჰყვება რეფორმის მოთხოვნებს, ნერგავს სიახლეებს, შეძლებისდაგვარად, უმკლავდება კიდეც სოფლის სკოლისთვის დამახასიათებელ სპეციფიკურ სიძნელეებს და წარმატებებსაც აღწევს.
სკოლისთვის ძალიან მნიშვნელოვანია რაც შეიძლება მეტი მოსწავლის ჩართვა საგნობრივ ოლიმპიადებში. ამ სახის აქტივობები დამატებითი სტიმულია როგორც მოსწავლეების, ისე მასწავლებლებისთვის. მიმდინარე სასწავლო წელს, მაგალითად, 60-ზე მეტმა მოსწავლემ მიიღო ოლიმპიადებში მონაწილეობა და, სხვადასხვა ეტაპზე, კარგი შედეგებიც აჩვენეს. მინდია ხურციძე, რომელიც საუკეთესო იყო ბიოლოგიაში (პედაგოგი — ნესტან კაკაურიძე) სამედიცინო უნივერსიტეტის სტუდენტი გახდა. ასევე დიდ ინტერესს იჩენენ მათემატიკითა და უცხოური ენებით დაინტერესებული მოსწავლეები ქუთაისის შემოქმედ და ნიჭიერ ახალგაზრდათა ასოციაცასთან თანამშრომლობაში, რაც ერთობლივი პროექტების განხორციელებაში გამოიხატება. არიან ისეთებიც, რომელთათვისაც სამოქალაქო განათლებასთან დაკავშირებული საკითხებია უფრო საინტერესო. ისინი ახალგაზრდულ ორგანიზაციას — სკაუტური, ტრენინგების და კონსულტაციების ცენტრს არა ერთ პროექტს სთავაზობენ. ერთი ასეთი პროექტის დაფინანსებით სკოლაში სკაუტების ოთახი გარემონტდა და აღიჭურვა, კეთილმოეწყო სკვერი. მომავალში ღონისძიებები ჩატარდება მწვანეთა მოძრაობასთან ერთად, ბუნების დაცვის კუთხით. სასიამოვნოა, რომ მსგავს სამოქალაქო აქტივობებს სერიოზული მხარდაჭერა აქვს სკოლის დირექციისგან. ბატონი ალექსანდრე ამბობს, რომ თანამედროვე სამყაროში, დიდი კონკურენციის პირობებში, აკადემიურ განათლებასთან ერთად, მხოლოდ საზოგადოებრივად აქტიური ადამიანი თუ დაიმკვიდრებს ადგილს. ასეთთა შორის ასახელებს იგი სკოლის ლიდერებს, X და XI-კლასელებს — ანატოლი მეძველიას და ლანა ტყეშელაშვილს. წლევანდელი ზაფხულის 10 დღე, სხვა აქტივისტებთან ერთად, მათ ლაგოდეხში გაატარეს და ამ სფეროში კარგი გამოცდილებაც მიიღეს.
ასევე ძალიან პოპულარულია რაიონში ამაღლების სკოლის მხიარულთა და საზრიანთა კლუბი, რომელშიც ორივე ასაკობრივი ჯგუფის მოსწავლეები არიან გაერთიანებული. მათი მწვრთნელი მათემატიკის მასწავლებელი ენძელა ხურციძეა. რაიონის არაერთგზის ჩემპიონობა, დიპლომები და თასები სწორედ ენძელა მასწავლებლის პროფესიონალიზმის, საქმისა და ბავშვებისადმი ერთგულების შედეგია. აუცილებლად უნდა აღინიშნოს, ასევე ძალიან პოპულარული, ხალხურ საკრავთა შემსწავლელი წრე, რომელსაც ქალბატონი მანანა ხელაძე ხელმძღვანელობს. და კიდევ ერთი სფერო, რომელიც განსაკუთრებულად პოპულარულია ამაღლებაში. ეს არის სპორტი. ფიზკულტურის გაკვეთილების სპორტის გაკვეთილებით შეცვლამ მხოლოდ გააიოლა ის სამუშაო, რომელსაც წლების განმავლობაში ეწევიან ბატონები: შალვა გაბუნია (უმაღლესი კატეგორიის მწვრთნელი ჭიდაობაში), სევერიან ტყეშელაშვილი (ფეხბურთი) და რაჟდენ ტყეშელაშვილი (მაგიდის ჩოგბურთი) VII-XII კლასებში. ეს ის სახეობებია, რომელშიც სკოლას, ტრადიციულად, კარგი შედეგები აქვს, განსაკუთრებით ჭიდაობასა და მაგიდის ჩოგბურთში, თუმცა ეს უკანასკნელი, წლების განმავლობაში, სასკოლო სახეობებში თითქმის მივიწყებული იყო და მისადმი ინტერესიც თანდათან გაქრა. ახლა, როცა სკოლას არჩევანის უფლება მიეცა, გადაწყდა, რომ ტრადიცია აღადგინონ. ინტერესი მოსწავლეების მხრიდან არის და „ძველი დიდების“ დაბრუნების იმედიც აქვთ. ამ მოკლე დროში პირველი წარმატებები მოიპოვეს „ფეხბურთელებმა“. მინი-ფეხბურთში რაიონის პირველობაზე ითამაშეს და II ადგილი აიღეს; II ადგილს დასჯერდნენ სკოლბურთშიც რაიონულ შეჯიბრებაში. რაც შეეხება ჭიდაობას, აქაური ახალგაზრდების გამორჩეულად საყვარელი სპორტის სახეობაა. მაგალითისთვის ამ სკოლის კურსდამთავრებულების, მსოფლიოს ჩემპიონების, ილია ტყეშელაშვილისა და ვალერი მხეიძის დასახელებაც კმარა. დიდ იმედებს ამყარებენ საქართველოს სამბისტთა ნაკრების წევრზე, მეთორმეტეკლასელ ოთარ გაბუნიაზე, რომელმაც უკვე მიიღო მონაწილეობა რიგაში გამართულ ჭაბუკთა და ახალგაზრდათა მსოფლიო ჩემპიონატში. აქ მას განსაკუთრებული შედეგი არ უჩვენებია, მაგრამ სამომავლო ასპარეზობებისთვის გამოსადეგი გამოცდილება შეიძინა და ეს ძალიან მნიშვნელოვანია მის ასაკში; ახლახან საქართველოს მასშტაბით ქუთაისში გამართულ გივი სარდანაძის სახელობის ტურნირზე ამაღლების სკოლის მოსწავლეებმა 3 პირველი, 3 მეორე და 6 მესამე ადგილი მოიპოვეს; მათ ტოლი არც სკოლასთან არსებულმა ქორეოგრაფიულმა ანსამბლმა „ამაღლება“ დაუდო და ბათუმში გამართულ VII რესპუბლიკურ ფესტივალზე „ჩემი ხატია სამშობლო“ I ადგილი მოიპოვა.
აი, ასე გამოიყურება სკოლა, რომელსაც ჯერ კიდევ სჭირდება სერიოზული მხარდაჭერა სახელმწიფოსა და საზოგადოებისაგან. სასკოლო ინვენტარის მიღების და კომპიუტერული კლასის აღჭურვის შემდეგ საბუნებისმეტყველო მეცნიერებათა ლაბორატორიის მოლოდინში არიან. ეს მოლოდინი დიდი სიხარულით დამთავრდა 6 მეათეკლასელისთვის, რომელთაც საბაზო საფეხურის წარჩინებით დასრულებისათვის პრეზიდენტის საჩუქარი — კომპიუტერები მიიღეს. რაც შეეხებათ პედაგოგებს, ისინი გამოცდებისთვის ემზადებიან. მართალია, 30 მასწავლებლიდან სერტიფიცირებული მხოლოდ ოთხია, მაგრამ მათ უმრავლესობას ტრენინგებიც გავლილი აქვს და თითო საგანი ჩაბარებული. ასე რომ, დრო საკმარისია იმისთვის, რომ წარმატებით გაართვან თავი რეფორმის კიდევ ერთ მოთხოვნას.
ანა ფირცხალაიშვილი
|