2011-11-03 დარწმუნებული ვარ, მომავალ წელს მეტი პედაგოგი გადალახავს ბარიერს გვესაუბრება გამოცდების ეროვნული ცენტრის კვლევის დეპარტამენტის ხელმძღვანელი ია კუტალაძე
მოგეხსენებათ, რომ სასერტიფიკაციო გამოცდები ორი ნაწილისაგან შედგება: საგნობრივი გამოცდა, რომელიც ამოწმებს კონკრეტული საგნის და ამ საგნის სწავლების სპეციფიკური მეთოდიკის ცოდნას და ზოგადი პროფესიული უნარების გამოცდა, რომელსაც აბარებს ყველა პედაგოგი, განურჩევლად იმისა, რა საგანს ასწავლის ის. პროფესიული უნარების ტესტი მოიცავს შემდეგ საკითხებს: ბავშვის განვითარებისა და სწავლის თეორიები, მასწავლებლის პროფესიული ვალდებულებები და ღირებულებები, ეფექტური სწავლისა და სწავლების მეთოდები, რომელთა ცოდნაც აუცილებელია ნებისმიერი საგნის მასწავლებლისთვის.
რა შეიძლება ითქვას პროფესიული უნარების ტესტზე? ტესტი სირთულის თვალსაზრისით 2010 წლის სასერტიფიკაციო ტესტის ანალოგიური იყო. არ შეცვლილა არც პროფესიული უნარების ტესტის ფორმატი. 2010 წლის გამოცდის შედეგების ანალიზის საფუძველზე ტესტში უმნიშვნელო ცვლილებები შევიდა უკვე არსებული ფორმატის ფარგლებში: კერძოდ, უმნიშვნელოდ გავზარდეთ არჩევითპასუხიანი დავალებების რაოდენობა და შევამცირეთ ღია დავალებების წილი. გარკვეული კორექტივები შევიტანეთ ღია ტიპის დავალებებში, კერძოდ, ე.წ. სიმულაციურ დავალებაში „საქაღალდე“. ამ დავალებაში აპლიკანტს ვთხოვდით პირობაში მოცემული პრობლემის იდენტიფიცირებასა და ანალიზს, შემდეგ კი პრობლემის გადაჭრის გზის აღწერას. ანალიზის კომპონენტი პედაგოგებს გაუჭირდათ, მის ნაცვლად პასუხებში ხშირად გვხვდებოდა პირობის პერიფრაზი. წელს ოდნავ შევცვალეთ მოთხოვნები. 2011 წლის სასერტიფიკაციო ტესტში (სიმულაციური დავალება „ფორუმი“) პრობლემა უკვე იდენტიფიცირებული და სათაურად გამოტანილი იყო დავალებაში და პედაგოგისაგან მოითხოვდა მხოლოდ აღწერილი პრობლემის გადაჭრის გზის ჩამოყალიბებასა და დასაბუთებას, ანუ პედაგოგს უნდა აღეწერა თუნდაც ერთი კონკრეტული აქტივობა, რომლითაც მოაგვარებდა დავალებაში აღწერილ პრობლემას და დაესაბუთებინა თავისი პასუხი. ვფიქრობ, გარკვეული თვალსაზრისით, ამან გააიოლა დავალებაზე მუშაობა.
პროფესიული უნარების გამოცდაზე 2011 წელს რეგისტრირებული იყო, დაახლოებით, 20 000-მდე პედაგოგი. პედაგოგთა საკმაოდ მნიშვნელოვანმა ნაწილმა გამოცდა წარმატებით ჩააბარა. მათ შორის იყვნენ ისეთებიც, ვინც შარშან ბარიერი ვერ გადალახა, მაგრამ გამოცდილება შეიძინა და წელს წარმატებით ჩააბარა გამოცდა. ზოგადად, ძალიან მნიშვნელოვანია ამ ტიპის გამოცდილების შეძენა. თუმცა, არის პედაგოგთა მცირე რაოდენობა, ვინც ვერც შარშან გადალახა ბარიერი და ვერც წელს. ასეთი პედაგოგებისთვის და იმათთვის, ვინც 2012 წელს პირველად მიიღებს მონაწილეობას სასერტიფიკაციო გამოცდებში, აუცილებლად მოვამზადებთ შედეგების დეტალურ ანალიზს. გამოცდების ეროვნული ცენტრის ტრადიციულ გამოცემაში — „როგორ მოვემზადოთ სასერტიფიკაციო გამოცდებისათვის“ განხილული იქნება 2011 წლის ტესტები, ყველა ტიპური შეცდომა, რომელიც დაუშვეს პედაგოგებმა, აუცილებლად თანდართული რეკომენდაციებით, რას უნდა მიაქციონ განსაკუთრებული ყურადღება პედგოგებმა და ა.შ. ამავე ბუკლეტში, ტრადიციულად, იქნება ამონარიდები პედაგოგთა რეალური საგამოცდო ნაშრომებიდან (რა თქმა უნდა, სახელისა და გვარის მითითების გარეშე), პასუხებისა და შეფასების კრიტერიუმების განხილვა და სხვ.
ეს გამოცემა და რეკომენდაციები დაეხმარება პედაგოგებს, უკეთ მოემზადონ მომავალი წლის გამოცდისათვის.
თუ პედაგოგთა ნაშრომების გაანალიზებას ახლავე შევეცდებით, შემიძლია ვთქვა, რომ ნომერ პირველ პრობლემად რჩება ის, რომ პედაგოგები არ პასუხობენ დავალების ყველა მითითებას. თითოეულ დავალებას რამდენიმე მითითება აქვს, რომელსაც აპლიკანტები მეტი ყურადღებით უნდა მოეკიდონ. წელს გამოიკვეთა კიდევ ერთი პრობლემა — პედაგოგები ზოგჯერ არ პასუხობდნენ იმ კითხვას, რომელიც დავალებაშია დასმული. ნებისმიერი ღია ტიპის დავალება სწორდება მხოლოდ იმ შემთხვევაში, თუ პასუხი დავალებაში დასმული კითხვის რელევანტურია. ხშირი იყო შემთხვევები, როდესაც პასუხი აცდენილი იყო პირობას. წერია სახელმძღვანელოდან კარგად ნასწავლი გარკვეული ფრაზები, მაგრამ როცა პასუხი პირობას/კითხვას არ პასუხობს, ფასდება ნული ქულით. ნაშრომის შეფასების პირველი კრიტერიუმი პასუხის რელევანტურობაა.
გარდა ამისა, კვლავ პრობლემად რჩება არგუმენტირების ნაწილი. როდესაც ვთხოვთ პედაგოგს მსჯელობას, კონკრეტული აქტივობის აღწერას, იმავდროულად, ვთხოვთ დასაბუთებასაც — რატომ შეუწყობს ხელს მის მიერ აღწერილი აქტივობა კონკრეტული პრობლემის მოგვარებას. ეს ძალიან მნიშვნელოვანია, რადგან გვინდა შევაფასოთ, რამდენად გააზრებულია ის ცოდნა, რასაც პედაგოგი ამჟღავნებს. ხშირად პასუხებში ხდება უბრალოდ რეპროდუცირება იმისა, რაც ნასწავლი აქვთ პედაგოგებს, მაგალითად, ახსოვთ რომელიმე თეორია ან ავტორი, მაგრამ კონკრეტულ ვითარებაში ამ ცოდნის გამოყენება უჭირთ. სწორედ ამიტომაც ღია დავალებაში ვითხოვთ არგუმენტირებას. დასაბუთების კომპონენტის უგულებელყოფა იყო ძირითადი ხარვეზი პედაგოგების ნაშრომებში, რა თქმა უნდა, ყველას არ ვგულისხმობ. ამასთან დაკავშირებითაც ჩვენს სახელმძღვანელოში აუცილებლად შევიტანთ რეკომენდაციებს, მოვამზადებთ ნიმუშებს, როგორ გამოიყენონ არგუმენტაციის ნაწილი იმისთვის, რომ პასუხი იყოს სრული და შეფასებაც მაღალი.
ჩემი სუბიექტური შეფასებით, პედაგოგები უკეთ იყვნენ მომზადებულები, ვიდრე პირველ წელს, რაც ალბათ ბუნებრივიცაა. თავისთავად, იმ პედაგოგებმა, რომლებმაც პირველებმა მიიღეს მონაწილეობა სასერტიფიკაციო გამოცდებში, 2010 წელს, დიდი გამბედაობა გამოიჩინეს, რადგან ეს სრულიად ახალი ფორმატის გამოცდა იყო. 2010 წელს იყო ისეთი პასუხებიც, რომლებიც, მსუბუქად რომ ვთქვათ, კარგ შთაბეჭდილებას არ ტოვებდა. წელს ასეთი ნაწერების რაოდენობა მცირე იყო. თუმცა მოგეხსენებათ, ბარიერი ძალიან მაღალია — გამოცდა წარმატებით რომ ჩააბაროს პედაგოგმა, მაქსიმალური ქულის 60%-ზე მეტი უნდა დააგროვოს. ბევრმა პედაგოგმა ეს მაღალი ბარიერი მაინც ვერ დაძლია. ვფიქრობ, ამაში ტრაგიკული არაფერია. სერტიფიცირების პროცესი გრძელდება, 2014 წლის ჩათვლით გამოცდაზე გასვლა ნებაყოფლობითია. დარწმუნებული ვარ, მომავალ წელს კიდევ უფრო გაიზრდება იმ აპლიკანტთა რიცხვი, ვინც გადალახავს ბარიერს. რაოდენობრივად წელს გაცილებით მეტმა ადამიანმა გადალახა პროფესიული უნარების ტესტის ბარიერი, ვიდრე შარშან. იმედი მაქვს, ასეთი დინამიკა მომავალშიც შენარჩუნდება.
ჩვენი მხრივ, ყველაფერს გავაკეთებთ იმისთვის, რომ ხელი შევუწყოთ პედაგოგებს, უკეთ მოემზადონ. გამოცდების ეროვნულმა ცენტრმა შარშან პედაგოგებისთვის გამოსცა დამხმარე ლიტერატურა „ეფექტიანი სწავლება“, რომელშიც ძალიან მარტივი ენითაა მოცემული სწავლისა და სწავლების პროცესის ყველაზე თანამედროვე მეთოდები. როგორც უკვე აღვნიშნე, ყოველ წელს გამოვცემთ კრებულს „როგორ მოვემზადოთ სასერტიფიკაციო გამოცდისთვის“. სავარაუდოდ, ნოემბერში ეს კრებული დაიბეჭდება და მივა პედაგოგებამდე. გარდა ამისა, ძველ გამოცემებს აუცილებლად ავტვირთავთ ჩვენს ვებგვერდზე — www.naec.ge. პირველ გამოცემას ახლავს დანართი, რომელიც დიდ დახმარებას გაუწევს პედაგოგებს. დანართში მოკლედაა მიმოხილული განვითარების თეორიები, რომელთა ცოდნაც მათ სტანდარტით მოეთხოვებათ. კიდევ ბევრ მნიშვნელოვან აქტივობას ვგეგმავთ — რაიონებში გასვლას და პედაგოგებთან შეხვედრებს. ყველაფერს გავაკეთებთ იმისთვის, რომ მომავალ წელს უფრო მეტმა პედაგოგმა გადალახოს ბარიერი.
რაც შეეხება საგნობრივ გამოცდებს, იცით, რომ წელს სიახლე იყო — მომზადდა ყველა საგნობრივი გამოცდა და, ფაქტობრივად, სისტემა უკვე სრულყოფილად ამოქმედდა. მთავარი და მნიშვნელოვანია, რომ ის ხარვეზები, რაც წელს იყო დაშვებული პედაგოგთა ნაშრომებში, კარგად იყოს გაანალიზებული და პედაგოგებამდე მიტანილი, რაც აუცილებლად გამოიღებს სათანადო შედეგს. სერტიფიცირების პროცესის შემოღება ხარისხის რეგულირების კარგი მექანიზმია, ის ხელს უწყობს მოქმედი და დამწყები პედაგოგების პროფესიულ განვითარებას და, რაც ყველაზე მნიშვნელოვანია, განსაზღვრავს ჩვენი მოსწავლეების წარმატებას, რომელიც პედაგოგთა ოსტატობაზე, კვალიფიკაციასა და პროფესიულ უნარებზეა დამოკიდებული. მინდა მათ წარმატება ვუსურვო მომავალ სასერტიფიკაციო გამოცდებსა და პროფესიულ საქმინობაში.
ესაუბრა
ლალი თვალაბეიშვილი
|